Silarluttoqarnera pissutigalugu angalasut arlallit kinguaattoorput
Kalaallit Nunaat tamakkerlugu silarlunnera pissutigalugu angalasut arlallit kinguaattoornissartik naatsorsuutigissagaat, Air Greenland nalunaarpoq.
Silagisseriaannartoq Air Greenlandip timmisartuisa ilaasut ornigassaannukaassussavaat. Nuissat appasissut pujorlu pissutigalugit kinguaattoornerit taamaatitsiinnarnerillu amerlanerusut naatsorsuutigineqarsinnaapput, timmisartortitseqatigiiffik nalunaarpoq.
Assiliisoq: Air Greenland
Kitaata sineriaani sumiiffiit amerlanersaanni sialleraluartoq, pujoraluartoq anorleraluartorlu, Kalaallit Nunaanni aasaavoq. Ilaat anganissaminnut kisitsipput, allalli angerlaliivissagunarlutik.
Pingaartumilli nuissat appasissut pujorlu pissutigalugit kinguaattoornernik taamaatitsiinnarnernillu Air Greenlandimi angalasut eqqugaassallutik naatsorsuutigisinnaavaat. Taama Air Greenland Facebookimi quppernermini marlunngornermi juulip qulingiluaani nalunaarpoq.
- Silap taamaannera silaannarmiissinnaanitsinnut sunniuteqarlunilu timmisartuussinissamut pilersaarutitsinnut akornutaavoq. Piffissami angalaffiusinnaasumi eqqugaasut tamaasa angumerisinnaanngilavut, tassami aamma eqqissisimaartussaatitaaneq, inatsisit naapertorlugit eqquutsittariaqagarput, inuttanut aamma eqquivoq, Air Greenland allappoq.
Aaqqiissutissaq pitsaanerpaaq sulissutigigaat
- Soorunami angalasorpassuit kinguaattooqqanerat ajuusaarnarpoq, sapinngisarpullu tamaat atorlugu aaqqiissutissarsiorpugut. Sapinngisamik piffissaq atorluarumallugu silap qanoq innera aallaavigalugu timmisartut angalanissaat allanngortittarpavut. Ajoraluartumillu angalasussat ingerlariaqqinnaveertut apuuffissaminnut apuunnissaasa tungaanut suli utaqqilaartariaqarpugut, timmisartortitseqatigiiffik nangilluni allappoq.
Angalasut arlallit sila pissutigalugu sapaatip-akunnera tikivillugu kinguaattoorsimasut, Air Greenland ilisimatitsivoq.
- Kujataaniittut eqqugaanerpaapput, sikorsuit, nuissat appasissut pujorlu peqqutaallutik ingerlariaqqinneq ajulersunik kinguneqartitsimmata. Taamatuttaaq illoqarfinni appasissunik nuialinni pujulinnilu minniarneq qangattarniarnerlu ajornakusoorpoq.
Periarfissaatillugu silalu apeqqutaatillugu timmisartuussinernik nutaanik ikkussisarlutik, Air Greenland ilisimatitsivoq. Kinguaattoornerit nassiussanut aamma kinguaattoortitsisut, taamaattumillu utaqqineq sivisunerusinnaassasoq ilisimatitsivortaaq. Timmisartuussinerit nutaat pillugit Air Greenlandimillu nalunaarutinik angalasut eqqumaffiginneqqullugit timmisartortitseqatigiiffik kajumissaarivoq.
