RAL ukiup affaani siullermi amigartooruteqartoq
Royal Arctic Linep ukiup affaani siullermi akileraarutit suli ilanngaatiginagit 56 millionit koruuninik amigartooruteqartoq, ukiup affaanut nalunaarusiami atuarneqarsinnaavoq.
Sanaartortukinnerulernera aalisarnerullu iluani ingerlatat apparnerat Royal Arctic Linep assartugassaasa ikilinerinut pissutaaqataapput.
Assi: Jesper Hansen
Namminersorlutik Oqartussat umiarsuaatileqatigiiffiat Royal Arctic Line 2025-mi ukiup affaani siullermi amigartooruteqarpoq, ukiumullu tamarmut naatsorsuutit appartinneqarlutik.
56 millionit koruuninik amigartooruteqarpoq. Amigartooruteqarnerugaluartoq 2024-mut sanilliullugu 11 millionit koruuninik pitsaanermik angusaqartoqarpoq.
Tamanna umiarsuaatileqatigiiffiup ukiup affaanut nalunaarusiaani atuarneqarsinnaavoq. Inuiaqatigiinni suliat ikinnerulernerat ingerlatseqatigiiffimmut ajortumik sunniuteqartoq aamma paasissutissiissutigineqarpoq. Ukiup affaani siullermi kaaviiartitat ikileriarput, siornalu 532 mio. koruuniusimasut aamma 497 mio. koruunit kaaviiaartinneqarlutik.
- Sanaartornermillu aamma illuliortiternermik suliniutit annertunerusut arlallit naammassinerisa kingorna aalisarnerullu iluani ingerlatat apparnerisa sunniutaat, ingerlatseqatigiiffiup assartortagaata annertussusaatigut aningaasatigullu isertitaatigut maanna erseqqissumik malugineqarsinnaavoq, Royal Arctic Line allappoq.
Sipaarniuteqarnissaq naatsorsuutigineqanngitsoq
2025-mi ukiup affaani siullermi assartukkat 2024-mut sanilliullugit 6 procentingajannik ikileriarput:
- Appariaateqarnermi peqqutaasoq annerpaaq
Nunatta iluani assartuinermit pivoq, tassani
appariaat 2024-mut sanilliullugu 17 %-iummat.
Tamanna Nuuk Imerup 2024-p aallartilaarnerani matuneranit peqquteqarpoq, Royal Arctic Linep ukiup affaani nalunaarusiaani allaqqavoq.
Assartukkat ikinnerugaluartut angalanissamut pilersaarutit attatiinnarneqarnissaat atuisartunut pingaaruteqartoq ingerlatseqatigiiffimmi aqutsisoqatigiit ukiup affaanut nalunaarusiami allapput:
- Piffissarlu qanittoq isigalugu suliatigut
ingerlatatsinnut atatillugu annertunerusumik
sipaarniuteqarnissaq naleqquttuunavianngilaq.
- Assartugassat ikilinerat taamatut ingerlaannassagaluarpat umiarsuit useqarsinnaanerisa
qanoq atorluarneqarnerusinnaanerat pillugu
piginnittut atuisullu oqaloqatigineqartariaqassapput, ukiup affaanut nalunaarummi allassimavoq.
Arctic Umiaq Linep amigartoorutissat ikinnerulersikkai
Arctic Umiaq Linemit ingerlanneqartup sinersortaatip Sarfaq Ittuup, 2024 sioqqullugu angalasarfiginikuusami angalaffigeqqilermagit, ilaasuisa amerlinerannik kinguneqartoq, aamma eqqaaneqarpoq.
Sulili amigartooruteqarfiulluni:
- 2025-mi ukiup naanerani naatsorsuutigineqarpoq 8 millionit DKK-nik amigartooruteqartoqassasoq. Tamannali 2024-mut sanilliullugu 5
millionit DKK-nik pitsanngoriaateqarfiussaaq, Royal Arctic Linemit Arctic Umiaq Linemut naatsorsuutigineqartut pillugit allapput.
Royal Arctic Linep suliffeqarfissua tamakkerlugu 2025-mi akileraarutit suli ilanngaatiginagit 15-25 millionit koruunit akornanni sinneqartoornissamik naatsorsuutit, 1-10 millionit koruunit akornanni sinneqartoornissamik naatsorsuutinut appartinneqarput.
