Politik
Qeqqata Kommuniani inuusuttut kommunalbestyrelseqalernissaat kissaatigineqarpoq
Qeqqata Kommuniani kommunalbestyrelsimi ilaasortaq, Steffen Johansen, inuusuttut kommunalbestyrelseqalernissaanut oqallisissiamik siunnersuuteqarpoq. Inuusuttut politikkimut peqataanerulernissaat soqutiginninnerulernissaallu siunertaralugu, inuusuttullu kommunalbestyrelsimut qaninnerusumik attaveqalernissaat qulakkeerniarlugu siunnersuut oqallisigineqassaaq.
Foto: Johannes Ujo Müller / Qeqqata Kommunia
Steffen Johansenip inuusuttut Qeqqata Kommuniani ataatsimiittarfimmi takorusuppai. Taamaaliornikkut inuusuttut politikkimik ilisimasaqarnerulernissaat isummersornerulernissaallu anguniarneqassaaq.
- Inuusuttut qanimut Kommunalbestyrelsimut suleqateqarnerulernissaat pillugu, inuusuttullu politikkimik ilisimasaqarnerulernissaat pillugu aammalu inuusuttut oqariartuutiminnik tigussaanerusumik susassaqartunut anngussisinnaalernissaat pillugu oqaluuserisassatut siunnersuuteqarpunga.
- Siunissaq ungasinnerusoq eqqarsaatigalugu politikkimik soqutiginnittut amerlanerulernissaannut tikkuussissasoq isumaqarpunga. Kommunalbestyrelsimilu ilaasortatut inuusuttunut tusarnaarnerunissaq suleqateqarnerulernissarlu isumaqarpunga peqqinnartuusoq pingaaruteqarluinnarlunilu.
Allaffeqarfik ilaliisoq
Qeqqata Kommuniani allaffeqarfiup siunnersuut ajunngitsumik qisuariarfigaat, erseqqissarlugu meeqqat inuusuttullu politikkikkut oqallinnermi peqataanissaat pingaaruteqartoq, aamma eqqaavaat meeqqat inuusuttullu politikkikkut oqallinnermi peqataaneq ajortut. Nakuusaaqqat inuusuttullu inatsisartui aqqutigalugit peqataanerusut erseqqissarlugu.
- Ukiuni taakkunani kommunit marlussuit inuusuttunut kommunalbestyrelsinik pilersitsinikuupput tassaallutik Avannaata Kommunia aamma Kommuneqarfik Sermersooq, tamatumalu takutippaa, meeqqat inuusuttullu nipaannik tusarusunnermik ukkataqarnerup annertusiartorneranik takussutissaqartoq, Qeqqata Kommuniani allaffeqarfik akissummini allappoq.
100.000 koruunit sinnerlugit akeqassasoq
Inuusuttut kommunalbestyrelsiani inuusuttunik 15-inik ilaasortaqassaguni angalanermut, angalaqataasunut, nerisassanut, unnuisitsinermut ilaasortanullu inersimasunullu angalaqataasunut ullormusianut aningaasartuutit naatsorsuutigineqassapput.
Katillugit 112.111 koruunit naatsorsuutigineqarsinnaasut, Qeqqata Kommunia allappoq.
Akit ullumikkut atorneqartut atornerisigut akit siulianiittut naatsorsuutigineqarsinnaasut, angallassissutilli sorliit atorneqarnerinut, sumi najugaqarnerinut namminnerlu nerisassiortassanersut apeqqutaallutik akit nikerarsinnaasut, kommuni ilanngullugu paasissutissiivoq.
Siunnersuut kommunalbestyrelsimi sisamanngorpat juunip ulluisa 27-anni oqaluuserineqassaaq.
