Sisimiuni eqqartuussineq annertooq aallartippoq

Angutinut inuusuttunut pingasunut, pissutsinik assigiinngitsunik 15-inik unnerluutigineqartunut, Sisimiuni Qeqqata Eqqartuussisoqarfiani eqqartuussineq ataasinngornermi allartippoq.

Eqqartuussineq ullumi juunip 17-ianni nalunaaqutaq qulingiluanut Sisimiuni Qeqqata Eqqartuussiviani aallartippoq.

Eqqartuussiviup eqqaani timmissat qarlorpaluttut tusarsaapput, silalu nuialaarlunilu seqinnilaarpoq. Peqqutaasoq ilungersunaraluartoq silaannaq oqippoq.

Unnerluutigineqartut angutit inuusuttut pingasut, eqqartuussinerup aallartinnginnerani nalunaaqutaq qulingiluanngunnilaartoq takkupput eqqissisimarpasillutillu.

Unnerluutigineqartut saviminernik paffequtsigaaqqallutik politiinit marlunnit eqqartuussivimmut eqqunneqarput, suliallu ilungersunartuunera tamatuma ersersippaa.

Unnerluutigineqartut tamarmik immikkut illersuisoqarput.

Pinngitsaaliilluni atoqateqarsimannginnerartoq

Angutini pingasuusuni ataaseq pinngitsaaliilluni atoqateqarsimasutut unnerluutigineqarpoq. Taannali taamaaliorsimannginnerarpoq aammalu taamaaliunngisaannarsimanerarluni.

- Uanga pinngitsaaliinavianngilanfa, taamaattuunngilanga, unnerluutigineqartuni pingasuusuni ataaseq eqqartuussivimmi nassuiuaanermini oqarpoq.

Unnerluutigineqartoq ilaat alla ataaseq arnanut katillugit pingasunut nakuusersimasutut unnerluutigineqarpoq, sinnerilu angutit nakuuserfigineqarsimallutik. Ilaat ataaseq alleqqumigut arlalinnik napisimanini peqqutigalugu Rigshospitalimut aallarunneqartariaqarsimavoq. Allalu ataaseq napparsimavimmut unitsinneqarsimalluni.

Tamarmik oqaaseqarumasut

Angutit inuusuttut taakkua pinerluttuliornernik arlalinnik ilungersunartunik unnerluutigineqarput, ilaatigut nakuusersimasutut, ilisimannittunik sioorasaarisimasutut, pinngitsaaliilluni arnerisimasutut, pisortani atorfilimmut asissuisimasutut, akuersissuteqarani nakorsaatinik allagartaqarluni pisassanik pigisaqarnermut, angerlarsimaffimmi eqqissiviilliortitsisimasutut pisattanillu ajoqusisiisimasutut.

Unnerluutiginnissummi pissutsit 15-it allaatigineqarput. Pissutsit ilaat nassuerutigaat, allat ilumuunnginnerarpaat, ilaallu ilaannakuusumik nassuerutigalugit. Unnerluutigineqartut eqqartuussinermi oqaaseqarumanerlutik aperineqaramik, tamarmik angerput.

Ilaquttat ikinngutillu ataasiakkaat takunneqqikkumallutik eqqartuussivimmiipput. Unnerluunneqartut marluk januaarip 14-ianili tigummigallarneqalerput, ilaqutaasunullu takummaasoqarpoq.

Eqqartuussineq

Pilersaarutit malillugit ingerlasoqassappat, eqqartuussineq sapaatip-akunneranik sivisussuseqassaaq, ataasinngornerullu tulliani naammassineqassalluni. Eqqartuussinerup ingerlanerani unnerluussisussaatitaasup, illersuisussaatitaasup nalunaajaasullu eqqartuussivimmi nassuiaatitik uppernarsaatitillu saqqummiutissavaat.

Ataasinngornermi eqqartuussinermi uppernarsaatit saqqummiunneqassapput, unnerluutigineqartullu killisiorneqarlutik.

Powered by Labrador CMS