Søren Mortensenip meeraallunili inuusuttuullunilu skateboarderneq eqqissinarisarpaa ataatsimoorfiusutullu misigisarlugu. Ulluinnarni isumakuluutinit qimaaffittut misigisarpaa, nuannarigamiullu inersimasunngorluni aallutiinnarpaa. Ukiualuit matuma siorna Qaqortumut nuukkami illoqarfiup aqquserngi amitsut biilinik, pisuinnarnik, sikkilinik, løbehjulinik skateboardinillu ulikkaarsimasut skateboarderfiunissaat ajornakusoornerulerpoq.
Søren Mortensenip skateboardertartut allat ujartorpai, taakkuullutillu inuit nittartakkatigut attaveqatigiittarfiatigut Messengerimik pilersitsipput. Taanna aqqutigalugu sumi skateboardeqatigiinnissaminnik ataatsimoorlutik isumaqatigiittalerput. Ukioq ataaserluinnaq qaangiuppoq, Messengerikkullu attaveqatigiiginnissamik siunertaasimagaluartoq maanna peqatigiiffinngorsimavoq Qaqortoq South Parkimik atilik, siulersuisuini ilaasortalik, malittarisassalik annertuunillu pilersaarfiusoq.
Søren Mortensenip meeraallunili inuusuttuullunilu skateboarderneq eqqissinarisarpaa ataatsimoorfiusutullu misigisarlugu. Ulluinnarni isumakuluutinit qimaaffittut misigisarpaa, nuannarigamiullu inersimasunngorluni aallutiinnarpaa. Ukiualuit matuma siorna Qaqortumut nuukkami illoqarfiup aqquserngi amitsut biilinik, pisuinnarnik, sikkilinik, løbehjulinik skateboardinillu ulikkaarsimasut skateboarderfiunissaat ajornakusoornerulerpoq.
Søren Mortensenip skateboardertartut allat ujartorpai, taakkuullutillu inuit nittartakkatigut attaveqatigiittarfiatigut Messengerimik pilersitsipput. Taanna aqqutigalugu sumi skateboardeqatigiinnissaminnik ataatsimoorlutik isumaqatigiittalerput. Ukioq ataaserluinnaq qaangiuppoq, Messengerikkullu attaveqatigiiginnissamik siunertaasimagaluartoq maanna peqatigiiffinngorsimavoq Qaqortoq South Parkimik atilik, siulersuisuini ilaasortalik, malittarisassalik annertuunillu pilersaarfiusoq.
QAQORTOQ SOUTH PARKIMIK PILERSITSISUT
Skateboardertarfissaq Hotel Qaqortumiit, Sermeq helikopters-imit, Masanti A/S-imit, Inuplan A/S-imit, Stark-imit aamma Per Holm Sydel-imit aningaasaliiffigineqarpoq.
HK Transport, 60 grader nord, Permagreen aamma Qaqortumi Materialegården sulisunik atortunillu tunniussisoqarpoq.
- Nuannariinnarlugu aallartinneqarpoq, skateboardertartoqatigiinnik taaneqaannaraluarluni. Paasilertorparpulli Qaqortumi skateboardertarnissaq ajornakusoortoq. Timersuutip aallunnissaanut sumiiffimmik aalajangersimasumik peqatariaqarpoq, Søren Mortensen oqarpoq.
- Nuannariinnarlugu isumassarsiorpugut sunalu angusinnaanerlugu takorusulerlugu.
Nivariarneq siulleq
Isumassarsiaq siorna takkuttoq tassaavoq Qaqortumi skateboardertarfimmik sikkilertarfimmillu kikkunnilluunniit rulleskøjtinik, sikkilinik allanilluunniit atorneqarsinnaasoq. South Parkip sananeqarnissaanut nivariarneq siulleq aqagu arfininngornermi augustip qulingani pissaaq, tassalu assaanerit aallartissallutik.
- Piffissap ingerlanerani arfineq-pingasunik ilaasortaqalerpugut taakkuullutalu pilersitserusuttuulluta. Illoqarfimmik ineriartortitseqataarusuttunngoriasaarpugut skateboardertartoqatigiiginnarata, Søren Mortensen illarpoq.
Qaqortup illoqarfittut tikikkuminarninngornissaa siunertaavoq.
- Inuppassuit maanngaanniit Nuummut nuuttarput, uagulli maani innuttaasunut pilerinartumik pilersitsisinnaagutta amerlanerusut maanga nuukkusulersinnaapput. Inuit maani arlaannik amigaateqarput, aamma skatebordertarfissaq pillugu tapersersuisunik tusartarpugut.
Qaqortoq South Parkimi siulersuisunut ilaasortat Louise Hansen, Søren Mortensen aamma
Peter Hansen, kiisalu Miilu Isaksen HK Transportimeersoq (talerperleq tulliulluni) Qaqortumi
ujaqqanik piiaaffiup saavani. Ujaqqat mikisuaranngorlugit aserorterneqareerpata HK Transportip
skatebordertarfissamut aningaasaliineratigut atorneqassapput.
Assiliisoq: Julia Aka Wille
- Silamiinneq pingaaruteqarnerujartuinnarpoq inuit qarasaasiap umeruaanik isiginnaarusuinnalersillugit. Silamiittarnissaq eqqarsartaatsikkut peqqissutsimut pingaaruteqarluinnarpoq, taamaattumillu aamma uanga tamanna pilersinniarsarivara.
South Park naammassippat peqatigiiffiup ullut timersorfiusut ineriartortinnissaat pilersaarutigaa, Søren Mortensenilu, ukiuni 15-ini skatebordertartuusimasoq, ilinniartitserusuppoq.
- Aamma skateboarderluni nunatsinni pissartanngorniutsitsinissaq inunnik Qaqortumukartitsinissaq siunertaralugu pilersaarutigaarput, oqarpoq.
Kajumissutsimik ingerlanneqartoq
Pilersaarut malillugu nivariarneq siulleq arfininngorpat pissaaq kingornalu assaasoqalissalluni. Oktobarip qiteqqunnerani skateboardertarfissaq qaava tamarmi betonngimik qallerneqareersimassasoq Søren Mortensenip neriuutigaa. Upernaarulu tinngallattarfiliortoqarnissaa pilersaarutaavoq.
- Sanaartorneq aningaasaliisunit aqunneqarpoq, suliffeqarfiillu assigiinngitsut qaqugukkut sanaartornissamut piffissaqarnersut aamma apeqqutaavoq, Søren Mortensen, illuliornermik ilinniarsimasoq, oqarpoq.
Taassuma aamma peqatigiiffiup sinnera suleqatigalugu skateboardertarfissaq titartarpaa ilusilersorlugulu.
- Ukiup ataatsip ingerlanerani suliassarpassuusimapput. Ataatsimeersuartitsivugut, malittarisassat suliaraavut, aningaaserivimmi kontumik pilersitsivugut, aningaasaliisussarsiorpugut, qinnuteqaatit allappagut, titartaavugut iluserisinnaasaanik assigiinngitsunik, nunaminertamik pissarsivugut, sanaartornissamut akuersissummik piniarpugut, assaasarnermut akuersissutinik aamma betonngilersuinissamik akuersissummik piniarluta. Suliassaaleqiffiunngilaq, aammalu peqatigiiffiup aallunnissaa pisariaqarluni, Søren Mortensen oqarpoq.
Allanik ikiuinissani neriuutigigaa
Qaqortumi meeqqat inuusuttullu avatangiisinik nammineq meeraanermini iluaqutigisimasaminut assingusunik pilersitsissalluni neriuutigaa.
- Angajoqqaama averusernerisa kingorna meeraallunga atortarpara. Misigivunga annassutigisimallugu. Imminut tatiginerulerpunga, aamma snowboardimi Nunatsinni pissartanngorpunga.
- Skateboarderneq kinaassutsinnut ilannguppoq, kinaassutsikkullu ajornartorsiuteqarnissaraluara pinngitsoortippaa. Kiserliortutut isumatsassimasutut misigiunnaarlunga.
Taamaattumik Søren Mortensenip neriuutigaa skateboardertarfiup nutaap meeqqat inuusuttullu atugarliornerat annikillisinnissaa.
- Tamanna nuannaarutigissavarput, ingammik meeqqat ajornartorsiortut amerlasuut silamiinnissartik sammisaqarnissartillu iluaqutigisinnaavaat.
- Immaqa aamma pinaveersaartitsisinnaavoq. Erloqinartumik misigisaqarsimagaanni, allat taamatut misigisaqartikkusunnanngillat. Pinaveersaartitserusuppunga nuannaarnermillu pilersitsillunga.
