Qeqertaliup borgmesteria: Taamatut pisoqaqqissanngilaq

Ukiut qulit sinnerlugit Kommune Qeqertalimmi angajoqqaajusup qitornani marluk angerlarsimaffiup avataanut inissinneqarsimasut angerlartinniarlugit tamaviaartariaqarsimanera, borgmesteri Simigaq Heilmann (D) naapertorlugu ersersitsivoq ilaqutariit qajannartumik inissisimasut pisortanillu sullinneqartariaqartut pillugit ersarissumik politikkeqarnissaq qanoq pingaaruteqartiginersoq:

- Siullermik erseqqissaatigissavara ilaqutariit pineqartut nalaassimasaat alianarlunilu assut ajuusaarnarmat, uagullu sioqqulluta (kommunalbestyrelsi maanna atuuttoq, aaqq.) pisimasuugaluartoq akisussaaffik tamakkiisumik tiguara pinasuartumillu maanna sulissutigaarput pisut taamaattut nalaanneqaqqinnginnissaasa qulakkeerneqarnissaa.

Borgmesterilu erseqqissaavoq killiffik siunissarlu eqqarsaatigalugit kommunalbestyrelsimi partiit akimorlugit suleqatigiinnissaq pingaaruteqartoq:

- Tusaavarput takuarpullu partii Siumut assigiinngitsunik piumasaqaateqarluni tusagassiuutitigut saqqummiussisoq. Neriuutigiinnassavara kommunitsinni inunnik sullissisarnerup ingerlanneqarnerata pitsanngorsarneqarnissaanut isumannaatsumik naatsorsuutigineqarsinnaasumillu politikkikkut ilusilersuiniarnitsinni akisussaaffimmik tiguseqataalluni qulakkeerinninniaqataassasoq, inuimmi pineqarput politikkikkullu immeraassutigineqartussaanngillat, borgmester Simigaq Heilmann (D) oqarpoq.

Meeqqanut  ilaqutariinnullu politikki ersarissoq

Kommune Qeqertalimmi amerlanerussuteqarlutik suleqatigiittut suleqatigiinnissamut isumaqatigiissutiminni anguniagarivaat sapinngisamik ilaqutariit avissaartinneqartassanngitsut ikiorneqartariaqarfimminnilu piaartumik eqqortumillu sullinneqartassasut, tamatigut siunertaralugu ilaqutariit ataatsimut sullinneqartarnissaat.

- Avataanut inissiisarnerit pinaveersaartinniarlugit suliat ingerlanneqarnerini ilaqutariinnik peqataatitsineq, naleqartumik sullissineq ilaqutariillu pineqartut pisariaqartitaat naapertorlugit sullissinerup ingerlanneqartarnissaa pillugu ersarissumik politikkimik pilersitsissaagut.

- Qujanartumillu aningaasaqarneq pillugu isumasioqatigiinnitsinni tamanna qaqinneqarmat takusinnaavara partiit akimorlugit ataatsimoorfigigipput angerlarsimaffiup avataanut inissiisarnerit pinaveersimatinniarlugit polikkikkut ataatsimoortugut, neriuutigaaralu tamanna aamma isumaqartoq akisussaaffimmik kivitseqatigiinnissatsinnut piumassuseqartoqartoq.

Borgmesterip ilanngullugu ilisimatitsissutigaa meeqqanik inuusuttunillu tapersersorneqartariaqartunut ingerlatsinermut toqqammavissiaq piareerneqaliivissoq, taannalu piareerpat ataatsimiititaliaq Inuinut piareeriarpat saqqummiunneqassasoq.

- Sulinermilu ersarissumik najoqqutaqarnissaq pisariaqartinneqarpoq, ilaatigut inatsisit peqqussutillu najoqqutarineqartut arlaliummata, sulisunullu tamanna nalornilersitseqqunagu tamanna pisariaqartoq, Simigaq Heilmann erseqqissaavoq, nangillunilu:

- Assersuutigiinnarlugu imaassinnaavoq ilaqutariit tassanngaannartumik ikiorneqartariaqalertut, assersuutigiinnarlugu inigisaminnut akiliisinnaajunnaarlutik inisseriataarnermikkut pinasuartumik ikiorneqarnissaminnik noqqaassuteqartut, nalunatigulu ikiorutsigit siumut saatsissinnaagigut qitornaannik arsaanngikkaluarlugit. Taanna assersuutaannaavoq, kisianni politikki ersarissoq aammalu iliuusissat ersarissut pigigutsigit ilaqutariit akuutinnerisigut avissaartinnissaat pinngitsoortissinnaavarput, borgmesteri assersuusiorpoq.

Kangaatsiaq Qeqertarsuarlu isumaginninnermut siunnersorteqanngillat

Borgmesterip erseqqissaatigaa pisumi pineqartumi aammalu suliani meeqqanut, inuusuttunut ilaqutariinnullu sullissinermi sulisut pisuutinniarneqassanngitsut pingaaruteqartoq, innersuussutigalugu akisussaaffik politikerinittooq.

Apeqqutigaarput politikkikkut eqqanaarsuiniarneq ersarissoq pitsaasumillu sullissisoqarnissaa timitalersorneqassappat kommunimi inunnik sullissisut naammannersut.

- Killiffitsinni isumaginninnermi siunnersortit amerlanngillat, taamaammat aamma kommunalbestyrelsimi ataatsimiinnitsinni ataatsimoorfigaarput inunnik sullissisut isumassorneqarnerat pitsanngorsarneqassasoq, soorlu supervision eqqarsaatigalugu, pikkorissarnerit ataavartut qulakkeersimagutsigit, sulisugut pioreersut tapersersorneqarluarnissaat qulakkeerusupparput. Sulisugummi inunnik sullissisut, taamaalillutillu aamma mianernartunik suliaqartut tarnikkut isumassorneqarluassapput pikkorissarnissaminnullu periarfissaqarluartinneqarunik suliat oqimaassinnaasaraluartut kukkuluttorsinnaanerit nalornisinnaanerillu pinaveersimatinneqarsinnaapput. 

- Sulisummi amerlassusaat eqqarsaatigalugu, soorlu oqaatigigit isumaginninnermi siunnersortit kommussinni ikittuinnaasut, suliassanut sanilliullugu amerlassutsimikkut naammannissaat qulakkiissavisiuk?

- Paasiniaanikuuvunga illoqarfinni tamani qanoq inissisimasoqarnersoq, Aasianni marluupput, aappaa atuarfeqarfimmiilluni, Kangaatsiami soqanngilaq, Qeqertarsuarmi soqanngilaq, Qasigiannguaniippullu marluk. Tassa isumaginninnermi siunnersortit kommunitsinni sisamaapput pisariaqartitsinerlu annertulluni. Maannakkorpiarli tamanna uniffiginagu sulisugut sulisooreersut najummiinnarnissaat pillugu sulissutiginninnitsinni salliutikkallarparput amerlanerusunik pissarsinissatta tungaanut, Kommune Qeqertalimmi borgmesteri Simigaq Heilmann (D) naggataatigut oqarpoq.