Silap pissusiata allanngoriartornera pillugu Inuit nukingerneroqqusipput

Ataatsimiinnermi tassani nunarsuatta siuttui silap pissusianut tunngatillugu pisussaaffitsik pillugu Inuit siuttuinit kimigiiserfigineqarlutik nukingisaarneqassapput. Issittoq nunarsuup sinneranut sanilliullugu sisamararterummik sukkanerusumik kissatsikkiartorpoq, naggueqatigiillu Inuit seIssittumi najugalittut silap pissusiata allanngornera pissutigalugu avatangiisitigut, kulturikkut aningaasaqarnikkullu atugarisatigut annertuumik unamminartorsiortussaanngorput. Taama ICC tusagassiuutitigut nalunaarummi allappoq.

ICC-p COP29-mi naqissuseqqissavaa silap pissusianut tunngassutilinni aaqqiissutissat eqqarsaatigalugit nunat inoqqaavisa siuttuisa akuutinneqarnissaasa pingaaruteqassusia, tassanilu naalagaaffiit, suliffeqarfissuit nunarsuarmilu innuttaasut kaammattorneqassapput naggueqatigiit Inuit pisinnaatitaaffiisa, siuttuisa aamma silap pissusiata qanoq iliorfigineqarsinnaaneranut ilisimasaasa salliutinneqarnissaannik. 

Silap pissusia pillugu aningaasalersuinissaq annertuumik COP29-p nalaani aamma sammineqartussaavoq, ICC-llu nunat inoqqaavi eqqarsaatigalugit kaammattuiuassaaq naligiissumik toqqaannartumillu nunat inoqqaavi, aamma Issittumeersut, taakkunannga pissarsinissaat qulakkeerneqassasoq.

COP-ip nalaani isumaqatiginninniarnerit aalajangikkallu pingaarutillit qanimut malinnaaviginissaasa saniatigut, naggueqatigiit Inuit inuusuttaasa, siuttuisa ilisimasanillu pigisaqartuisa Canadamik Kalaallillu Nunaanni najugaqartut qaffasissumik pisoqarfiusuni ataatsimiinnernilu nipertik tusartilersaarpaat. 

Issittumi nunat oqariartuutaat

ICC-p siulittaasua Sara Olsvig Naalagaafiit Peqatigiit qullersaanit aggersakkatut novembarip 13-ianni qaffasissumik pisussami peqataassaaq qulequtaq manna pillugu Nukissiuutinut nutaanut ikaarsaarnissap naapertuilluartumik naleqquttumillu ingerlanneqarnissaa – aatsitassat nukissiuutinut nutaanut ikaarsaarnissamut pingaarutillit pillugit isummersoqatigiiffianit innersuutaasimasut siuarsarneqarnissaat siunertaralugu. 

ICC-p siulittaasua aamma Issittumi Siunnersuisoqatigiit Norgemit siulittaasuuffigineqartup novembarip 12-ianni immikkut nunarsuarmi issittoq tamarmiusoq pillugu sammisassatut aaqqissuussaanut ima qulequtalimmut Nunamit qeriuaannartumit Nalunaarut – Sermeqarfiit allanngoriartornerisa nunarsuarmut tamarmut sunnniutaat peqataassaaq.

- Naggueqatigiit Inuit Issittup innuttarai. Immap sikuanut eqqaamiuullutillu tassunga atalluinnartuupput, pinngortitarlu issittoq angallavigissallugu piniarfigissallugulu pinngitsoorsinnaanngilaat, isumannaatsumillu najortariaqarlugu immap pisuussutai pisuussutillu allat piniagarissagunikkit. Ukiuni kingullerni naggueqatigiit Inuit sikussaarnerata annertunerujartuinnarneranik eqqorneqartarput, tamannalu peqqissutsikkut, atugarissaarnikkut inuussutissarsiornikkullu sunniinerlussimavoq, ataatsimut inuttullu ataasiakkaatut pisinnaatitaaffiit kalluarlugit, ICC-p siulittaasua Sara Olsvig tusagassiuutitigut nalunaarummi allappoq.

ICC-p siulittaasuata tullia Lisa Koperqualuk, Canadameersoq, aamma najuutissaaq, sammisaqartitsinernilu assigiinngitsuni peqataassalluni, soorlu Canada Pavilionimi.

Naalagaaffiit Peqatigiit qullersaata pilersitaanut Panelimut aatsitassat atorfissaqartinneqartut imaasiinnarluguli pissarsiarineqarsinnaanngitsut kiisalu nukissiuutinik atuinerup nikeriartinnissaanut innersuussutinik nammineq piumassutsimik malinneqartussanik suliaqarnermut Sara Olsvig ilaasortaqqammerpoq. Panelip sulinerata inerneri septemberimi saqqummiunneqarput ukiormannalu ataatsimeersuarnemri Silap Pissusaa pillugu qulequtaqartumi Panelip sulinerani inernerit sammineqangaatsiassasut naatsorsuutigineqarpoq.

Ataatsimeersuarnermi aaqqissuussinernut qaffasissumik inissisimasunut ikummatissat aamarsuartut oliatullu ittut atorunnaariartornerisa naapertuuttumik pinissaat tamatumani qitiussallutik.