KL

DK

Republikaneri Kalaallit Nunaat pillugu siunnersuuteqartoq: Trumpi pingajussaa præsidentiusinnaasariaqarpoq

Politikeri republikanerineersup Andy Oglesip, Donald Trumpip pingajussaa præsidentitut qinigaaqqissinnaanera siunnersuutigaa.

Andy Ogles oqartussaasuuppat, Donald Trump pingajussaa præsidentitut qinigaaqqissinnaanermut periarfissaqassaaq.
Thomas Munk Veirum
Tusagassiortoq
Saqqummersinneqarpoq

Politikeri Republikanerineersoq Repræsentanternes Husimilu ilaasortaq Andy Ogles Trumpip qanittumik iliatut taaneqartarpoq.

Politikeri taanna piffissami qaninnermi Trumpip Kalaallit Nunaannut soqutiginninnerani qitiusumik inissisimavoq, taannami inatsisissatut siunnersuummik, Donald Trumpip Kalaallit Nunaannik pisinissaanut Kunngeqarfimmik Danmarkimik piginnaatitsinissamik siunertaqartumik saqqummiussisuuvoq.

Sisamanngormat Andy Oglesip siunnersuut aalassatsitsisoq saqqummiuppaa, tassani Donald Trumpip præsidentitut pingajussaa qinigassanngorteqqissinnaanissaa qularnaarniarneqarpoq.

Fox News naapertorlugu USA-mi amerlanerpaamik qinigaaffinni marlunni præsidentiusinnaatitaaneq, Franklin Delano Rooseveltip 1944-mi sisamassaa præsidentitut qinigaaqqinnerata kingorna qisuariaatitut Kongressip 1947-mi aalajangerpaa. Franklin Delano Roosevelt ukiup tulliani toquvoq.

Maanna Andy Oglesip tunngaviusumik inatsit allanngortinnialerpaa, Donald Trumpillu pingajussaa præsidentinngorsinnaanera aqqutissiuunnialerlugu:

- Oqaluttuarisaanitsinni muteerniusumi kisiartaalluni naalagaaffitta nakkariartornera killup tungaanut saatissinnaagaa, Amerikalu pissarsuanngorteqqillugu paasinarsivoq, anguniakkallu taassuma angusinnaaneranut naammattumik piffissaqassaaq, Andy Ogles tusagassiuutinut nalunaarummini allappoq.

Ogles Kalaallit Nunaat pillugu: avammut anillariarfitsinniippoq

Politikerip Kalaallit Nunaanut siunnersuutaanut tunngatillugu, siunnersuut maanna Repræsentanternes Husimi ilaasortanit katillugit 435-nik amerlassusilinni 16-nik tapersersorneqarpoq. Republikanerit 219-nik ilaasortaatitaqarnermikkut amerlanerussuteqarput.

Siunnersuut Make Greenland Great Againimik taaguuteqarpoq, Donald Trumpillu Kalaallit Nunaannik nakkutilliinissamik piginnittuunissamillu isummaminik saqqummiussinerata kinguninngua, Andy Olgesimit saqqummiunneqarpoq.

Sapaatip akunnerani uani siusinnerusumi Andy Ogles Fox Newsimi apersorneqarpoq, tassanilu ilaatigut Kalaallit Nunaata tigunissaa inuit ilaannut “silanngajaalaartutut” nipeqarsinnaasoq, USA-lli Kalaallit Nunaat ukiut 100-t sinnerlugit uukkatarigaa, taanna ilaatigut oqarpoq.

Taassuma isumaa malillugu Kalaallit Nunaannik tigusineq Kinamut Ruslandimullu, Issittumi sakkortuumik aallussisunut, eqqortumik qisuariarneruvoq:

- Qiviaraanni pisuussutinik nalitoorsuarnik peqarpoq, Ruslandillu Kinallu Issittumi ingerlataasa annertusiartorneri takugaanni, umiarsuillu angalaarneruleriartornerat takugaanni, USA-p tamatuma silatinnguatsinniinnera erseqqissaatigissallugu pingaaruteqarpoq.

- Tamanna uagut ingerlatsivigaarput tamaanilu uagut qaasuttuni aqutsisuullutaluunniit politiiusugut toqqaannartumik oqartoqarsinnaavoq, Kinallu akineqarnissaa nammineerlu piffiannut utertinneqarnissaat pingaaruteqarpoq.

grønland fox news donald trump andy ogles inuiaqatigiit repræsentanternes hus samfund

ATORFIIT Se alle jobs

Powered by Labrador CMS