RAL-imi pisortaaneq: Taamaattumik aqutsisut ikilisarpavut
Royal Arctic Linep ukiut marluk affarlu ingerlaneranni aqutsisut ikilisinniarlugit aalajangerneranut sipaarniuteqarneq pissutaanngilaq. Aqutsisut pisortaaneq Niels Clemensen siuttoralu maanna pingasuinnaapput.
Aqutsisuni sulisuusimasut assigiimmik akisussaaffeqartut taamaattumillu assigiimmik akissarsiaqartartut Royal Arctic Linemi pisortaaneq Niels Clemensen oqarpoq.
Assi: Royal Arctic Line
Namminersorlutik Oqartussat ingerlatseqatigiiffiutaata Royal Arctic Linep aqutsisui arfineq-marluugallarmata siulersuisuit aqutsisullu suleqatigiinnerat unammillernarsimavoq.
Verner Hammekenip aqutsinerata nalaani pisortat pingasuniit arfineq-marlunnut amerlineqarput, maannali pingasuinnaaqqilerput. Pisortaanerup saniatigut pisortap tullia Aviaja Lyberth Lennert aamma aningaasaqarnermut pisortaq Jørgen Aqe Møller.
Siulersuisut ikilinerat qanoq nassuiarneqarsinnaava?
- Siulersuisut aqutsisullu suleqatigiinnerat pitsaanerpaamiitinnissaa anguniarlugu, Niels Clemensen Sermitsiamut oqarpoq.
Pingaarnersiuineq
"Aqutsisut siunissami pingaarnersiuinissamut tunngatillugu allatut aaqqissuussaanissaat kissaatigineqarmat“ pissutaasoq itisilerlugu nassuiaatigaa.
Suliffeqarfissuarmi sulisoqarnermut pisortaq Bebiane Boye Hansen umiarsualerinermullu pisortaq Anders Bay Larsen juunip aallaqqaataani suliffimminnit soraarput maannalu aqutsisut ataanni sulisuullutik.
Aqutsisut ikilinissaannik aalajangerneq sipaarniarnermik aallaaveqarani aqutsisut siulersuisullu suleqatigiinnerisa pitsanngorsarneqarnissaanik siunertaqartoq pisortaaneq Niels Clemensen oqarpoq.
Bebiane Boye Hansenip Anders Bay Larsenillu ingerlatsinermut tunngatillugu assigiimmik akisussaaffeqarnerat pissutigalugu siornatigutut akissarsiaqartartut pisortaanerup ilanngullugu nassuiaatigaa.
Aqutsisut ikilineqaqqissanersut Niels Clemensen aperineqarami naatsunnguarmik akissuteqarpoq:
- Naamik.
Aqutsisut
Aqutsisut pingasut saniatigut aqutsisunut tullersortit maanna ukuupput:
- Bebiane Boye Hansen, suliffeqarfissarmi suliffeqarnermut pisortaq
- Anders Bay Lassen, umiarsualerinermut pisortaq
- Aputsiaq Lynge, ingerlatsinermut pisortaq
- John Aage Nielsen, tuniniaanermut pisortaq
- Gustav Fischer, qarasaasiaqarnermut pisortaq
