Qeqqata Kommuniani avinnissaq pillugu kommunalbestyrelsi isumaqatigiittoq

Qeqqata Kommuniata avinneqarnissaa kissaatigineqareersorlu innuttaasut Maniitsumi Sisimiunilu oqallipput:

Sisimiut Maniitsorlu avinneqarlutik namminiilissappat?

Sulili aalajangerneqanngilaq, Qeqqata Kommunianili kommunalbestyrelsi alloriarpoq. Ilaasortat tamarmiusut isumaqatigiipput kommuni avinneqassappat aningaasatigut allaffissornikkullu qanoq sunniuteqassanersoq misissorneqassasoq.

Misissuinerup inerneri innuttaasunut saqqummiunneqareerpata taasitinneqarnissaminnut periarfissinneqassapput.

Periarfissat misissorneqassapput

- Periarfissat assigiinngitsut eqqarsaatigineqarumaarput. Ullumikkut pituttunngikkaluarluta ulloq suna taasititsisoqassanersoq, kisianni tamattaalluta isumaqatigiippugut aningaasaqarnikkut allaffissornikkullu misissuisitsineq naammassereerpat innuttaasunut taasititsissutigineqassasoq. Aamma isumaqarpunga taanna tamat oqartussaaqataanerannut tulluarnerpaasoq, tassa innuttaasut taamaalilluta tamaavimmik aperissatsigit. Inernerit taamanikkussaanut tigugutsigit isummertoqarumaarpoq kingusinnerusukkut. Kisianni eqqaamassavarput aalajangiisussat tassaapput Inatsisartut, Qeqqata Kommuniani borgmesteri Malik Berthelsen (S) ataatsimiinnermi oqarpoq, imalu naggaserlugu:

- Taamaalilluni inerniliunneqarpoq paasiniagassat paasiniarneqareerpata innuttaasunullu paasititsiniutigineqareerpata taava kingusinnerusukkut taasitinneqassasut.

Taasititsinissamut suli ulluliisoqanngilaq, misissuisitsinerli sivisusinnaammat qinersinerup kingorna pissasoq kommunalbestyrelsi ilisimatitsivoq.