Sillimaniarnermut siunnersortaasimasoq: Kalaallit Nunaat Puerto Ricotut inissittariaqarpoq
USA-p Kalaallit Nunaat aqussinnaalernissaa kikkut tamarmik angorusukkaat, Trumpip sulisorisimasaa John Bolton DR-imut oqarpoq.
Kalaallit Nunaat Puerto Rico assigalugu, USA-p ataani namminersorlutik oqartussatut inissisimalissasoq, USA-mi sillimaniarnermut siunnersortaasimasup John Boltonip siunnersuutigaa.
Assi: Ida Marie Odgaard/Ritzau Scanpix
- Kalaallit Nunaanni innuttaasut Amerikap ataani namminersorlutik oqartussaalerusuppata, imaluunniit Manerassuarmi qeqertat ilaat FN-ip siulersuiffigisimasai assigalugit naalakkersuisoqatigiinnissamik isumaqatigiissuteqarsinnaappata, tamanna aamma periarfissaassagaluarpoq.
USA-p præsidentianut Donald Trumpimut sillimaniarnermut tunngasunik siunnersortaasimasoq John Bolton Deadlinemi apersorneqarluni oqarpoq.
Kalaallit Nunaat Puerto Ricotut nutaatut inissisimalertuuppat silatusaarnerussasoq isumaqarpoq – USA-p ataaani namminersorluni oqartussaaffilittut.
John Boltonip kalaallit tamanna qanoq isumaqarfigineraat paaserusuppaa.
- Uanga aalajangiisinnaasuuguma Kalaallit Nunaat Danmarkilu sunulluunniit kimigiisarfiginavianngikkaluarparput, isumaqanngilangali tamanna oqaloqatigiissutigineqarsinnaanngitsoq, John Bolton oqarpoq.
USA-mit kimigiiserneq
Donald Trumpip Kalaallit Nunaata tiguarnissaa soqutigalugu ukioq manna arlaleriarluni oqaatigaa. USA-p isumannaatsuunissaanut tamanna pisariaqartoq taanna isumaqarpoq.
Danmarkip Kalaallit Nunaat kalaallinit pigineqartoq arlaleriarluni erseqqissartarpaa, aamma Naalakkersuisut siulittaasuata Jens-Frederik Nielsenip Kalaallit Nunaata Amerikamut ilanngunnissani soqutiginngikkaa erseqqissareernikuuaa.
Aamma EU-p Frankrigillu Kalaallit Nunaat tapersersorpaat. Præsident Macron juunimi Nuummut tikeraarpoq, tassani Kalaallit Nunaat qaninnerusumik suleqatigilerusullugu oqaatigaa.
Frankrig Nuummi "ukiup tulliata aallartinnerani" aallartitaqarfik ammarniaraa, Frankrigip nunanut allanut ministeria Jean-Noel Barrot Nuummi tusagassiortunik katersortitsinermi sapaatip-akunnerata naanerani aamma oqarpoq.
