Rigshospitalimik suleqateqarnissamik isumaqatigiissut atsiorneqartoq
Rigshospitalimik suleqateqarnissamik isumaqatigiissummi nutaammi napparsimasut tamarmik nutaaliaasunik tarrarsorneqarlutik misissorneqarsinnaanngornissaat qulakkeerneqarpoq.
Kalaallit Nunaanni peqqinnissaqarfimmi pisortaq Tina Amondsen, radiologiiuneq Johnny Madelung aamma nakorsaaneq Martin Lundsgaard (saamianiit talerpimmut) Kalaallit Nunaata Rigshospitalillu suleqatigiinnissamut isumaqatigiissutaat atsiorpaat.
Assi: Rigshospitalet
Peqqinnissaqarfiup Rigshospitalillu isumaqatigiissummi nutaami tarrarsuilluni nappaatinik suussusersiniarluni misissueqqissaartarnermi suleqatigiinnerat annertusineqarpoq.
Peqqinnissaqarfimmi pisortaq Tina Amondsen isumaqatigiissut atsiorniarlugu Danmarkimiippoq, isumaqatigiissullu taanna isumalluarfigalugu:
- Rigshospitalimi tarrarsuisarfiup immikkoortortaqarfianik suleqateqarnitta pitsanngortinnissaa siunertaralugu nutaamik isumaqatigiissuteqarnerput Kalaallit Nunaanni peqqinnissaqarfimmi nuannaarutigaarput.
- MR-skannererput nutaaq aamma RIS/PACS-systemi Kirsten aamma Freddy Johansenip aningaasaateqarfianit tunissutaasut, ungasianiit nakorsiartitsinermut iluaqutaasut nutaanik periarfissaqalersitsivoq, Tina Amondsen Rigshospitalimiit tusagaassiutinut nalunaarummi oqarpoq.
Nakorsat immikkut ilisimasallit killeqarneranni iluaqutit
Kalaallit Nunaanni nakorsat immikkut ilisimasallit amerlassusaat killeqarmata suleqatigiinneq iluaqutaavoq. Taamaalilluni napparsimasut amerlanerusut immikkut ilisimasalinnik katsorsarneqarnissaannut iluaqutaammat – ilaatigut tarrarsorneqarnikkut misissorneqaqqissaarneq, Rigshospitalip tarrarsuisarfiani skannerisarfianilu nakorsaaneq Martin Lundsgaard oqarpoq:
- Kalaallit Nunaanni peqqinnissaqarfik nunami annertoorsuarmi inuillu siammarsissumi najugaqarfigisaanni sullissivoq, tamannalu inuit sumiiffii eqqarsaatigalugit sulisoqarniarnikkullu qaqutigoortunik unammilligassanik malitseqarpoq.
- Nappaat suussusersiniarniarlugu misissorneqarsinnaanerup assigiimmik periarfissaanissaa qulakkeerniarlugu, Kalaallit Nunaanni peqqinnissaqarfik Rigshospitalilu MR-imik skannerisinnaanerup sulisoqarniarnikkullu aaqqissuutissanik ukiorpassuarni suleqatigiissutigaat, oqarpoq.
Sinerissami atortorissaarutit pisoqqat taarserneqarnissaat pilersaarutaasoq
Suleqatigiinneq teknikkimut, atortutigut, sulisoqarnikkut pisariaqartitat aamma najukkamilu ilinniartitsinermut imaqaproq. Sumiiffinni peqqinnissaqarfimmi sulisut ilaatigut ultralydimik atorlugu misissuisinnaanngorlugit ilinniartinneqarnerisigut.
Atortorissaarutit pisoqaavallaartut nutarterneqarnissaat Rigshospitalimi radiologimi pisortap Johnny Madelungip qilanaaraa:
- Kalaallit Nunaanni sinerissami atortorissaarutit pisoqqat, amerlanersaat ukiut 40-t sinnerlugit pisoqaassusillit, taarserneqarnissaat sivisuumik kissaatigineqarsimavoq, taamaalilluni napparsimasumut qanittumi pitsaasumik misissorneqarsinnaanngorniassammata.
- Atortut assigiilernerisigut sulisut ataatsimut ilinniartinneqarsinnaapput, aamma atortut qanoq atorneqassanersut ungasianiit ilitsersuutigineqarsinnaallutik, Johnny Madelung oqarpoq.
