Sakkutuut timmisartortartut Rømø-mi Hercules-imik mittarfiunngitsuni minnissaminnut sungiusassapput

Sakkutuut timmisartortartut ilaat sapaatip akunnerata tulliani miffissanut asfaltitaqanngitsunut minnissaminnut sungiusassapput.

Sungiusarneq pissaaq Lakolk Strandimi Rømømi aggustip 12-ianiit 14-iata tungaanut.

Taama allappoq Air Transport Wing, Illersornissaqarfiup silaannakkut angallassinermut suliaani akisussaasuusoq, Facebookimi quppernermini.

Sakkutuut timmisartortartut timmisartuutiminnik assartuummik Herkules-imik taamaalillutik Rømø-p sissaani mittaqattaassapput. Sungiusarneq aqqutigalugu inuttat misilittagaqalissapput miffissani assigiinngitsuni missinnaanissaminnut.

Taamaaliornissaq ilaatigut Issittumi imaluunniit sumiiffinni sequmissimasunik mittarfilinni imaluunniit aamma mittarfinni pitsaanngitsuni, Air Transport Wing allappoq.

Issittup illersorneqarnissaa politikkikkut annertuumik soqutigineqalerpoq ukiuni kingulliunerusuni. Maani (Danmarkimi, aaqq.) tamanna aamma pissuteqarpoq USA-p præsidentia, Donald Trump, Kalaallit Nunaata USA-mut ilanngunneqarnissaanik siorasaaruteqarmat.

Danskit naalakkersuisuisui partiillu illersornissaq pillugu isumaqatigiissummut peqataasut januaarip naanerani Issittumi aamma Atlantikup Avannaani illersornissaq pillugu isumaqatigiissummik saqqummiussipput.

Danmarkip Nato-mi suleqatigisai nunat arlallit aamma Rømømi sungiusarnermi peqataassapput, taamatullu suleqatigiinneq nukittorsarneqassaaq, Air Transport Wing allappoq.

- Qanimut suleqativut misilittakkanik pingaarutilinnik avitseqatigisarpagut ataatsimoortumillu sungiusarnerni peqatigisarpavut, taamaaliornikkut aamma Nato-mi suleqatigiinneq nukittorsartarparput, sungiusarnissamik saqqummiisut allapput.

Sungiusarnerup nalaani Lakolk Strand-ip ilarujussua matoqqatinneqassaaq taamaammat tamanit orninneqarsinnaanani.

Taamaakkaluartoq mittarnerit ungasissumit isiginnaarneqarsinnaapput.

- Sakkutuut timmisartortartuniit taamaattumik soqutiginnittunut kaammattuutigineqarpoq assiaqusersukkat ataqqineqassasut orniguttunillu ilitsersuutit malinneqassasut, isumannaallisaanermik suliaqartunit sissamut inissinneqarsimasut tunngavigalugit, Air Transport Wing allappoq.

Sullissinermut akisussaasuunerup saniatigut Air Transport Wing aamma silaannakkut nakkutiginnittarnermik ingerlatsisarpoq ulluinnarnilu Flyvestation Aalborg ingerlallugu.