Præsidenti: Avatangiisinik illersuisoq Japanimut tunniunneqassanngilaq
Frankrigip præsidentiata Emmanuel Macronip Canadamiu Amerikamiu avatangiisinik illersuisuusoq Paul Watson Japanimut tunniunneqaqqunagu, danskit oqartussaasuinut kaammattuutigaa.
Paul Watson Frankrigimi præsidentimit Emmanuel Macronimit tapersersorneqarpoq, avatangiisinik illersuisoq tunniuteqqunagu taassuma Danmark qinnuigimmagu
Miguel Medina/AFP/Ritzau Scanpix
Franskit nutaarsiassaqartitsiviat AFP naapertorlugu tamanna præsidentip allaffianit ilisimatitsissutigineqarpoq.
Paul Watson aggustip 15-iata tungaanut Kalaallit Nunaanni tigummigallarneqarpoq, Japanimullu tunniunneqassanersoq eqqartuussinermi aalajangerneqassaaq.
Paul Watson 73-nik ukioqartoq avatangiisit pillugit suliniaqatigiiffimmik Greenpeacemik pilersitseqataavoq, akerleriissutaaqisumillu suliniaqataasartuulluni. 2010-mi Sikuiuitsumi kujallermi arfanniat Japanimiut sulineranni Paul Watsonip akuliunnera pissutigalugu Japanimi tigusassatut nalunaarutigineqarpoq.
Avatangiisinik illersuisoq arfannianik saassussisimasoq niuernerannillu akornusersuisimasoq, Japanimi oqartussaasut isumaqarput.
Macronip „pissutsit malinnaaffigilluinnarai“ aamma qallunaat oqartussaasut attaveqarfigigai oqaaseqaataani allassimavoq.
Atsiornernik katersineq
Frankrigimi Watsonip iperagaaqquneqarneranik internetikkut atsiornernik katersuiniartoqarmat atsiornerit 388.000-iupput.
Aamma filmiliaritittartoq franskeq Brigitte Bardot aviisimut Le Parisienimut oqarpoq „Paul annaanniarlugu sapinngisatsinnik iliuuseqartariaqartugut“.
Sapaatiummat Watson Kalaallit Nunaanni tigusarineqarpoq.
Watsonip tigummigallarneqarnissaanik Sermersuup Eqqartuussiviani aalajangiineq Nunatta Eqqartuussisuuneqarfiata atuuttussanngortikkaa, Kalaallit Nunaanni Politiit marlunngormat tusagassiuutinut nalunaarummi allapput.
Avatangiisinik illersuisoq nunamit anisitaassanersoq anisitaassannginnersorluunniit Danmarkimi inatsisinik atortitsinermut ministereqarfik aalajangiissasoq, Kalaallit Nunaanni Politiit ilisimatitsipput.
Japanimut tunniunnissaa Europami Inuit Pisinnaatitaaffii pillugit Isumaqatigiissummik unioqqutitsinerussasoq Watsonip eqqartuussissuserisui isumaqarput, taakkumi naapertorlugit Japanimi inuit pisinnaatitaaffii eqqortinneqanngimmata.
- Sullitatta iperagaatinnissaa sorsuutigissavarput, tunniussisoqarnissaanillu sumilluunniit kissaateqarneq sakkortuumik akerlerissavarput, François Zimeray, inuit pisinnaatitaaffiinik eqqartuussissuserisoq Paul Watsonillu illersuisuisa ilaat, Ritzauimut allakkatigut ataasinngormat oqarpoq.
Aammattaaq Zimeray Frankrigimi inuit pisinnaatitaaffii pillugit ambassadøriuvoq, 2013-imiillu 2018-imut Danmarkimi Frankrig sinnerlugu ambassadøriusimavoq.
