Sarfannguani timersortarfittaassaq nappaanersiorneqarpoq

Sarfannguani innuttaasut tallimanngormat maajip ulluisa qulingani nalliuttorsiorput.

Qeqqata Kommuniani borgmesteri, Malik Berthelsen kommunimilu sulisut sanasullu Sarfannguani timersortarfittaassap kissaatigineqaqisup nappaanersiorneqarnerni nunaqarfimmut nalliuttorsioriaqataallutik tikeraarput.

Nappaanersiorneq ualikkut nalunaaqutaq ataatsinut pimmat nunaqarfimmi aqutsisut siulittaasuat, Anda Berthelsen oqalugiarpoq. Taassuma timersortarfittaassaq nuannaarutigaa, ilanngullugulu oqaatigalugu qangali nunaqarfimmiuniit kissaataasimaqisoq, neriuutigalugulu atorluarneqarumaartoq.

Oqaluttuassartaa

Qeqqata Kommuniani kommunalbestyrelsi 2017-imi aalajangerpoq kommunimi nunaqarfiit minnerit pingasut timersortarfittaarnissaat piareersarneqarlunilu suliniutigineqassasoq. Tamakkulu pereermata isumaqatigiissut atsiorneqareerluni sanaartorneq aallartippoq.

Sanaartortut akiliisinnaajunnaarnerat peqqutaalluni sanaartorneq unitsikkallarneqarpoq. Kingornalu sanaartorlugu aallarteqqinneqarpoq nappaanersiorneqarsinnaanngorlunilu.

Kaffillerneq

Sarfannguani silagissuugaa pølsit, qaqortuliat, kaffi, tii, kaagillu nappaanersiornermi nalliuttorsoqataasunut pilliutigineqarput.

Qeqqata Kommuniani Teknikkikkut ataatsimiititaliami siulittaasoq, Nivi Heilmann Efraimsen oqalugiarpoq, ilaatigut oqaatigalugu neriuutigalugu nunaqarfimmiut timersortarfik atorluarumaaraat. Neriuutigalugulu Qeqqata Kommuniani timersornikkut siuarsarneqarumaartoq. Aamma Sarfannguani taamaalluni pissartanngorniuttoqarumaartoq neriuutigalugu. Qeqqata Kommuniata anguniagaraa nunarsuarmi kommunini timikkut aalatitsinerpaanngornissani, tassunga aamma timersortarfittaaq tapertaajumaartoq neriuutiginerarpaa.