Qeqqata Kommuniani borgmesteri: - Kangerlussuup ineriartorteqqinnissaa sapernatigu takutissavarput
Kangerlussuarmi illoqutigiit 40-t missaanniittut Nuummut Ilulissanulluunniit nuunniarlutik pigisatik maanna poortortippaat, umiarsuaq ukioq manna kingulleq novembarimi tikinnginnerani. Naak tamanna nunaqarfimmiunut kommunimullu alianaraluartoq, borgmesteri suli isumalluarluni neriuuteqarpoq.
Foto: Tôrtia Reimer-Johansen
Nunatsinni mittarfiit allannguuteqarnissaat peqqutaalluni Kangerlussuarmi ilaqutariinnut allanngortoqalerpoq.
Illoqutigiimmi 40-ut missaaniittut maannakkorpiaq pisattatik poortortileruttorpaat, umiarsuup ukioq manna tikittussap kingulliup tikinnginnerani.
Malik Berthelsenip ilaqutariit aallartussat, taakkualu qitornaat meeraallutilli Kangerlussuarmi najugaqarsimasut, innuttaasut sinnerlugit qutsavigai Kangerlussuup ingerlanneqarneranut suleqataasimanerat pillugu.
- Aap, ilaqutariit ataatsikkut taamak amerlatigisut Kangerlussuarmiit aallakappata tamanna kommunimut, Kangerlussuarmi najugalinnut, minnerunngitsumillu ilaqutariinnut Kangerlussuarmiit aallartariaqalersunut assorujussuaq alianartuusussaavoq, borgmesteri allappoq nangillunilu:
- Aamma qularinngilara ilaqutariit ilaatigut ukiorpassuarni nuannaralugu Kangerlussuarmi najugaqarsimasut ulluni makkunani misigissutsikkut pikkunartorsiorsimanissaat, tupinnanngitsumik. Takorlorsinnaavaralu aallakaanerisa kingorna piffissaq siulleq Kangerlussuarmi najugallit ”imaaruttutut” misigisimanissaat.
Taamaakkaluartoq borgmesteri suli neriuuteqaluni isumalluarpoq. Nunaqarfimmi najugaqaannartussat peqatigalugit nunaqarfiup ineriartorteqqinnissaanut suli isumalluarpoq.
- Oqaatigissavarali Kangerlussuarmi suli najugaqartut peqatigalutigit Kangerlussuup ineriartorteqqinnissaa sapernatigu takutissagatsigu!, borgmesteri allappoq.
Inuulluaqqusilluni kaffillernissaq
Kangerlussuarmit nuullutik aallartussat eqqarsaatigalugit kommuni inuulluaqqusissamaarpoq.
- Pilersaarutigigaarput 12.novemberi Kangerlussuarmi inuulluaqqusilluta innuttaasunut kaffillernissarput, naggasiilluni allappoq.
