Royal Arctic Linep assartuinermi akitsuutit appartippai
Uuliap akiata aningaasallu nalingata pitsaasumik ineriartornera Royal Arctic Linep assartuinermi akikinnerusumik akiliisitsisarnissaanut periarfissiivoq.
Assi: Jesper Hansen
Uuliamut aningaasallu nalinginut tapiliuttagaq novembarip aallaqqaataanit 3 procentimik appartinneqassaaq, taamaalillunilu 8 procentiulissaaq, Royal Arctic Line ilisimatitsivoq.
- Uuliamut aningaasallu nalinginut tapiliuttagaq Royal Arctic Linep iluanaaruteqarfigineq ajorpaa, uuliamut akit aningaasallu nalingisa allanngoriartornerisa sunniutaannut ingerlatseqatigiiffik qajannaarsarniarlugu tapiliuttagaq atortarpoq, umiarsuaatileqatigiiffik naqissusiivoq.
CO2-mut akitsuut aamma appartinneqarpoq
CO2-mut akitsuut, ETS-imut tapiliussaq, aamma 1,54 procentimit 1,38 procentimut appartinneqarpoq. Akitsuut EU-mut akilerneqartarpoq, EU-milu talittarfinni atuulluni.
- Ineriartorneq malittareqqissaarparput decembarip aallaqqaataani 2024-mi qanoq nalimmassaasoqassanersoq novemberip ingerlanerani nalilersuiffigineqassalluni, namminersorlutik oqartussat ingerlatseqatigiiffiutaata nittartagaani ilisimatitsissutaavoq.
