Sisimiuni uumasunut nakorsiartarfik ammalersoq
QimmeqHealth aningaasannassimmammat Sisimiuni misiliutaasumik uummasut nakorsiartarfiannik ukiumi ataatsimi ingerlatsisinnaanngorlutik, QimmeqHealthip nuannaarutigalugu nalunaarutigaa. Uumasunut nakorsiartarfik novembarip aallaqqaataaniit ammarneqassasoq naatsorsuutigaat.
Foto: Dorthea Reimer-Johansen
Sisimiuni qimmillit allanillu uumasuutillit uumasuutiminnik nakorsiussisinnaanngungajalerput.
QimmeqHealth Dyrlægeklinikkip nalunaarutigaa novemberimi uumasunut nakorsiatarfimmik misiliummik ukiumi ataatsimi ammaaniarlutik. Qaammatit tamaasa sapaatip akunnerini marlunni ammasassalluni.
- Akeqalaassaaq, akit Danmarkimi naleqqiullugit akikinnerukussuussaaq, QimmeqHealth Facebookimini allappoq.
Uumasut nakorsaattut sulineq soqutiginarsarneqassasoq suliniuteqarnermi ilaatigut anguniarneqarpoq.
- Neriuutigaarput qimuttoqarfinni atajuartussamik uummasut nakorsiartarfissamik siunissami peqalerumaartoq.
Peqatigiiffik nuannaartoq
Qimusseq Sisimiuni siulittaasoq naapertorlugu suliniutit piviusunngortinnissaanut suleqataasimapput, nutaarsiassarlu tusarlugu nuannaajallaatigaa:
- Soorunami nuannaartorujussuuvugut. Allagaqaammik allagaqarnikuugatta pissangasimavugut piviusunngussanersoq. Illoqarfitsinni uumasut nakorsaqarnissaannik pisariaqartitsineq pillugu allagaqarsimavugut. Pingaaruteqarpoq uumasut eqqortumik nakorsaasersorneqartarnissaat, Susanne Berthelsen oqarpoq.
Susanne Berthelsen Qimusseq Sisimiuni siulittaasuuvoq, taassuma ilanngullugu oqaluttuaraa qimmillit qimmitik kilersimagaangata nammineq passuttariaqartarsimallugit, inunnullu nakorsaatit, soorli pencillin qimminut atortariaqartarsimallugit.
- Ajornerpaagaangat qimmiminnik toqutsisariaqartarput.
