Nunatsinni meeqqanik angerlarsimaffiup avataanut inissiisarneq annertuumik suliassaqarfiuvoq. Kalaallit Nunaanni Naatsorsueqqissaartarfiup kisitsisaataasa tamanna aamma ersersippaat.
Meeqqat 400-t sinnerlugit amerlassusillit 2024-mi angajoqqaarsianut inissinneqarsimapput.
Nunatsinni meeqqanik angerlarsimaffiup avataanut inissiisarneq annertuumik suliassaqarfiuvoq. Kalaallit Nunaanni Naatsorsueqqissaartarfiup kisitsisaataasa tamanna aamma ersersippaat.
Meeqqat 400-t sinnerlugit amerlassusillit 2024-mi angajoqqaarsianut inissinneqarsimapput.
Meeqqat taakku 400-t sinnerlugit amerlassusillit angajoqqaarsianut inissinneqarsimasut saniatigut, nunatsinni, kommunit, namminersorlutik oqartussat namminersortullu meeqqanut ulloq unnuarlu angerlarsimaffiutaat, Isumaginninnermut Aqutsisoqarfiup kisitsisaatai naapertorlugit, meeqqanut inuusuttunullu 356-inut inissinneqartitsipput.
Meeqqanut, inuusuttunut ilaqutariinnullu Naalakkersuisoq, Mads Pedersen (IA) pingasunngornermi tusagassiortunik katersortitsinermini oqaluttuarpoq, nuna tamakkerlugu inissiisarnernut kisitsisit naapertorlugit, milliard koruunit affaasa missaanik ukiut tamaasa atuisoqartartoq.
Mads Pedersenip aamma oqaatigaa, angajoqqaarsiaasartut akissarsiaannik qaffannissaq Naalakkersuisut maanna sulissutigigaat, angajoqqaarsiatut sulineq kajuminnarnerulersinniarlugu.
- Nalunngilarput, angajoqqaarsiat angajoqqaarsiatullu periarfissaqaraluartut tunuartiinnartartut, angajoqqaarsiatut sulineq akilersinnaanngimmat. Angajoqqaarsiatut tunuartertartut aamma oqaatigaat, meeqqamik/meeqqanik inissiinerup kingunerisaanik aningaasartuuteqarneruliinnartarlutik matussuserneqanngitsunik.
Taamatuttaaq Mads Pedersenip oqaatigaa, meeqqanik angerlarsimaffiup avataanut inissiisoqartillugu angajoqqaarsiat inissiiffissatut salliutinniaraat, aammalu Naalakkersuisut meeqqanut angerlarsimaffinni inissiinernik annikillisaanissamik sulissuteqassasut:
- Soorunami kissaatigineruarput meeqqat angerlarsimaffimminni angajoqqaaminniiginnassasut, kisianni inissiisarnerit pisariaqaraangata, pitsaanerusoraarput meeqqat inissinneqartut angajoqqaarsiaqartinneqarnissaat ulloq unnuarlu angerlarsimaffimmiitinnagit, tassami pingaaruteqarpoq meeqqat ilaqutariinni alliartornissaasa pisarnissaa suliffeqarfittut ittuni pinnani, taanna taamak nassuiaavoq.
Ingemann mianersoqqusivoq
Kommunalbestyrelsimili ilaasortaq Rachel Ingemann (D) mianersoqqusivoq Naalakkersuisut inissiisarnernut pilersaarutaannik tusarnaareerluni:
- Naalakkersuisut kaammattorusuppakka eqqarsarluaqqullugit pilersaarutigisatik meeqqat pisariaqartitaannut qanoq naleqquttiginersut pillugu. Isumaqataavunga pitsaanerpaajuaannassasoq ilaqutariit avissaartinneqannginnissaat. Kisianni ajoraluartumik piviusuuvoq, meeqqat amerlasuut angerlarsimaffiup avataanut inissinneqartariaqartarnerat.
- Taamaattorli uanga naammattuugaqarnikuunngilanga meeqqanut ulloq unnuarlu angerlarsimaffinnik suliffeqarfittut ittunik. Akerlianilli angerlarsimaffiit pulaakkakka takusakkalu angerlarsimaffippalaartuupput. Kissalaartuupput meeqqallu pisariaqartitaannut naleqquttumik aaqqissugaallutik, meeqqallu ulloq unnuarlu angerlarsimaffimmiittut naapittakkakka toqqissisimallutik inuupput, namminneq ineeraqarlutik, qatanngutigiillu ataatsimoorlutik najugaqarsinnaallutik, qatanngutigiillu ilaqutariinnerminnik malugitinneqarluartarput imminnut tulluartunik ulloqartinneqartaramik, tassanilu ilaqutariittut misigisaqartarlutik, qatanngutigiikkamimmi.
Rachel Ingemann isumaqarpoq, angerlarsimaffiup avataanut inissiisarnermi periaaseq ataaseq allamut sanilliullugu salliutassatut siunnerfigineqarnera kukkunerussasoq, Naalakkersuisullu iliuuseqannginnerminni eqqarsarluarnissaat kaammattuutigalugu:
- Matumanimi meeqqap atugarisai pineqarput, taakkulu aningaasanngorlugit uuttorniarneqarsinnaanngillat. Meeqqat ilaqutariinnut paarineqartussanngorlugit tunniussuutiinnarneqarnerisigut sipaaruteqarsinnaalluni isumaqartoqarsimaguni, meeqqanut pitsaanerusussaq eqqarsaatigineqarnavianngilaq.
Angajoqqaarsiat nakkutigineqartarnerat suleqatigineqarnissaannillu pilersaarutit amigaataapput
Rachel Ingemannip erseqqissaatigaa, meeqqanut ulloq unnuarlu angerlarsimaffinnut nakkutilliineq sakkortuujusoq ingerlaavartuusorlu, aammalu isumaginninnermut aqutsisoqarfiup inatsisit naapertorlugit meeqqanut ulloq unnuarlu angerlarsimaffiit malittarisassarpassuaqartikkai.
Paarlattuanilli isummani naapertorlugu, angajoqqaarsianik nakkutilliineq aammalu angajoqqaarsianik suleqateqarnissamik pilersaatutit amigaataasut, tamannalu meeqqap/meeqqat atugarisaannut toqqissisimanissaannullu qularnaarinninnissamut ilaatigut pinngitsoortitsisartoq:
- Soorunami angajoqqaarsiat isumassuilluartut pisussaaffimmillu malinnittut amerlaqaat, taakkulu paarisaminnik ajunngitsumik atugassaqartitsisarput. Kisianni tamanna isumaqanngilaq, nakkutilliineq pisortanit taamaatiinnarneqarsinnaasoq. Angajoqqaarsiat arlallit tungaannit ilisimavara, allaat ukioq ilivitsoq sinnerlugu nakkutilliisoqarsimanngitsoq, angajoqqaarsiat angerlarsimaffimmilu pissutsit ajunnginnersut meeqqallu pisariaqartitaanut naapertuunnersut nakkutilliisoqartussaagaluartoq.
- Aamma nalunngilara, angajoqqaarsiat arlallit meeraq/meeqqat paarisatik pillugit kommuninut oqaloqatiginnikkusullutik saaffiginnittaraluartut, kisianni oqartussaasut akissuteqartarsimanngitsulluunniit. Tassa misinnarpoq oqartussaasut eqqarsaatituarisaat tassaaasarsimassasoq meeraq/meeqqat inissinneqarpata tassa naammattoq, meeqqallu angerlarsimaffimmit kaanngartinneqarsimasut pillugit suliassat isumagisariaqanngitsut. Isumaqarpunga oqartussaasut tungaannit tamanna sumiginnaanerusoq. Taamaattumik kaammattuutigerusuppara, Naalakkersuisut paasiniassagaat ilaqutariit paarsisartut pillugit Namminersorlutik Oqartussat nalunaarutaat naapertorlugu iluamik sulisoqarnersoq, pingaartumik misissussagaat naammaginartumik nakkutilliinissamut pisussaaffik malinneqarnersoq.
Meeqqat tallimat ineeqqami ataatsimiitillugit paarineqartut
Rachel Ingemann assersuutinik aalajangersimasunik saqqummiussaqarpoq meeqqat ilaqutariinnut inissinneqarsimasut ilaatigut qanoq pineqartarnersut:
- Nalunngilara allaat meeqqat tallimat, ilaqutariinngitsut imminnullu atassuteqanngitsut, ataatsikkut ineeqqami ataatsimi najugaqartillugit ilaqutariinni inissiisoqartartoq. Nalunngilara aamma, meeqqat paarineqartut ilaqutariinnit inissinneqarfigisimasaminnit "immikkoortinneqartartut" ilaqutariit feeriarlutik aallassagaangata, meeqqat paarineqartut allanik angajoqqaarsiaagallagassaannik pissarsiortoqartartoq.
- Kisianni aamma mamianaraluaqisumik assersuutissaqarpoq meerannguaq tallimanik ukiulik piffissami sivikitsumi tallimariarluni angajoqqaarsianiit angajoqqaarsianut nuunneqaqattaarsimasoq, meeqqap angerlarsimaffiup avataanut inissinneqarnerata kingorna. Taakkuinnaalluunniit assersuutit takutippaat, oqartussaasut pisortallu meeqqanik ilaqutariinnut inissinneqarsimasunut qanoq sumiginnaatiginersut, massa paarlattuanik meeqqanut ulloq unnuarlu angerlarsimaffinnik nakkutilleeqqissaartoqartoq. Taamaattumik isumaqarpunga sukkaannarsuaq siunnerfinnik aalajangiisoqassanngitsoq. Matumanimi meeqqap pisariaqartitai tunngavigineqartariaqarput, Rachel Ingemann (D) naggasiivoq.
Meeqqanut, inuusuttunut ilaqutariinnullu Naalakkersusoq, Mads Pedersen (IA) oqaaseqartinniarlugu Sermitsiamit sulissutigaarput.
