Putinip Zelenskyjillu Ukraine pillugu piaartumik ataatsimiinnissaat Trumpip ammaappaa
USA-p præsidentia piareersimavoq Ukrainemi sorsunneq pillugu aappassaanik ataatsimeeqateqarnissamik, tassanilu Ukrainemi præsidentia aamma peqataasariaqarnerarpaa.
Præsidenti Donald Trump Kennedy Centerimi pingasunngornermi tusagassiortunik katersortitsinermini.
Foto: Alex Brandon/Ritzau Scanpix
Tallimanngornermi USA-p præsidentiata, Donald Trumpip, Ruslandillu præsidentiata, Vladimir Putinip, naapinnerat ajunngitsumik ingerlassappat, taava sukkanerpaamik ataatsimiinneq tulleqassaaq, tassanilu Volodymyr Zelenskyj aamma peqataassaaq.
Trump tusagassiortunik katersortitsinermini taamak oqarpoq.
Trumpip Putinillu naapinnerat Alaskami pissaaq. Ukraine-mi sorsunnermut tunngassuteqassalluni, tassanilu Ukrainemi præsidenti qaaqqusaasimanngilaq.
- Ataatsimiinneq siulleq ajunngitsumik ingerlassappat, taava sukkanerpaamik ataatsimiittoqaqqissaaq Putinip, Zelenskyjip uangalu, peqatigiumassappannga, Trump oqarpoq.
Ukrainemi sorsunnerup aallartinnerata kingorna Trump Putinillu siullermeerlutik tassani naapissapput.
Pingasunngornermi ualikkut Zelenskyjip aamma Europami naalakkersuisut siulittaasuisa arlallit peqatigalugit onlinemik ataatsimiinneranni Trump peqataavoq.
Naapinneq Ukrainemi sorsunnermut, sorsunnersuup naammassinissaanut isumaqatigiissutissanut, kiisalu Putinip Trumpillu naapinnissaanut tunngassuteqarpoq.
USA-p præsidentia naapinneq "ajunngilluinnartutut" nalilerpaa, aammalu erseqqissaavoq Ruslandimut kinguneqartitsissasoq, nunap sorsunnini unitsinngippagu, Reuters allappoq.
Frankrigip præsidentia, Emmanuel Macron, ataatsimiinnermi peqataasoq, kingorna oqaluttuarpoq, Trumpip ataatsimiinnermi oqaatigisaa, nunap immikkoortuinut tunngatillugu oqallinnerit tamarmik Ukraine akuutillugu aatsaat oqaluuserineqassapput.
Trump oqarpoq aamma, nammineq anguniagaralugu sorsunnerup unitsinneqarnissaa pillugu isumaqatigiissummik anguniagaqarluni.
