Puukunik utertitsisarfiit amerlineqalersut
ESANI A/S-ip puukunik utertitsisarneq annertusiniarlugu utertitsisarfinnik 17-inik nutaanik nunaqarfinni ikkussuivoq, Naalakkersuisut ilisimatitsipput.
2024-p aallartinnerani imeruersaatit immiaaqqallu puui pillugit nalunaarut nutaaq atuutilerpoq. Najugaqarfinni minnerni arlalinni puukunik utertitsisarfeqalissasoq Naalakkersuisullu nalunaarutigaat.
Arktisk foto: Tôrtia Reimer-Johansen
Avannaani Tunumilu 2024-p aallartinneraniit puukunik utertitsisarnermut malittarisassat nutaat atuutilermata, puukut utertinneqartut puussiamut ilillugit suliarineqartarsimapput.
Puukunik utertitsisarfiit 17-it maanna atulertussanngormata utertitsisarneq ajornannginnerulissaaq. Siulleq Saattuni atulereerpoq, januaarilu naatinnagu amerlanerit atulersinneqassallutik, avatangiisinut naalakkersuisoq Kalistat Lund (IA) tusagassiuutinut nalunaarummi ilisimatitsivoq.
Pisiniarfiit puukunik utertitsisarfeqanngitsut inissamik amigaateqartarlutillu puukullu utertinneqartartut tipaat ajornartorsiutigisarpaat.
Utertitsisarfiit nutaat puukunik aserorterisarput naqitsisarlutillu, taamaalilluni silamiititsisoqarsinnaalerluni.
Puukunik utertitsisarfiit nutaat pisiniarfinni pitsaassutsimik qaffatsitsissasut ESANI-mi pisortaq Frank Rasmussen oqarpoq.
- Maskiinat nutaat pisiniarfiit utertitsisarnerullu akornanni aningaasat sukkanerusumik ingerlaarnissaannik qulakkeerissaaq, tamatumalu peqatigisaanik puukunik utertitsisarfiit puukut eqaannerusumik suliarineqartarnissaannik kinguneqassaaq, Frank Rasmussen oqarpoq.
Utertitsisarfiit eqqortut nassaarinissaat unammillernartoq
Naalakkersuisoq Kalistat Lund naapertorlugu puukunik utertitsisarfinnik Pilersuisup pisiniarfiinut mikisunut naleqquttunik nassaarniarneq unammillernarsimavoq. Tamanna maanna utertitsisarfik mikisoq, qillertuusanik puiaasanillu tigusisinnaasoq atorlugu Norgemi Tomramiit iluatsinneqarpoq.
Puukunik utertitsisarfiit nutaat ingerlanerini misilittakkat naliliiffigineqariarpata, utertitsisarfiit taamaattut aamma nunaqarfinnut, suli puukunik utertitsisarfilersorneqarsimanngitsunut ikkussuunneqassanersut aalajangiiffigineqassaaq:
- Aallaqqaammulli utertitsisarnerup ineriartortinneqarnissaa, aammalu ajornartorsiutit naammattoorneqartartussat iluarsiiffigineqarnissaat pisariaqartinneqartoq eqqumaffigineqarpoq. Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfiup, ESANI-p niuertarfiillu suleqatigiilluarnerisigut utertitseriaaseq, innuttaasunut pinngortitamillu illersuinermik oqinnerulersitsisussaq angujumaarparput, naalakkersuisoq Kalistat Lund naggasiivoq.
Puukunik utertitsisarfiit nutaat sumiiffinni ukunani ikkussuunneqassapput:
Avannaata Kommunia – Aappilattoq, Ikerasak, Innaarsuit, Kangersuatsiaq, Nuussuaq, Qaarsut, Qeqertaq, Saattut, Saqqaq, Tasiusaq, Ukkusissat, Upernavik Kujalleq.
Qeqqata Kommunia – Kangerlussuaq.
Kommuneqarfik Sermersooq – Kulusuk, Kuummiut, Sermiligaaq, Tiilerilaaq.
