Sikorsuaq peqqutaalluni nannut kujataanukaasut

Nunatsinni innuttaasut,  ingammik kujataaniit avammut ukiuni kingullerni nannut takussaaneruleriartorneri malugivaat.

Nunatta Kujataani sikorsuaqarnera peqqutaalluni nannut tunup avannaatungaaniit kujavarterput, immallu sarfarnera peqqutaalluni nannut tunumut uteqissinnaaneq ajortut, Pinngortitaleriffimmi miluumasunut timmianullu tunngasunut immikkoortortaqarfimmi pisortaq, Fernando Ugarte Sermitsiamut nassuiaavoq:

- Nannut kujavartertut ilai Nunatta Kujataaniiginnarput imaluunniit kitaata tungaanut avannarparterlutik.

Nannut amerlanerusut

- Ukioq manna nanoqarnerungatsiarpoq, nalinginnaanngitsumik sikorsuaqarnerungaatsiarmat, Fernando Ugarte oqarpoq, DMI-llu nittartagaani allaaserisaq innersuussutigalugu. 

DMI allappoq immap anorillu pissutigalugit ukioq manna sikorsuaqarnerusoq, tamatumalu kingunerisaanik allaat Paamiut tungaanut sikorsuaq anngussinnaasimalluni.

Kujataani innuttaasut nannunik ilisimasarnerannut Pinngortitaleriffik misissuivoq, savaatillillu nannunik misigisaqarsimanerannik apersuereersimallutik. Nannunik piniartut kujataaneersut ukiamut apersorneqassanerarpai.

- Taamaaliornikkut Pinngortitaleriffik sumiiffinni najugaqartut nannunut tunngasunut ilisimasaat nalunaarusiarineqarsinnaalissapput, Fernando Ugarte nassuiaavoq.

Nanoqarfiit marluk

Fernandi Ugarte Sermitsiamut nassuiaavoq Tunumi marlunnik nanoqarfeqartoq.

- Tunumi nanoqarfeqangaatsiarpoq, nanoqarfillu minneq Tunup kujataani kangerlunniilluni. Nanoqarfik anneq nannunik tusindilikkaanik peqarpoq, minnerlu hunnorujukkuutaanik nanoqarpoq.

Nannunik timmisartukkut kisitsineq

Timmisartut atorlugit Pinngortitaleriffiup nannunik siorna kisitsisimeranik nalilersuineq naammassingajalerpoq:

- Timmisartut atorlugit Tunumi nannunik 2023-imi kisitsinerit inerneri naammassingajalerpagut. Naammassigutta kisitsisit aasakkut piuartitsisunik piniarnermi atorsinnaanissaanik siunnersuissaagut.

- Tunup kujataani nanoqarfik minnermi kisitsinissamut avataanit aningaasaliiffigineqarpugut. Piniarnermik periuseq atorlugu kisitsiniarpugut, tamannalu ukiuni pingasut ingerlaneranni pissaaq. Taamaattumik 2025-mi, 2026-mi 2027-milu suliniarpugut neriullutalu 2028-p ingerlanerani missingiisinnaassalluta, suut tamarmik pilersaarutit malillugit ingerlappata, Fernando Ugarte, Pinngortitaleriffimmi miluumasunut timminullu immikkoortortaqarfimmi pisortaq, oqarpoq.