KL

DK

TRUMPIP NALUNAARUTEQAQQINNERATA KINGORNA

SIK namminiilivinnissaq pillugu: Uninngatinneqarallarli!

Nunatsinni sulisartut kattuffiata SIK-p siulittaasua Trump-ip pilersaarutai "Kalaallit Nunaat pigalugu aqussallugu" pillugit ernumavoq. Taassuma nunatsinni politikerit kaammattorpai piviusorsioqqullugit aammalu nunarput inuilu toqqissisimanarnerpaamik tunngavisseqqullugit, tassalu nammineq isummani malillugu qanimut Danmarkimik suleqateqarneq aqqutissiuunneqartariaqartoq, namminiilivinnissamik takorluugaqarneq aqqutissiuuussiniarnerlu unitsikkallarlugu, Danmarkimik EU-millu qaninnerusumik suleqatigiinnissaq siunertaralugu sulissutiginnikkasuartoqassasoq. 

- Pissutsit killiffianni politikerigut namminiilivinnissamut nukinnik atuisariaqanngikkallarput, tamannami illersorneqarsinnaanngilaq, illuatungaani USA-p nunarput tigussappagu pissutsit takkukkumaartussat aarlerinarluinnarmata, tassami tassunga killittoqassappat nunarput sukkasoorujussuarmik annaassavarput, Jess G. Berthelsen oqarpoq.
Jensine Berthelsen
TUSAGASSIORTOQ
Saqqummersinneqarpoq

- Assorujussuaq ernumanarpoq amerikami præsidentinngortup nunarput niuernermi tunisassiaannartut isigimmagu, qularinngilaralu nangittumik kimigiiserfigissagaatigut, tassami takusimavaa sanngiiffik Kalaallit Nunaata Danmarkillu akornanni suunersoq. 

- Maanna politikerit tamarmik nunarput minnerunngitsumillu innuttaasut illersorniarlugit sulissutiginnittariaqarput, tamannalu pisariaqarpoq Danmarkimik suli qaninnerusumik suleqatigiinnikkut, ataqqeqatigiinnermik tatigeqatigiinnermillu aallaavilimmik!

Taamak ersaritsigisumik oqarpoq nunatta namminersulivinnissaanik tapersersuisut annersaasa ilaat, SIK-p siulittaasua, Jess G. Berthelsen.

- Aap! Namminersulivinnissarput kissaatigaarput, kisianni maanna piviusorsiornerusariaqarpugut paasillugulu minnerpaamilluunniit periarfissaqanngitsugut takorluukkatsinnik angusaqarnissatsinnut, maannakkummi USA-mit sakkortuumik kimigiiserfigineqaratta. 

- Maanna politikerit akisussaaffimminnik tigusisariaqarput namminersulivinnissamillu oqalunneq pilersaarnerlu unitsikkallartariaqarpaat, tamannami killiffitsinni illersorneqarsinnaanngilaq, USA-p nunatsinnik piginnilerneratigut aqutsilerneratigullu kingunissaasut assorujussuaq ernumanarluinnarmata.

"Aporaassutaasut isumaqatigiinngissutaasullu akimmiffiliunnagit!"

Jess G. Berthelsen ilanngullugu kaammattuuteqarpoq Kalaallit Nunaat ataatsimik nipilimmik oqaluttariaqalersoq, aammalu inuit ataasiakkaat naalagaaffiup pissaanilissuup tungaanut qammaasutut pissusilersornerat unitsinniarneqartariaqartoq:

- Aap! Kiffaanngissuseqarpugut oqaaseqarsinnaanissatsinnut, kisianni tamanna aamma akisussaaffimmik tigusinissamik pisussaaffittaqarpoq! Illersorneqarsinnaanngilluinnarpoq akisussaassuseqanngitsuliorneruvorlu inuit ataasiakkaat pissusilersornermikkut soorlulusooq inuiaat kalaallit sinnerlugit USA-mut iluareqqusaartoqartoq! 

- Assersuutigiinnarlugu qaqortumik annoraalerluni  tikilluaqqusisoqartoq arajutsisimanngilarput, imatut paasineqarsinnaasumik Kalaallit Nunaata innuttai sinniisuutillugit taamaaliortoq! Maanna ersarissumik nalunaarutigisariaqarparput nunarput inuilu tuniniarneqarsinnaanngitsut!

SIK-ip siulittaasua ernumassuteqarnermini torluusikkanik ilaasortani sinnerlugit apeqqutitsinnik akiuvoq,  assut ernumanerarluni USA-p kimigiiserneratigut pissutsit sukkasuumik ineriartornerat pillugu annilaanngateqarluni:

- Inuit ataasiakkaat uppertitsiniaapput nunarput USA-mut ilanngukkaanni paratiisimiittutut inissisimasoqalissasoq. Tamanna ilumuunngilluinnarpoq! Nalunngilarput amerikamiut sulisartut kattuffii qanoq pineqartarnersut. Nalunngilarput sulisartut peqatigiiffianni ilaasortat qanoq pineqartarnersut. Nalunngilarput innuttaasut aningaasaqarnikkut annikilliortut qanoq pineqartarnersut. Piviusut takuneqartariaqarput Danmarkimullu tunngatillugu assortuussutillu qimallugit, Danmarkimik ataqqeqatigiinnermik tunngaveqartumik suleqatigiinnermut tunngavik nutaaq pilersinneqartariaqarpoq.

Jess G: EU peqatigalugu suleqatigiittoqarli

Tassunga atatillugu sulisartut siulittaasuat kissaateqarpoq Danmarkimi suliffeqarfiit siunissami SIK qaangiinnarnagu akissarsiat pillugit isumaqatiginninnartassasut, tamanna piumasaqaataavoq Danmarkimik suleqatigiinnerup nanginnissaanut atatillugu, isumaqarami Danmarkimi suliffeqarfiit sulisartut kattuffiat qaangiataaginnarlugu ingerlaannarsinnaanngitsut.

Naggataatigut Jess G. Berthelsen kaammattuivoq EU-mut sammisoqartariaqartoq, pingaartumik Kalaallit Nunaanni aatsitassat piiarneqartarnerannut tunngatillugu:

- Assut sianiilliussaagut, isumaqarsimagutta Trump-ip Kalaallit Nunaat kulturerput  inuusaaserpullu pissutigalugu soqutigigaa, tassami aningaasarsiornissaq kisiat soqutigisarivaa, uagullu innuttaasut aningaasanngorluta soqutiginanngikkutta, taava minnerpaamilluunniit soqutiginavianngilagut, aamma taamaammat ataatsimoorussat aallaavigalugit nutaamik sulissutiginnittoqartariaqarpoq Kalaallit Nunaata Danmarkillu akornanni, aamma taanna naapertorlugu EU-mik suleqateqarneq annertuumik siuarsarneqassammat.

sik rigsfællesskab jess g. berthelsen inuiaqatigiit grønland danmark samfund usa trump

ATORFIIT Se alle jobs

Powered by Labrador CMS