Norskit umiarsuaatileqatigiiffiata Maniitsoq AS-ip, piginnittoq Bengt Are Korneliussen siuttoralugu, saattuarniarsinnaanermut akuersissummik nutaamik Norgemi naalagaaffiup itigartitsinera pillugu aamma umiarsuarmut ”Arctic Opilio”-mut inuussutissarsiutigalugu aalisarsinnaanermut akuersissummik atorunnaarsitsisimanera pillugu eqqartuussivimmut suliassanngortippaa.
Kenneth Mikkelsen Norgemi aalisarnermut inatsisilerituut ilisimaneqarnerpaat misilittagaqarnerpaallu ilagaat.
Norskit umiarsuaatileqatigiiffiata Maniitsoq AS-ip, piginnittoq Bengt Are Korneliussen siuttoralugu, saattuarniarsinnaanermut akuersissummik nutaamik Norgemi naalagaaffiup itigartitsinera pillugu aamma umiarsuarmut ”Arctic Opilio”-mut inuussutissarsiutigalugu aalisarsinnaanermut akuersissummik atorunnaarsitsisimanera pillugu eqqartuussivimmut suliassanngortippaa.
Kenneth Mikkelsen Norgemi aalisarnermut inatsisilerituut ilisimaneqarnerpaat misilittagaqarnerpaallu ilagaat.
Taamaalilluni Norgemi Royal Greenlandip suleqataa Bengt Are Korneliussen eqqartuussissuserisuni Kenneth Mikkelsen aqqutigalugu Tromsømi eqqartuussivimmut suliassanngortitsivoq.
Maniitsup Norgemi naalagaaffik eqqartuussivimmut suliassanngortippaa 196 millionit norskit koruuniinik, tassa 125 millionit danskisut koruuninik, taarseeqqullugu.
Aalisarnermut pisortaqarfiup, naalakkersuisoqarfiup ataani oqartussaasuusoq, Royal Greenland Maniitsumik piginnittuusoq siornatigut nalileroaa. Inuussutissarsiutigalugu aalisarsinnaanermut akuersissut taamaattumik utertinneqarpoq, akuersissuteqarnissamut aalisarsinnaanermut inatsisit naammassineqanngimmata.
Inatsisit naapertorlugit aalisariutit 60 procentii sinnerlugit Norgemiunit pigineqartariaqarput.
Inuussutissarsiornermut Aalisarnermut Naalakkersuisoqarfiup Maniitsoq AS-ip saatuarniarsinnaanermut akuersissummik nutaamik qinnuteqaataa itigartippaa, umiarsuullu Arctic Opiliop inuussutissarsiutigalugu aalisarsinnaanermut akuersissutaanik aamma atorunnaarsitsilluni. Tamanna umiarsuaatileqatigiiffiup aalisarnermut naalakkersuisoqarfimmit aalajangiineq naammagittaalliuutigereeraalu pivoq.
Royal Greenlandip ingerlatsineq aningaasaliiffigaa
Maniitsup inuussutissarsiutigalugu allagartamik nutaamik qinnuteqaataa naalakkersuisoqarfimmit itigartinneqartoq Sermitsiap atuarpaa.
"Naalakkersuisoqarfiup suliami matumani nunap allap ingerlatseqatigiiffiutaa, Royal Greenland A/S qallunaat pigisaat, aalisarnermik ingerlatsinissamut piumasaqaatinik naammassinninngitsoq, toqqaannanngitsumik umiarsuarmut Arctic Opiliomut aningaasaliillunilu ingerlatseqatigiiffimmik Maniitsumik ingerlatisuusoq aalajangiinerminut tunngavigaa“ aalajangiinermi ilaatigut allassimavoq.
Allatut oqaatigalugu umiarsuaatileqatigiiffiup aalisarnermut naalakkersuisoqarfimmit akuersissummik tunineqartigani umiarsuaq inuussutissarsiutigalugu aalisarnermut atorneqassanngilaq.
Maniitsoq ukiorpaalunni Arctic Opilio atorlugu Barentip imartaani saatuarniarnissamik akuersissuteqarpoq, ukiormannali taamaaliortoqarsinnaajunnaarpoq. Pisat tamarmik umiarsuaatileqatigiiffimmiit Royal Greenland A/S-imut aamma tunineqartarput.
Immikkoortortaqarfik: - Umiarsuaatileqatigiiffik piginnittuuvoq
Naalakkersuisoqarfiup paasissutissaatai naapertorlugit ingerlatseqatigiiffiup Maniitsup umiarsuarmi Arctic Opiliomimik piginneqataassutsit tamakkiisumik pigivai, Bengt Are Korneliussenilu ingerlatseqatigiiffimmi Maniitsumik piginneqataassutit tamakkiisut pigalugit. Naalakkersuisoqarfiup naliliinera naapertorlugu Royal Greenlandip suliffeqarfimmi Maniitsumi aningaasaqarnikkut inissisimaffia pissutigalugu umiarsuaq inuussutissarsiutigalugu aalisarsinnaanermut akuersissummik maannakkorpiaq tunineqarsinnaanngilaq.
Naalakkersuisoqarfiup tunngavilersuutit nutaat ingerlatseqatigiiffiup oqaaseqarfiginissaanut periarfissaqarfigisimanngimmagit saattuarniarnissamik akuersissutip itigartinneqarsimanera inuussutissarsiutigalugulu aalisarnissamut akuersissutip atorunnaarsinneqarsimanera atuutinngitsut umiarsuaatileqatigiiffik isumaqarpoq.
Royal Greenland: - Aalajangiinissaq utaqqivarput
Suliaq eqqortumik suliarineqarsimanngitsoq umiarsuaatileqatigiiffik aamma isumaqarpoq. Naalakkersuisoqarfiup aalajangiinera atorunnaarsinneqarnissasoq saattuarniarsinnaaleqqinnissarlu aallarteqqinneqassasoq Maaniitsup kissaatigaa.
Maniitsoq eqqartuussivimmi taperserneqassasoq, taamaalillunilu suliffeqarfissuup saattuanik tunisassiortoq Bengt Are Korneliussen suli pisiffigisinnaaniassammagu Royal Greenlandip neriuutigaa.
- Suliami aalajangiisoqarnissaa utaqqivarput, soorunami neriuutigalugu suleqaterput Maniitsoq AS naalakkersuisoqarfiup aalajangiinerata atorunnaarsinneqarnissaanik piumasaqarnera taperserneqassasoq, taamaalilluta Norgemi saattuanik pisisarsinnaaniassagatta.
- Royal Greenland Maniitsoq AS-imi piginneqataanngilaq, ingerlatseqatigiiffiup ulluinnarni ingerlatsineranut akuliunneq ajorluni, Norgemilu inatsisinik tamakkiisumik malinninngitsumik akuliunniarluta pilersaaruteqarsimanngisaannarluta, Royal Greenlandimi attaveqaqatigiinnermut pisortaq Merete Lindstrøm Sermitsiamut oqarpoq.
