Sermitsiaq.gl-ip Facebookimi ikkussanut oqaaseqarfissaq atorunnaarsippaa
Tusagassiorfimmi Sermitsiami Facebookimi quppernitsinni oqaaseqarfiusinnaasoq atorunnaarsissallugu aalajangerpugut. Uumissuinerit, nikaginninnerit, ammip qalipaataa aallaavigalugu isummersornerit assigisaallu maannakkut aqunneqarsinnaanngitsumik pipput inuiaqatigiinnilu oqallinnermut iluaqutaajunnaarsimallutik.
Assi: Leiff Josefsen
- Ajoraluartumik ammip qalipaataa aallaavigalugu
nikassaanermik ajuallatsitsiniaanermillu isummersortut amerlasuut takusarpagut,
ilaannikkullu tusagassiuutini allaaserisatta qitornaat qinngasaarneqartut
naammattoortarlutigit. Tamanna inuiaqatigiinni oqallinnermi
akuersaarneqarsinnaanngilaq, Sermitsiami pisortaq Masaana Egede oqarpoq.
Nunami tusagassiuutini pitsaanerpaajunissarput
tatiginartuunissarpullu anguniartuaannarparput, taamaattumillu oqallinnerit
ineriartuutaasinnaasumik ataqqeqatigiinnermillu aallaaveqarnissaat
akisussaaffittut isigalugu.
Ajoraluartumik oqaaseqarfiusinnaasut aqqutigalugit
oqallinneq iluaqutaanngitsoq, akerleriilersitsisoq inuiaqatigiinnilu
avissaartuuffiusoq annertusigaluttuinnartoq maluginiarparput.
- Ajoraluartumik kisimiinngilagut, nunarsuarmilu
tamarmi tusagassiuutit inuit attaveqaqatigiittarfiini oqaaseqarfiusinnaasut
aqunneqarsinnaanngitsut nutaarsiassanillu eqqunngitsunik siammarteriffiusut
aqunniarsarigaluaraat takusarpavut. Tamannali iluatsittuaannarani, Masaana
Egede oqarpoq.
2025-mi qinersisoqarnissaa qalliartortillugu
oqallinnermi piumasaqaatinik aalajangersimasunik atuutsitsinissaq aatsaat taama
pingaaruteqartigaaq. Qineqqusaarnermi politikkikkut apeqqutit isumallu
pingaarutillit sammineqartariaqarput, uumissuinerit nikassaanerillu pinnatik.
Tusagassiorfiup oqallinneq ataqqinninnermik paasinninnermillu tunngaveqartoq
tapersersorusuppaa, taamaattumillu oqaaseqarfiusinnaasoq ajoqusiisinnaasunik
innarliisinnaasunillu siammarteriffiunnginnissaa anguniarlugu taama
iliuuseqartoqartariaqarluni.
- Tusagassiortut aaqqissuisullu ilanngutassiat
atuartartullu allagaasa inuiaqatigiinni oqallinnermut attuumassuteqarnerat
qulakkeerniarlugu aaqqissorsinnaajuarnikuuaat, ullumikkulli inuit
attaveqaqatigiittarfii aqqutigalugit kikkut tamarmik qanorluunniit
oqaaseqarsinnaapput. Naak tamat oqartussaaqataanissaat siunertaallunilu
periarfissiissutaagaluartoq siunertarineqartup illuatungerluinnaanik
kinguneqarluni tamat oqartussaaqataanerannut unammilligassaqalersitsivoq,
Masaana Egede oqarpoq.
Oqalliffiusinnaasuni ataqqinninnermik
ineriartuutaasinnaasumillu tunngaveqartumik oqallittoqarnissaa tamanut
kajumissaarutigaarput. Nunami naleqartitat siuarsarusutagut aallaavigalugit
qineqqusaartoqarnissaa qilanaaraarput.
Inussiarnersumik,
Tusagassiorfik Sermitsiaq
