Qaqqap sisoornera 200 meterisut portutigisumik tassaarsuarmik kinguneqartoq
Tunumi Dicksonip Kangerluani qaqqap siorna sisoornera malissuarmik kinguneqarpoq. Silap pissusiata allanngoriartorneranik aallaaveqartoq ilisimatusartut nalilerpaat.
Siriusip alapernaarsuisuisa Issittumilu Sakkutooqarfiup atortuisa ilaat Dicksonip Kangerluani sakkortuumik tassaarsuaqarmat imaanut avalapput.
Assiliisoq: SIRIUS/ Arktisk Kommando
Siorna septembarimi pisoq tupaallannartoq lisimatusartut misissoqqissaarpaat.
Nunarsuarmi sumiiffinni arlalinni uuttortaaveqarfinni eqqumiitsumik kalerrisaarineq malugineqarpoq. Taanna Tunumi Dicksonip kangerluani qaqqap sisoornera malugineqarsimasoq ilisimatusartut maanna nalilerpaat.
Qaqqap sisoornera tassaarsuarmik 200 meterisut portutigisumik kinguneqarpoq. Tassaarsuaq ulluni qulingiluani kangerlummi tamanut ingerlaarpoq, imallu aalarngata nunamik sajutsitsinera Nunarsuup sinnerani malugineqarluni uuttortarneqarpoq.
Tassaarsuarujussuaq pissutsini nutaanerusuni aatsaat taama annertutigaaq, Danmarkimi Kalaallit Nunaannilu nunap qanoq issusianik misissuiffik (GEUS) allappoq.
Ilisimatusartut inerniliinerat Sciencemi atuarneqarsinnaavoq.
Silap allanngoriartonera pissutaasoq
GEUS naapertorlugu qaqqap sisoornera annertusimavoq, ujaqqat sermillu 25 millionit kubikmeterit qaqqamit sisoornerat tassaarsuaqartitsilluni.
Sumiiffik inoqanngimmat inunnik ajoqusertoqanngilaq, sakkutuulli atortuisa ilaat qeqertami Ellami 70 kilometerisut ungasitsigisumiittut immamut avalapput.
Silap pissusiata allanngoriartornera pissutaasoq misissuinermut allaaserinnittuuneq GEUS-imi ilisimatusartuunerisoq Kristian Svennevig oqarpoq:
- Sisoortoqartarneranik ilisimatusartutut soqutiginarpoq, aammali alianarpoq. Misissuinermi matumani siullerpaamik Tunumi qaqqap sisoorneranit tassaarsuaqarnera nalunaarsorneqarmat, tamatumalu takutippaa silap pissusiata allanngoriartornera kingunera annertuumik sunniuteqalereersoq, Kristian Svennevig GEUS naapertorlugu oqarpoq.
Silap pissusiata allanngoriartornera pissutigalugu sumiiffinni qaqqarsuarni siornatigut qajannaatsutut nalilerneqarsimasuni annertuumik sisoortoqarsinnaanera tassaarsuaqarsinnaaneratalu nakkutiginissaa aatsaat taama pingaaruteqartigisoq misissuinermi aamma inerniliutigineqarpoq.
Ilisimatusartut 68-it nunani 15-ini ilisimatusarfinnit 40-neersut pisimasumik tupaallannartumik misissuipput.
Karrat Kangerluani 2017-imi tassaarsuaqarmat inuit sisamat inuunerannik naleqarpoq. Tassaarsuaqarnerata kingorna summiffimmi qaqqanik qajannartunik nakkutilliissutinik ikkussuisoqarpoq.
