Qaanaami innuttaasut quliugaangata ataaseq kommunip avinneqarnissaa pillugu eqqartuisarpoq
Avannaata Kommuniani borgmesteri Qaanaamut tikeraarpoq kommunillu avinneqarnissaata kinguneri pillugit innuttaasunik ataatsimiisitsilluni, tassanilu innuttaasut 70-it peqataapput.
Palle Jeremiassen Qaanaami innuttaasunik ataatsimiisitsivoq, tassanilu innuttaasut ilaatigut kommunip avinneqarnerata iluaqutissartai ajoqutissartaalu eqqartorpaat.
Avannaata Kommunia
Avannaata Kommunia kommuninut marlunnut amerlanerusunulluunniit avinneqassappat, tamanna Kalaallit Nunaanni illoqarfiit avannarpasinnerpaartaannut, Qaanaamut, qanoq iluaqutissartaqassava ajoqutitassartaqarlunilu?
Tamanna Avannaata Kommuniani borgmesterip Palle Jeremiassenip, attaviitsup, Qaanaami innuttaasunik ataatsimiisitsinermi eqqartorpaa.
Avannaata Kommunia 2018-imi Kommune Qeqertalimmit Qaasuitsup Kommunianut avinneqarmat pilersinneqarsimavoq. Ukiunili kingullerni Qaanaami, Upernavimmi Uummannamilu innuttaasut kommunip avinneqaqqinnissaa kissaatigisimavaat.
Qaanaami pissutsit ilungersunartut
Tamanna pissutigalugu kommunimi kommunalbestyrelsi avinneqarsinnaanerup qanoq akeqassaneranik misissuilerpoq. BDO-mik misissuinerup takutippaa Qaanaaq kommunitut immikkoortinneqassagaluarpat atugassarititaasut ilungersunartut atulissagaat:
- Pingaartumik Kommuni QA 752-inik innuttaqarluni, kommunimi susassaqarfinni tamani, kiffartuussinermini qaffasissutsip tungaatigut aporfissaqarsinnaavoq, BDO-p aningaasatigut sunniutai pillugit misissuinerani allassimavoq.
Tamanna Palle Jeremiassenip Qaanaami innuttaasunut oqaatigaa.
- Qaanaaq nunaqarfittaalu 700 miss. inoqarput, amerlasuunillu takorloorneqarpoq, kommunimi nutaami mikisumi inatsisitigut allaffissornikkullu suliassanik suliaqarsinnaasut ilinniarsimasut pissarsiarinissaat naammattut ajornakusuussasoq, Avannaata Kommunia nittartakkamini allappoq.
Avannaata Kommuniani Aningaasaqarnermut Ataatsimiititaliaq Savalimmiuni, 23-nik kommunilimmi, paasisassarsiorluni angalavoq, kommunit annerusut minnerusullu suleqatigiinnerat pillugu paasisaqarnerorusulluni.
- Tassani suliassat arlalippassuit pillugit kommunit minnerusut anninerusullu suleqatigiititerput – tamannalu Avannaa eqqarsaatigalugu aamma periarfissaasinnaavoq.
- Innuttaasut ataatsimiisinneqarneranni Avannaani najukkani oqartussaaqataanerup nukittorsarneqarnissaa pingaaruteqartoq innuttaasut arlallit oqariartuutigaat, taamaaliornikkut ineriartornermut sunniuteqaqataanerusinnaagamik. Silap pissusaata allanngoriartornerata malitsigisaanik sikuusarnera sivikinnerulerpoq, taamaalillunilu piniarnissamut periarfissat annikillillutik, tamannalu piniartutut inuussutissarsiuteqarnermut annertuumik tatisivoq. Taamaattumik inuussutissarsiutinik nutaanik isertitaqarfiusinnaasunillu periarfissanik allanik inerisaanissaq atorfissaqartinneqarpoq, tamanna atuarfiup inersuaani, innuttaasunik ataatsimiisitsiffiusumiit, tusaaneqarsinnaavoq, allassimavoq.
