Qarasasiakkut saassussisoqareersoq: Sillimaniarneq pitsanngorsarneqarpoq
Namminersorlutik Oqartussat 2022-mi qarasaasiatigut ajornartorsiutinik annertuumik eqqugaapput. Namminersorlutik Oqartussat taamani ilisimatitsipput ajornartorsiutit isumannaallisaanermi ajornartorsiuteqarnermit pissuteqartut. Maannali isumannaallisaaneq nukittorsarneqartoq, Naalakkersuisut siulittaasuat Múte B. Egede §37 naapertorlugu apeqqutinut akissummini ilisimatitsivoq.
Polfoto
2022-mi qarasaasiakkut saassussinerup ilungersunartorsiorfiup kingorna Namminersorlutik Oqartussani qitiusumik allaffeqarfik teknikkikkut aaqqissuussaanikkullu isumannaallisaanermik nukittorsaalluni iliuuseqarpoq.
- Qarasaasiaqarnermi atortut nutaat atulersinneqarput, taamaaliornikkut qitiusumik allattoqarfimmi paasissutissat ingerlaarfii nakkutigineqarsinnaalerlutik. Atortut atulernerisa kingorna saassusseriarnerit kingunerlutsitsisinnaagaluartut pinngitsoortinneqarput. Attaveqaatit ingerlaavartumik mianernartoqarnersut misissorneqartarput aammalu qitiusumik allattoqarfimmi serverit attaveqaatillu hackerinit iserfigineqarsinnaasut mianernassusaannik misissuiffigineqartarlutik, Múte B Egede (IA) Asii Chemnitz Narupip apeqqutaanut akissuteqarluni allappoq.
Naalakkersuisut siulittaasuat aamma paasissutissiivoq qitiusumik allattoqarfimmi qarasaasiaqarnermi paasissutissatigullu sillimaniarneq pillugu kaajallaasitami qitiusumik allattoqarfimmi teknikkitigut aaqqissuussaanikkullu navianaataasinnaasut ammasumik misissuiffigineqartarnissaat qulakkeerneqarsimasoq.
- Kaajallaasitaq atorlugu qitiusumik allattoqarfimmi systemit assigiinngitsut pillugit minnerpaamik sillimaniarnerup iluani piumasaqaasiortoqarsimavoq, piumasaqaataasullu naammassineqanngippata systemit qaminneqarsinnaapput.
Immikkoortortaqarfik nutaaq
Cyberimi aamma paasissutissanik isumannaallisaaneq pillugu immikkoortortaqarfik pilersinneqarsimavoq.
- Ingerlatsinermi sulisut phishing-e-mailit navianaataannik sammineqarsimavoq soorluttaaq nalinginnaasumik paasissutissanik isumannaallisaaneq aamma iserfigineqartoq. Ukiut tamaasa cyberip sapaatip akunnera ingerlanneqartassaaq, tassanilu cyberimi isumannaallisaaneq sammineqartassaaq.
Internetikkut paasissutissanillu isumannaallisaanermut tunngasunik siunnersuinissaq, siunnersuineq ilinniartitsinerlu anguniarlugu immikkoortortaqarfik Center for Cybersikkerhedimik aamma Politiets Efterretningstjeneste-mik suleqatigiinnissamik isumaqatigiissuteqarpoq.
Taakkua saniatigut nunat tamalaat akornanni paasissutissanik isumannaallisaanermi malittarisassaq ISO 27001 qitiusumik allattoqarfimmi atuutilernissaa sulissutigineqarpoq.
Paasissutissanik isumannaallisaanermi malittarisassaq malillugu navianaataasinnaasunik aqutsinissamut, aqutsisut nalimmassaanissaannut aammalu qitiusumik allattoqarfimmi aaqqissuussaanikkut teknikkitigullu suleriaatsitsigut piumasaqaateqarpoq. Taakkualu qarasaasiakkut saassussisoqarsinnaanerinut naapertuuttorujussuusut, Naalakkersuisut siulittaasuat allappoq.
Tassani paasissutissat illersorneqartariaqartut suussusersineqassapput, taamaalilluni saassussisoqassagaluarpat paasissutissat illersorneqartariaqartut pilertortumik eqqorneqarsimanersut misissupallanneqarsinnaapput.
