Qupanuk Olsenip Inatsisartuniikkunnaarluni KTI toqqaraa
Qupanuk Olsen Naleqqameersoq Sisimiuni KTI-mi, Tech College Greenlandimi, pisortanngussaaq. Inatsisartunit sulinngiffeqarnissaminik qinnuteqarpoq. Akuerineqassanersoq suli ilisimaneqanngilaq.
Qupanuk Olsen Inatsisartuni sivikitsumik ilaasortaavoq, pingaartitaminilli siunnersuuteqarnissani angumerivaa.
Toqqorsivimmiit assi: Oscar Scott Carl
Inatsisartut ataatsimiinnerat maanna aallartippoq, taarsiinerillu siulliit aallartilereerput. Naleqqamiit ilaasortanngorlaaq Qupanuk Olsen ilinniarfimmi KTI-mi, Tech College Greenlandimi, Sisimiuniittumi pisortanngornissaminut akuersisimavoq. Taamaammat Inatsisartuni sulinngiffeqarnissaminik qinnuteqarsimavoq.
Politikerinngoqqammerputit, ingerlaannaq allamut ingerlalerpit?
– Aap, neqeroorutilli itigartinnissaa ajornakusoortorujussuuvoq, ilinniartunut 650-it missaanniittunut sulisunullu 150-inut sunniuteqarsinnaavunga. Suliffittaanni inuiaqatigiit allatut suli kiffartuutissavakka.
Soormi sulinngiffeqarnissamut qinnuteqarrnak politikki qimaannanngiliuk?
– Aqagumi ukiulluunniit marluk qaangiuppata qanoq pisoqassanersoq ilisimaneqanngilaq, taamaammat taamatut aaqqiisoqassasoq siunnersorneqarpunga, Qupanuk Olsen oqarpoq.
Qupanuk Olsenip inatsisartuni sulinermini piffissap allanngortinneqarnissaanik suliniuteqarpoq, tassa seqernup inissisimaffianut naleqqussarnerusinnaaniassammat aasaanerani ukiukkullu nalunaaqutaq allanngortinneqanngisaannassasoq.
Naleqqap siulittaasuata Pele Brobergip parteeqatini atorfittaarneranut atatillugu pilluaqquaa.
– Qupanuk marluusuuppat tamani atorfeqarnissaa tulluarteqqissaaraluarlugu, KTI-mili pisortaaninngornissaanut pimoorulluarlugu toqqaanissaanut periarfissaqarmat tamakkiisumik pimoorussinissaanut aalajangiinissaa tapersersorlugu oqarfigaara, taanna tusagassiuutinut nalunaarummi allappoq.
Inatsisartut innuttaasunik sinniisoqarput, Qupanuk Olsenillu sulinngiffeqarnissaminut akuerineqassanersoq suli ilisimatitsissutigineqanngilaq.
