Silap pissusiata allanngoriartorneranut akiuiniarnermi Kalaallit Nunaat peqataassaaq

Sisamanngornermi Kalaallit Nunaat Parisimi isumaqatigiissummut ilanngulluni atsioqataammat oqaluttuarisaanermut alloriarneq pingaarutilik pivoq.

FN-ip silap pissusianut allattoqarfimmi pisortaanerup Simon Stiell aamma Danmarkimi ineriartortitsinissamut nunarsuarmilu silap pissusianut politikkimut ministerip Dan Jørgensen najuutsillugit Hans Egedep illuani pisortatigoortumik aaqqissuussami isumaqatigiissut atsiorneqarpoq.

Naalakkersuisoq Kalistat Lundip (IA) Kalaallit Nunaata Danmarkillu akornanni isumaqatigiissut atsiorpaa, tassani Kalaallit Nunaata silap pissusiata allanngoriartorneranut peqataanissaanut sinaakkutissat isumaqatigiissutigineqarlutik.

Kalistat Lundip aamma allakkat Simon Stiellimut tunniuppai, tassanilu naalakkersuisup ilisimatitsissutigaa Kalaallit Nunaata Parisimi isumaqatigiissut atsiorsimagaa.

- Taperseeqataassaagut

Kalistat Lundip qilanaaraa Kalaallit Nunaata silap pissusiata allanngoriartorneranut akiuiniarnermi peqataanissaq:

- Parisimi isumaqatigiissut akuersaarparput isumaqaratta uaguttaaq maani Kalaallit Nunaanni silaannaap pissusaata allanngoriartorneranut ataatsimoortumik suliniutaasunut taperseeqataassasugut.

- Akuersinitsigut Naalakkersuisut, Inatsisartut inuiaqatigiillu kalaallit tamarmiusut kalerriutigaat uagut maani najugaqartuusugut sermimut aakkiartortumut toqqaannartumik isiginnaartuinnaanngitsugut. Uaguttaaq aamma silaannaap pissusaata allanngoriartornerinut ataatsimoorussamik suliniuteqarnissanut peqataanissatsinnut piareersimavugut, inuiaqatigiitsinnullu iluaqutaasussamik nukissiuutinut mingutitsinnginnerusunut saakkiartornerup qularnaarnissaannut, Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund atsioqatigiinnermi oqarpoq.

Kalaallit Nunaat sunik anguniagaqassava?

CO2-mik aniatitsinerup annikillisinnissaanut Kalaallit Nunaata anguniagai aalajangersimasut piffissami aggersumi politikkerinit aalajangerneqassapput.

Kalaallit Nunaata Danmarkillu suleqatigiinnissamut isumaqatigiissutaanni ima allassimasoqarpoq:

- Kalaallit Nunaata Parisimi isumaqatigiissummi nunap immikkoortuatut nangaassuteqarneranik nalunaarummik atorunnaarsitsinermi, Kalaallit Nunaat Kalaallit Nunaanni nunat tamalaat pisussaaffiisa malittarisassaasalu akuerisat iluanni nunami namminermi annikillisitsinissamut anguniagassanik suliaqartussaavoq.

- Kalaallit Nunaanni nunami namminermi annikillititsinissamut anguniagassatut aalajangersarneqartut Naalakkersuisut danskit naalakkersuisuinut isumaqatigiissuteqareernerini UNFCCC-p allattoqarfianut nassiunneqassapput. Naalakkersuisut qinnuteqarnerini danskit naalakkersuisui suliami tassani ikiuutissapput.

Naalakkersuisut siusinnerusukkut ilisimatitsissutigaat annikillisaanissamut suliniutinut aningaasartuutaasinnaasut Kalaallit Nunaata anguniakkat sorliit peqataaffiginissaanut apeqqutaassasut, anguniakkallu silap pissusianut periusissiami suliarineqartumi allassimassasut.

FN-imi qullersaq nuannaartoq

FN-ip silap pissusianut allattoqarfimmit Simon Stiellip Kalaallit Nunaata isumaqatigiissummut ilanngunneqarnera nuannaarutigaa:

- Kalaallit Nunaata pisortatigoortumik Parisimi isumaqatigiissummut akuulernera pillugu tikilluaqqungaarpara, aamma Danmarkip silaannaq pillugu qanoq iliuuserineqartuni nangittumik siuttuunera nersornartillugu.

- Aamma malugaara Kalaallit Nunaanni Nunap Inoqqaavisa, nunarsuullu immikkoortuini tamaniittut, ilisimasaat silaannarlu pillugu aaqqiissutissaat aatsaat taama pingaaruteqarluinnartigisut, Simon Stiell oqarpoq.