1.554.230.957 koruunit.
Tassa nunatsinni inuit suliffeqarfiillu ataasiakkaat pisortanut akiitsui katillugit 1,5 milliardit koruunit missarluinnaanniipput.
1.554.230.957 koruunit.
Tassa nunatsinni inuit suliffeqarfiillu ataasiakkaat pisortanut akiitsui katillugit 1,5 milliardit koruunit missarluinnaanniipput.
Ukiuni kingullerni akit qaffakkiartornerat inuuniarnermilu aningaasartuutit qaffakkiartornerat innuttaasut ilaannut ilungersunartorsiorfiuvoq. Taamaammat Naalakkersuisut inuit suliffeqarfiillu akiitsuisa siornamut sanilliullugu 38 millionit koruuniinnarnik amerleriarsimanerat “annikitsumik amerleriarput”-mik immaqa taavaat.
- Akileraarutissat sinneri 2024-miit 2025-mut 30 millionit koruuninik amerleriarsimapput. Taakkua ukiuni kingullerni akiitsut amerlanerpaartarivaat. Januaari 2025-mi akiitsut amerlassusaanni katillugit 38 procentertarivai.
- Pilersuisussanit akiligassanut akitsuut januaari 2025-mi akiitsut amerlassusaanni 26 procentiusoq, taakkua akiitsut amerlanersaasa tullerivai, aningaasaqarnermut naalakkersuisoqarfik ilisimatitsivoq.
Akiitsoqarfiunerpaasut ilaatigut makkuupput: Ineqarnermut attartuineq, ingerlatseqatigiiffiit akileraarutaat, “Namminersorlutik Oqartussat” aamma “taarsigassarsianik utertitsinermut”.
Inuit suliffeqarfiillu ataasiakkaat akiitsuisa suliassartaatut nalunaarsukkat katillugit qassiunersut, aningaasaqarneq pillugu nassuiaammi aamma ilisimatitsissutigineqarpoq. Taakkualu amerlagisassaasorilluinnarput: tassami katillugit 641.524-upput, tassa 2024-miit 2025-mut 5.586-inik amerleriarsimallutik.
Tusarluarnartoqartoq
Innuttaasut amerlanersaat pisortanut akiitsoqanngillat, innuttaasulli tamarmik – tassa inoorlaaniit utoqqaat ilanngullugit - pisortanut akiitsoqarsimasuuppata, agguaqatigiisillugu tamarmik immikkut 30.000 koruuningajalluinnarnik akiitsoqarsimassagaluarput.
Aningaasat taakkua amerlapput, nunanulli allanut sanilliukkaanni ikinnerumaarput. Assersuutigalugumi Danmarkimi innuttaasut suliffeqarfiillu pisortanut katillugit 150 milliardit koruunit sinnerlugit akiitsoqarput. Tappannami ilisimaarineqartutuut nunatsinninngarnit 100-riaammik inuttuneruvoq.
Kommunini atorfillit politikerillu qanoq akiitsoqartoqartiginersoq aamma alaatsinaaqqissaartarpaat. Kommunip pisassai maajip 31-ani katillugit 113,3 millionit koruuniusut, Qeqqata Kommuniani kommunalbestyrelsip ataatsimiinneranit imaqarniliami kingullermi allaqqavoq.
- Innuttaasut katillugit 1.039-t meeqqanut akilersuutinut katillugit 13.585-inik ataasiakkaatut akiitsoqarput. Kommuni inunnit ataasiakkaanit katillugit 3.385-iusunit pisassaqarpoq, imaqarniliami allaqqavoq.
Aningaasaqarnermut Naalakkersuisoqarfiup nuna tamakkerlugu naatsorsuisimanera naapertorlugu akiitsunut tunngatillugu aamma tusarluarnartoqarpoq. Tassa innuttaasut ulluunerani paaqqinnittarfinnut eqqaanermullu akiitsui ikiliartortut takuneqarsinnaasoq, imaqarniliami allaqqavoq.
