Nunanit allaneersunik sulisoqarnermi naammaginanngitsunik atugassaqartitsinermut tunngatillugu suliamik eqqartuussivimmi suliassanngortitsineq illuatungeriissutaasoq sulisunut ataasiakkaanut annertuumik kinguneqarsinnaavoq. Sulisut kattuffiilu sulisitsisuminnut uparuaappata ilaatigut suliffimminni pimmatigineqarlutilluunniit soraarsinneqarsinnaapput, suliffeerukkunillu Kalaallit Nunaanniit anisinneqarsinnaapput.
PISARTAGAQARTUNUT
Allaaserisaq una Nutaarsiassaqartitsivimmi aviisit naqitat
ilaanni allaaserisaavoq.
Allaaserisat pisartagaqartunit taamaallaat atuarneqarsinnaapput.
Atuarluarna.
Nunanit allaneersunik sulisoqarnermi naammaginanngitsunik atugassaqartitsinermut tunngatillugu suliamik eqqartuussivimmi suliassanngortitsineq illuatungeriissutaasoq sulisunut ataasiakkaanut annertuumik kinguneqarsinnaavoq. Sulisut kattuffiilu sulisitsisuminnut uparuaappata ilaatigut suliffimminni pimmatigineqarlutilluunniit soraarsinneqarsinnaapput, suliffeerukkunillu Kalaallit Nunaanniit anisinneqarsinnaapput.
PAASISAT
Filippinerit 09.02.2024-mi suiaassusaat naapertorlugu:
Angutit: 514
Arnat: 407
Katillugit 912. Taakkunani 107-it 18-it inorlugit ukioqarput.
Thailandermiut 09.02.2024-mi suiaassusaat naapertorlugu
Angutit: 164
Arnat: 185
Katillugit 349. Taakkunani 19-it 18-it inorlugit ukioqarput.
- RS Servisesimi sulinermi atugassarititaasut pillugit suliami ingerlasumi suliffeqarfimmi sulisut arlallit sulilernerminnut isumaqatigiissutaat inatsisillu unioqqutingaatsiarneqartut SIK naliliinerminut atatillugu RS Services eqqartuussisunut sassartissallugu aalajangerpoq. Sulisullu nunanit allaneersut sulisitsisumiit pillaatisisoqaratartoqarsinnaagaluartoq eqqartuussivimmi suliassanngortitsinerput ilisimavaat.
Taama oqaluttuarpoq SIK-p allattoqarfiani ingerlatsisoq Bjarne Petersen, taassumattaarlu sulisut nunanit allaneersut amerligaluttuinnartut suliffimminni atugassarititaasut naammaginanngitsut pillugit saaffiginnittartut amerligaluttuinnartut maluginiarpaa.
- Sulisitsisut amerlanerpaat sulisutik nunanit allaneersut iluamik pisaraat isumaqarpunga, ajoraluartumilli sulisitsisut sulisuminnik nunanit allaneersunik atornerluingaatsiarnerat pillugu arlalinnik suliaqartarpugut – maanngaanniillu suna tamaat atorlugu ikiorniartarpagut, Bjarne Petersen oqarpoq.
- OQAASEQARNIANNGILANGA
AG-p RS Services, Rhafaelle Martinsenimit pigineqartoq, attavigaa. Suliami pineqartumi RS Services qanoq isumaqarnersoq paaserusukkaluarparput.
Suliffeqarfimmini qassinik sulisoqarnersoq, taakkunannga qassit nunanit allaneersuunersut sulisuilu suliaqarfinni sorlerni sulisarnersut AG-mit paaserusunneqaraluarpoq. Rhafaelle Martinsenilli ima oqarluni oqarasuaatikkut attavik kipitissallugu aalajangerpaa:
- Oqaaseqarnianngilanga.
RS Servicesili Nuuk Centerimi, Pisiffimmi Aasiaat timmisartoqarfiannilu eqqiaasoqarlunilu Salon Aurorami sulisoqarpoq.
Suliffimmi atugassarititaasut kanngunartut
Sulisut nunanit allaneersut RS Servicesimi sulinerminni atugassarititaat tujorminartut Bjarne Petersenip oqaluttuarai. Kukkusumik aningaasarsisitsineq, piffissaq eqqorlugu aningaasarsisitsisannginneq soraarnerussutisiassanullu akiliisannginneq ilaatigut pineqarput. Aammattaaq qaangiuttoornernut aningaasarsisitsisarsimannginneq pineqarpoq, tassani suliffeqarfimmi sulisut arlallit sulilernerminnut atatillugu isumaqatigiissut naapertorlugu pisussaaffitik akunnernik arlalinnik sipporaluaraangamikkilluunniit qaangiuttoornerminnut aningaasarsitinneqartarsimanngillat.
- Aammattaaq sulisut ilaat piffissami sivisuumi sapaatip-akunnerani ullut tamaasa sulisarsimapput, taamaalillutik sullivinni avatangiisit pillugit inatsit naapertorlugu sapaatip-akunneranut ulloq ataaseq qasuersaarfeqarnissaminnut pisinnaatitaaffitsik atortarsimanngilaat. Taamatuttaaq sulisut arlallit sulisitsisortik sulinngiffeqarsinnaanerlutik aperisaraluarlugu ukiuni arlalinni sulinngiffeqartarsimanngillat. Sulinngiffeqartarsimannginnerit sulinngiffeqarnermut inatsimmik unioqqutitsinerupput. Eqqaaneqartut tamarmik kissaatigineqanngillat. Nunatsinni taamak ajortigisumik atugassaqartitsisoqarsinnaanera alianarpoq. Suliffeqarfiit allat aamma sulisutik nunanit allaneersut kanngunartumik pisaraat ukiuni kingullerni ajoraluartumik tusartarparput, Bjarne Petersen oqarpoq.
Iliuuseqarneq
SIK-p RS Services oqaloqatiginiarlugu suliniuteqaraluarpoq, iluatsinngitsumilli, suliffeqarfiummi SIK-p saaffiginninneri akiumanngilaat. Aammattaaq SIK-p inatsisilerituua piumasaqarluni allagaqarsimagaluarpoq, taannali aammali suliffeqarfimmit akineqarsimananilu qisuariarfigineqarsimanngilaq.
- Iliuuserisinnaasavut atorpavut. Tassa Namminersorlutik Oqartussat, Suliffeqarnermut Nakkutilliisoqarfik aamma SIRI (Styrelsen for International Rekruttering og Integration, aaqq.) attaveqarfigaavut, maluginiarlugillu sulisut nunanit allaneersut RS Servicesimi sulinerminni atugaat naleqqutinngitsut – neriuutigalugu tamanna siunissami suliffeqarfimmi pineqartumi pissutsit pitsaanerulernissaannut iluaqutaassasoq.
INATSIMMI IMA ALLASSIMAVOQ
Sulisitsisumi Fast Trackimut akuerisaasumi sulisutut sulilersinneqarneq tunngaviusumik aningaasarsianut sulilersitsinermullu atugassarititaasut nalinginnaasut naapertorlugit pisussaavoq. Aningaasarsianut sulilersitsinermullu atugassarititaasut nalunaarutigineqartut ersarissumik nalinginnaasuunngippata sulilersitsinermut isumaqatigiissut Namminersorlutik Oqartussanut tusarniaassutigineqarsinnaavoq. Taamaaliorsinnaavutit assersuutigalugu ullup affaa sulinissamik neqeroorfigitikkuit. Aningaasarsianut sulilernissannullu atugassarititaasut nunatsinni atugassarititaasut nalinginnaasut malillugit atorneqassappata ilaatigut imaassaaq:
Aningaasarsiat, sulinngiffeqarnermi atugassarititaasut, soraarsitsinermut nalunaarnerit il.il. Suliaqarfimmi sulilerfigisassanni nalinginnaasumiit ajornerussanngillat.
Piffissami tamakkiisumi sulisoqassaaq, tassa nalinginnaasumik sapaatip-akunneranut akunnerni 40-ni.
- Sulisulli taarsiiffigineqarsinnaaniassammata suliaq eqqartuussivimmut ingerlateqqittariaqarparput, ilaatigut sivisunerusumik sulisimanermut akissarsiaqartinneqarsimanatillu, sulinngiffeqartinneqarsimanatillu qasuersaarsimanngillat, Bjarne Petersen oqarpoq, taassumalu naatsorsuutigaa inatsisinik atuuttunit ersarissumik unioqqutitsinerit pineqarmata eqqartuussineq ilaasortanut iluaqutaassasoq.
Aqutsineq
- Sulisitsisut inatsisinik atuuttunik ersarissumik unioqqutitsisartut qanoq pitsaanerusumik aqussinnaavagut?
- Sulilernissamut isumaqatigiissut nunatsinni minnerpaamik sulisartoqarnermi atugassarititaasut nalinginnaasut naapertorlugit piumasaqaateqarnissaa siunertaralugu isumasaqatigiissutit tamarluinnarmik oqartussanit misissoqqissaarneqartarnissaat SIK-mit kissaatigineqarpoq. Suliffeqarfinni assigiinngitsuni nunanit allaneersunik sulisoqartuni sulisut nunanit allaneersut sulinerminni atugassarititaat pitsaanerusumik aqunneqartariaqartut SIK aamma isumaqarpoq. Imaluunniit allatut taallugu suliffeqarfinni pineqartuni naammaginartumik nakkutilliisoqartariaqarpoq.
- Suliffeqarfiit aaqqissuussamut fast-trackimut, tassa sulisunik nunanit allaneersunik sulilersitsigasuarsinnaanermut, ilaasut tamarmik ilumut aaqqissuussamut ilaassanersut akulikitsumik nalilersortassagaat aamma kissaatiginarsinnaavoq. Tassa suliffeqarfinni ataasiakkaani sulinermi atugassarititaasut naapertorlugit aaqqissuussamut ilaasinnaanermut pimoorussilluni nakkutilliineq.
- Qulaani kissaatigineqartut suliaqarfimmi nukinit ullumikkut atorneqartuniit annertunerusunik pisariaqartitsissasut qularnanngilaq, kisiannili, sulisut tikisitat iluamik pineqannginnerat naammaginanngitsumillu atugassaqartinneqarlutik sulinerat inuiaqatigiittut akuersaarsinnaanngilarput, Bjarne Petersen oqarpoq.
