Sisamanngorpat kunngikkormiut Nuummut tikissapput
Kunngikkormiut ilaatigut Nuummi atuarfittaassaq kiisalu mittarfiliorneq takornariassavaat.
Pilersaarutit malillugit kunngi Frederik aamma Dronning Mary Nuummut nalunaaqutaq qulinut sisamanngorpat tikissapput.
Assiliisoq: Ida Marie Odgaard/Ritzau Scanpix
Pingasunngorneq angalanermut atorneqareersorlu, sisamanngorpat ullaap tungaani kunngikkormiut Nuummut tikissapput.
Kunngikkormiut angalanerat arfininngormat avannaani Qaanaami aallartippoq, tamatumalu kingorna kunngi Frederik dronning Marylu Aasiannut, Qeqertarsuarmut, Attumut Sisimiunullu tikeraarput. Meeraat prins Vincent aamma prinsesse Josephine angalaqataapput.
Kunngikkormiut nittartagaanni pilersaarutit naapertorlugit umiarsuaq Dannebrog kunngikkormiunik ilaasoqarluni Nuummut nalunaaqutaq 10.00 tikissaaq.
Ataqqinartorsuaq Kunngi aamma Ataqqinartorsuaq Dronningi kunngikkormiutut Nunatsinnut siullermeerlutik tikeraarneranni Nuup Saavanut tikippata tikilluaqqusinermi innuttaasut kikkut tamarmik peqataanissamut tikilluaqqusaasut, Kommuneqarfik Sermersooq nittartakkamini allappoq.
Borgmesteri Avaaraq Olsen kommunaldirektøri Ole Jakobsen peqatigalugu Kunngikkut tikilluaqqussavai, tikilluaqqusinerlu pereerpat innuttaasunik takkuttunik ilassinnilaarnissamut piffissaqartinneqassasut, kommuni allappoq.
DMI naapertorlugu sisamanngornermi Nuummi seqinnarissaaq, taamaattumik kunngikkormiut illoqarfimmik takuniaanerminni silagissiussapput.
Pisortatigoortumik pilersaarutit ima isikkoqarput:
10.00 Kunngikkormiut umiarsuaannik Dannebrogimik Kunngikkormiut Nuup Saavanut tikissapput.
10.30 Kunngikkormiut Kommuneqarfiup Allaffiani pisortatigoortumik tikilluaqquneqassapput.
11.45 Kunngikkormiut Atuarfik Inussuk takornariassavaat.
12.30 Kunngikkormiut Hans Egedep illuani pisortatigoortumik ullup-qeqqasioqatigiinnermi peqataassapput
14.50 Kunngikkormiut mittarfiup illutaanut nutaamut takornariassapput
15.45 Kunngikkormiut Nuummi assassukkanik sannavimmut pulaassapput
18.30 Kunngikkormiut Katuami pisortatigoortumik nerersuartitsinermi peqataassapput
Tallimanngorpat tikeraarneq Nuummi ingerlaqqissaaq, makkuninnga sammisaqarfiulluni:
10.00 Kunngip Nuussuup Atuarfia pulaassavaa
10.00 Dronningi meeqqerivimmut nutaamut Naasumut pulaassaaq
12.00 Kunngikkormiut umiarsuaanni Dannebrogimi Kunngikkormiut ullup-qeqqanut ilassinnitsitsisuussapput
Tamatuma kingorna kunngi dronningilu Kujataanut aallassapput, pilersaarutillu malillugit Narsarsuarmi nalunaaqutaq 15.45 tikissallutik, tamatumalu kingorna aappariit tallimanngorpat unnukkut Igalikumut tikeraassapput.
