Sisimiut tallimanngornermi ullaakkut nillataarnerani Qeqqata Kommuniani borgmesteri, Malik Berthelsen allaffimmini Sermitsiamit apersorneqarnissaminut piareeqqavoq.
Kommuni kangiamiunik meeqqerivimmi Uiami sulilersussanut qanoq piareersarnersoq paasiniarniarlugu Sermitsiaq kommunimut pulaarpoq.
Sisimiut tallimanngornermi ullaakkut nillataarnerani Qeqqata Kommuniani borgmesteri, Malik Berthelsen allaffimmini Sermitsiamit apersorneqarnissaminut piareeqqavoq.
Kommuni kangiamiunik meeqqerivimmi Uiami sulilersussanut qanoq piareersarnersoq paasiniarniarlugu Sermitsiaq kommunimut pulaarpoq.
Qeqqata Kommunia maanna 79-inik perorsaasunik ilinniarsimasunik meeqqerivinni sulisussanik amigaateqarpoq. Taamaammat sulisussanik piaartumik nassaarusupput. Ukiortaareernissaanulli utaqqisariaqarput.
- Neriukkaluaratta aqagu tikissasut, kisianni pappialarsornertaa sivisummat ukiortaap kingorna aatsaat tikissinnaapput, Qeqqata Kommuniani borgmesteri, Malik Berthelsen oqarpoq.
Oqaatsinik ilinniartinneqarnerat allaffeqarfiup isumagissvaa
Oqaatsit aporfiulersinnaanerat angajoqqaat ilaanniit ernummatigineqarpoq.
Nuummi meeqqeriviit ilaanni kangiamiunik sulisoqarpoq, taakkulu misilittagaat aallaavigalugit oqaatsit aallaqqaammut aporfiusimapput. Malik Berthelsenili eqqissisaavoq kangiamiut sulilersussat kommunimi allaffeqarfimmiit akisussaaffigineqassasoq.
- Uagut sulisitsisutut ilinniartinneqarnissaat isumagissavarput. Allaffeqarfiup meeqqerivimmi oqaatsit atorneqartartut pillugit ilinniartinneqarnissaat isumagissavaa, Malik Berthelsen oqarpoq.
Allamik iliuusissaqannginneq
Meeqqerivinni sulisussaqarniarneq ukiorpassuani kommunimi ajornartorsiutaavoq, aamma meeqqerivik Uiami. Naak sulinermi atukkat pitsanngorsaavigineqaraluartut, sulisut inissaqartinneqaraluartut, NPK-lu suleqatigalugu akissarsianik aaqqiiniarnerit pisimagaluartut kommuni suli sulisussameerpoq.
- NPK-p nalunaarutaa atuaraanni takuneqarsinnaavoq sulisut 470-it nunatsinni amigaataasut. NPK-p oqaluttuuttariaqaraluarpaatigut taakku 470-it sumi nassaarisinnaanerigut, suliffeqarfiit allat aamma sulisussaaleqipput.
Meeqqerivimmi kangiamiunik sulisoqalernissaq pillugu isornartorsiuisunut borgmesteri apeqquteqarpoq:
- Sulisunut meeqqanullu suna pitsaanerpaava? Sulisut amigartut ulapiinnavissut meeqqanullu tamakkiisumik piffissaqanngitsut? Imaluunniit meeqqat sulisullu nunanit allaniit ikiorneqartut?
Oqaatsit nammineq ilinnialereeraat
Kangiamiut tallimat sulilersussat pillugit borgmesteri isumalluarpoq. Sulilersussat ilaat meeqqat atuarfianni ilinniartitsisutut ilinniarsimasuupput, borgmesterillu oqaasii naapertorlugit taakku kalaallisut nammineq ilinnialereerput.
- Isumalluarpunga. Attaveqarfigereeraangatsigit allatatik naggasertarpaat "Qujanaq", taamaattumik oqaatsigut ilinniarlugit aallartereerput. Qularinngilara meeqqanut sulisunullu iluaqutaalluarumaartut, Malik Berthelsen qungujulluni oqarpoq.
- Tikinnissaanut qilanaarpunga, qularinngilara meeqqanut, sulisunut kommunimullu iluaqutaalluarumaartut, borgmesteri naggasiivoq.