NAALAGAAFFIUP ISERTORTUMIK PAASINIAASARTUI
Ruslandi Issittumi aporaannerulersinnaanissamut tunuarsimaanngitsoq
Issittumi isumannaallisaanikkut pissutsit ilungersunarnerulerput, Ruslandilu maanna Issittumi sukannernerusumik periaaseqarnissamut tunuarsimaannginnerulerpoq, Naalagaaffiup isertortumik paasiniaasartui nalunaarusiami nutaami taama naliliipput.
Sillimaniarnermut politikkimut tunngatillugu isumaqatigiinngissutit Issittumut anngupput, nunallu tamalaat Ruslandi præsident Vladimir Putin (assimiittoq) siuttoralugu suleqatigerusuppallaanngilaat, Naalagaaffiup isertortumik paasiniaasartuisa ukiumoortumik nalunaarusiaminni UDSYN-imi naliliipput.
Assiliisoq: Sergey Bobylev/Reuters/Ritzau Scanpix
Issittumi isumannaallisaanikkut pissutsit ilungersunarnerulersimapput, Naalagaaffiup isertortumik paasiniaasartui Ruslandimi pisunik nunallu Issittumut soqutiginninnera pillugu nalunaarusiami nutaami naliliipput.
Pissutsit ajornerulerput, Ruslandimi nunat tamalaat suleqatigiinnerannit amerlanerusunit ilaajunnaarnikuuvoq, naliliineq taama nipeqarpoq:
-..Ruslandip nunat tamalaat akornanni suleqataanera killeqartorujussuuvoq, taamaattumillu Ruslandi Issittumi sukannernerusumik iliuuseqarnissaminut tunuarsimaannginnerulerluni, Naalagaaffiup isertortumik paasiniaasartui nalunaarusiami UDSYN-imi saqqummersinneqaqqammersumi allapput.
Taamaakkaluartoq Ruslandip Issittumi eqqissisimasumik sakkulersorfiunngitsumillu pisariaqartoqarnera eqqartortuassagaa nalunaarusiami nalilerneqarpoq:
- Nunat killiit Issittumi avatangiisinut inunnullu ajoqusiisinnaasunik suleqataajumannginnerat isornartorsiorsinnaajumallugu Ruslandip taamaaliortarneranut pissutaavoq, nalunaarusiami allassimavoq.
Issittumi sakkutooqarnermik nutarterillunilu ineriartortitsineq
Issittup isumannaallisaanikkut politikkikkullu aporaaffiunnginnera Ruslandip soqutigisaanut maannamut iluaqutaanerpaasimavoq.
‘UDSYN’ PILLUGU PAASISAT
Naalagaaffiup isertortumik paasiniaasartuisa Udsyn ima allaatigaat:
- UDSYN-imi nunanit allanit aarlerinartut Danmarkillu isumannaallisaanikkut unammilligassai allaaserisarparput.
UDSYN Naalagaaffiup isertortumik paasiniaasartuisa ukiumoortumik Danmarkimi sillimaniarnermut politikki pillugu oqallinnermut ilannguttagaraa. Taamaattumik innuttaasunut soqutiginnittunut, politikkerinut, tusagassiortunut ilisimatusartunullu allagaavoq.
Tamanna Ruslandip nunami tamatumani eqqissilluni sakkutooqarnermik ineriartortitsinissamut periarfissaqarneranik kinguneqarpoq, tamatumalu saniatigut Rusland nunanit allanit aningaasaliiffigineqarnissamik periarfissaqarsimavoq aamma uuliamik, gassimik aatsitassanillu piiaanissamut ilisimasanik pissarsisinnaasimalluni.
Naalagaaffiup isertortumik paasiniaasartui naapertorlugit Ruslandip Issittumi pissutsit pillugit nunat kiilliini avannarpasinnerusumiittuni avissaartuutitsinissaq anguniarlugu suli iliuuseqartuassaaq. Tamannalu Ruslandip nunani killerni avissaartuutsitsiniarneranut ilaavoq.
Rusland Issittumi Siunnersuisoqatigiinni ilaasortaaginnassagunartoq
Ruslandilli Issittumi Siunnersuisoqatigiinnit aniniarluni sioorasaarinini piviusunngortissagaa Naalagaaffiup isertortumik paasiniaasartuisa ilimaginngilaat:
- Tamatumunnga pissutaavoq Issittumi Siunnersuisoqatigiinni isumaqatigiinnikkut sulisoqartarnera, taamaammallu Ruslandip issittumi sammineqartunut sunniuteqarsinnaanera qulakkeerneqartarmat naak ilaasortat allat NATO-mut ilaasortaagaluartut. Taamaattumik Ruslandip Issittumi Siunnersuisoqatigiit suli pingaaruteqartutut isigai, paasiniaasartut UDSYN-imi allapput.
Ruslandili Issittumi Siunnersuisoqatigiinnit anissagaluaruni unammillertissamik suleqatigiinnermik pilersitsiniarsarissasoq qularnanngilaq, tassani naalagaaffiit issittumiimiinngitsut Ruslandimut ikinngutaasut imaluunniit nuna pillugu isummersimanngitsut ilaasortariniarsinnaallugit, Naalagaaffiup isertortumik paasiniaasartui naliliipput.
- Naalagaaffiit issittumiinngitsut, ingammik Kina, Issittumi aningaasaqarnikkut soqutigisaqarluartoq Issittumi ineriartornermut sunniuteqarnissamut periarfissaqalersinnaapput.
Nalunaarusiaq tamaat paasiniaasartut nittartagaanni atuarneqarsinnaavoq.
