Qinnuteqartitsinermik nutaamik Ilisimatusarfik ammaavoq
Suli ilinniartunut nutaanut inissaqarmat, Ilisimatusarfimmi bacheloritut kandidatitullu ilinniakkanut pingasunut aappassaanik qinnuteqartitsisoqarpoq. Tamatuma saniatigut ilinniagaq nutaaq saqqummiunneqarpoq.
Ilinniakkat ilaanni suli inissaqarnerit pissutaallutik qinnuteqartitsinerup aappassaat Ilisimatusarfiup ammarpaa - ilinniakkat tamarmik septembarip aallaqqaataani 2024 aallartissapput. Ilinniagaq nutaaq aamma saqqummiunneqarpoq, aavarnissamut puisillu naavanik misissuinissamik ilinniartunut periarfissaqartitsisoq.
Leiff Josefsen
Ilisimatusarfimmi bacheloritut ilinniakkani pingasuni kandidatitullu ilinniakkami ataatsimi suli inissaqarmat, Ilisimatusarfik aappassaa qinnuteqartitsivoq – tamarmik septembarip aallaqqaataani 2024-mi aallartittussat.
Ilinniakkat uku pineqarput:
- Nutserisoq oqalutsilu, bacheloritut
-
Oqaasilerineq, atuakkialerineq tusagassiuutilerinerlu, bacheloritut
Oqaasilerineq, atuakkialerineq tusagassiuutilerinerlu, kandidatitut
- Teologi, bacheloritut
- Tusagassiortunngorniarneq, bacheloritut
Maajip arfernganit 2024 maajip 27-iata 2024 tungaanut qinnuteqarnissaq ammasoq, Ilisimatusarfik ilisimatitsivoq.
Pinngortitamik ilisimatusarnerup iluani ilinniagaq nutaaq
Tamatuma saniatigut biologimi bacheloritut ilinniagaq nutaarluinnaq, SILA-mik taaneqartoq, Ilisimatusarfimmit saqqummiunneqarpoq.
- Kalaallit Nunaanni pinngortitamut immikkut ittumik atassuteqarpugut - uumassusillit akornanniikkatta. Inuiaqatigiit aningaasaqarnitsinnut, nerisatsinnut, kulturitsinnut aamma eqqarsartaatsikkut peqqissutsitsinnut pinngortitaq tunngaviuvoq. Uumassusilerinermi SILA-mi bacheloritut ilinniakkap pingaarnertut taakku tamaasa immikkoortortarai, tusagassiuutinut nalunaarummi Ilisimatusarfik allappoq.
Ilaatigut Pinngortitaleriffiup suleqatigineratigut uumassusilerinermi bacheloritut ilinniagaq Ilisimatusarfiup pilersissimavaa, ilinniagarlu Kalaallit Nunaanni, pinngortitaani kulturiannilu aallaaveqarpoq. Ilinniartut aavariassapput, assaasa puisit naavi attussavaat Kalaallit Nunaannilu suliffeqarneq pillugu ilinniassallutik.
Ilinniakkami pingaarnertut sammisat pingasuupput:
- Pinngortitap pisuussutaanik ingerlatsineq. SILA-mi bachelori avatangiisinut inuiaqatigiinnullu tunngasutigut piujuartitsisumik pinngortitap pisuussutaanik aqutsinermik suliaqarsinnaalissaaq.
- Silap pissusiata allanngoriartornera. Issittumi silap pissusiata maanna allanngoriartornera aamma tamassuma pinngortitami pissuseqatigiinnermut, inuiaqatigiinnut aningaasaqarnermullu sunniuteqarnera ilinniartup sukumiinerusumik paasisimasaqarfigilissavai.
- Peqqissuseq Pinngortitarlu. Kalaallit Nunaanni inuit aamma pinngortitap ataqatigiinnerat pillugu ilinniartoq paasisimasaqalissaaq, tamassumunnga ilanngullugit nerinermut kulturi, nunaateqarneq, piniarneq aalisarnerlu, pinngortitap peqqissutsimut iluaquteqartumik sunniutai, aningaasaqarnikkut ilippanartut aamma kulturimut pingaaruteqassusaat.
- SILA-mi ilinniartoqatigiit siulliit aallartinnissaannut piffissanngungajalermat sinnattoq piviusunngorpoq. Ilinniagaq ilinnialertussat eqqarsaatigalugit ilusilersorneqarnikoq qanoq isumaqarfigineraat paasissallugu qilanaaraarput. Kulturitsinnut ataqqinnilluta, eqqarsartaatsikkut peqqissuseq qitiutillugu kiisalu ilinnialertussat avatangiisaasa pissanganartuutillugit kajumissinartuutillugillu ilinniagaq pilersissimagipput malugissagaat neriuutigaarput, immikkoortortaqarfimmi pisortaq Aviâja Lyberth Hauptmann.
Qinnuteqarsinnaaneq ammareersoq, februaarillu aallaqqaataani 2025-mi ilinniarneq aallartissasoq, Ilisimatusarfik nalunaarpoq.
