Inatsisartunut ilaasortaasimasoq maannakkullu Kommune
Qeqertalimmi kommunalbestyrelsimut ilaasortaasoq Qasigiannguaneersoq Kristian
Jeremiassen, nulianilu takornariartitsivik ilaqutariit ingerlataat, Experience
Qasiginnguit maajimi pilersippaat. Suliffeqarfik nunani allani
takornariartitsivinniit ilisimaneqarlualereersoq, Topas Travel aamma Disko Line
Explorer suleqatigalugu ineriartortinneqarpoq.
Kisiannili Arctic Umiaq Linep siunissaa pillugu suli
avammut nalunaaruteqartoqannginnera siumut pilersaarusiornissamut aporfiliisoq
Kristian Jeremiassen oqarpoq.
Inatsisartunut ilaasortaasimasoq maannakkullu Kommune
Qeqertalimmi kommunalbestyrelsimut ilaasortaasoq Qasigiannguaneersoq Kristian
Jeremiassen, nulianilu takornariartitsivik ilaqutariit ingerlataat, Experience
Qasiginnguit maajimi pilersippaat. Suliffeqarfik nunani allani
takornariartitsivinniit ilisimaneqarlualereersoq, Topas Travel aamma Disko Line
Explorer suleqatigalugu ineriartortinneqarpoq.
Kisiannili Arctic Umiaq Linep siunissaa pillugu suli
avammut nalunaaruteqartoqannginnera siumut pilersaarusiornissamut aporfiliisoq
Kristian Jeremiassen oqarpoq.
Pilersaarusiornermut aporfiliisoq
Arctic Umiaq Line A/S (AUL) Namminersorlutillu
Oqartussat 2021-miit 2025-mut atuuttussamik ilaasunik kiffartuussinermut
isumaqatigiissuteqarput. Taamaattumik Nuummi, Qaqortumi Ilulissanilu
suluusalinnut mittarfiit tamakkiisumik atulerpata, Arctic Umiaq Line
atorunnaassasoq umiarsuarlu sinersortaat Sarfaq Ittuk tunineqassasoq,
siusinnerusukkut politikkikkut siunniunneqarnikuuvoq. Arctic Umiaq Lineli
aappaagu ingerlaannassanersoq matuneqassanersorluunniit suli maannamut avammut
nalunaarutigineqanngilaq. Kisianni umiarsuaatileqatigiiffik suli
pisariaqartinneqartoq ineriartortinneqartariaqartorlu, Inatsisartuni ilaasortat
partiini assigiinngitsuneersut amerlanerit isumaqarput.
Experience Qasigiannguit Italiami
takornariartitsivimmiit angalasussat aappaagu aasakkut sullinneqarnissaat
isumaqatigiissutigineqareerpoq. Arctic Umiaq Linelli aappaagu angalanissamut
pilersaarummik suli saqqummiussaqannginnera pissutaalluni, siumut pilersaarusiornissaq
ajornakusoortoq, Kristian Jeremiassen oqarpoq.
- Arctic Umiaq Line matuneqassappat takornariat aappaagu
sullitassagut tikissinnaajunnaassapput, taamaattumik taakkununnga siumoortumik
isumaqatigiissuterput atorunnaassaaq.
- Takornariartitsiviit ukiunut arlalinnut siumut
pilersaarusiorsinnaanissaat pingaaruteqarpoq. Takornariat
takornariartitsiviillu sullitassagut angallannikkut pissutsit qanoq
ittuunerinik siumoortumik ilisimatissinnaasariaqarpagut.
- Air Greenlandimut Disko Linemullu tunngatillugu pilersaarutit
ilisimavagut, kisianni imaatigut ilaasunik angallassineq tamakkiisoq qanoq
ilusilimmik aaqqissuunneqarniarnersoq suli paasisaqanngilagut, tamannalu siumut
pilersaarusiornissamut killiliivoq.
- Ilaasunik angallassinissamut pilersaarutit tamakkiisut
siumoortumik ilisimasinnaanngikkutsigit sattalluta ingerlassaagut, tamannalu
akuersaarneqarsinnaanngilaq, Kristian Jeremiassen oqarpoq.
Disko Line
aasaanerani Air Greenlandilu ukiuunerani qulimiguulik atorlugu Qasigiannguani
ilaasunik angallassisarpoq. Taassuma saniatigut Arctic Umiaq Linep
sinersortaataa Aasiannut, Ilulissanut Qeqertarsuarmullu aasakkut ukiakkullu
angallassisarpoq. Arctic Umiaq Linep matuneqarani ingerlaannarnissaa
pingaaruteqartoq politikeri aamma takornarianik angallassisartoq
isumaqarpoq.
Suleqatigiinneq pitsaasoq
Experience Qasigiannguit Topas Travelimik aamma Disko
Line Explorerimik suleqateqarpoq, tamannalu arlalitsigut pitsaaquteqartoq,
Kristian Jeremiassen oqarpoq.
- Angalatitsiviit taakku nunaqavissunik
suleqateqarnissamik ujartuipput tamannalu uagutsinnut isumalerujussuuvoq.
Inuiaqatiigiinni pingaartitagut angalatitsiviit taakku pingaartippaat,
taamaattumik taakkunannga suleqateqarnerput pitsaasutut nalilerpara, oqarpoq.
Experience Qasigiannguit pingasunik
ilaasoqarsinnaasumik maanna angallateqarpoq, sullitalli amerliartorneri
iluatigalugu angallammik anginerusumik pisaarnissaq sulissutigigitsik, Kristian
Jeremiassen oqarpoq.
Isumaqatigiinniarnerit ingerlasut
Arctic Umiaq Linep siunissaa pillugu Namminersorlutik
Oqartussanik isumaqatigiinniarnerit maannakkut ingerlasut, taakkuli imarisai
pillugit maannakkut oqaaseqarsinnaanngikkallarluni pisortaq Taitsiannguaq Olsen
oqarpoq. Isumaqatigiinniarnerit pillugit paasissutissat Ineqarnermut,
Attaveqaasersuutinut Isorliunerusunullu Naalakkersuisoqarfimmit
pissarsiarinissaat Sermitsiamiit sulissutigineqarpoq.
