Siu Tsiumi suleqataaneq: Qalipaasiutit, pilattuutit kukkukuullu

Illu qorsuk Tasiilami Naasuliardarpiup tungaaniittoq iserfigiinnarlugu kukkukoorpaluk kisimi tusarsaavoq.

Qiviaannarlugu angerlarsimaffittut allatuulli isikkoqaraluarpoq, iserluguli allarluinnaalluni.

Iggavimmut iseraanni ruuat nutaat siumugassaapput, ruuat taakkua Siu Tsiup naatsiivianiit ukiunnginnerani katersukkat kingullersaraat. Kukkukuut kingusinnerusukkut uterfigeqqissavagut. Inimi allamiipput Emma Kuitse, Dines Ignatiussen Odin Poulsenilu. Taakku ulloqeqqarnerminni nalaasaarfimmi mobilerusaartut kingusinnerulaartukkut suliartoqatigissavagut, eqqissisimaaginnartanngillammi.

 - Piumaneqaqigatta ulapaartuaannarpugut. Nuannarineqartaqaagut, Mati Larsen Siu Tsiup Tasiilami immikkoortortaqarfiani pisortaq oqarpoq.

Siu Tsiumi - tapersersortarialinnik suliffissaqartitsiviusumi - inuusuttut katillugit 15-it ilinniartuutigineqartarput. Imalu piumaneqartigigamik periarfissaappat amerlanerusut ilinniartuutigineqarsinnaagaluartut Mati Larsenip oqaatigaa.

- Aap, kisianni manna illu 15-iinnarnut inissaqarpoq, Mati oqarpoq.

Siu Tsiu alloriaqqinnissamut aqqutissiuivoq

Ulloqeqqareermat ulapiffissannguinnaqaaq. 29-nik ukiullip Odin Poulsenip sissami umiatsialerivikoq majuartarfinnik qullartingaatsiarluni kukkunaveersaaqqissaarluni qalipappaa.

- Qalipaalluni nuanneqaaq, Odin tummeqqanut qaqilluni qalipaarujuujutaa taama oqarpoq.

Odin Siu Tsiumi “utoqqartartut” taaneqarsinnaavoq, nalinginnaasumimmi Siu Tsiumi ilinniartuutigineqartut 15-it 25-llu akornanni ukioqartarput. Odinili immikkut akuerisaalluni Siu Tsiumiippoq.

Tasiilap eqqaani nunaqarfinni najugallit meeqqat atuarfiat naammassiartorlugu Tasiilamukakkajuttarput. Odinip meeqqat atuarfiat Tasiilamut naammassiartorlugu atuariartornikuugaluarpoq, 10. klasseli naammassinagu Sermiligaamut 2011-mi  angerlaannarsimalluni oqaluttuaraa.

- Inuusuttuaranngorama anaanaga ataatagalu utoqqaapput. Kommunillu angerlarsimaffimmi ikiuisartuinit ikiorneqarsinnaanngimmata ikiorniarlugit angerlaannarnikuuvunga, Odin oqaluttuarpoq.

Odinip inuunera manissuinnaasimanngilaq. Angajoqqaavi tamakkerlutik maanna peerutereerput, Odinili ingerlariaqqikkusuppoq. Qatanngutini arlallit Siu Tsiumiinnikuusut oqaluttuaraa, taamaammat aamma nammineq misileerusulersimavoq.

- Siu Tsiumiinninni qummut ingerlariaqqippunga, suliassallu tungaatigut ilikkagaqarlunga, Odin taama oqarpoq.

Ungataani niviarsissat arlaqarlutik qalipaatit aggiunneqartussat utaqqiisaa pujortataajutigalutik uninngarujoorput. Ataatsimoortut ilaanniippoq Emma Kuitse. Taanna 16-inik ukioqarpoq qaammatillu pingajussaani Siu Tsiumiilluni.

- Qalipaaneq aatsaat misilillugu nuanneqaaq, Emma oqarpoq.

Qalipaasunngorusulinngilatit?

- Aap, majuartarfikkut qummukarluni nangiarnarnermik, Emma illarlunilu oqarpoq.

Silataani qalipaasut ulapputtut illup iluani pilattorpalussuaq tusarsaavoq. Nukappiaaluit pingasut ikioqatigiillutik ulappupput. Kukkukuut Siu Tsiumut iseratta takusagut ilinniartut namminneerlutik isumagisassarigamikkit inissaannik sanaappaat. 18-inik ukiulik Dines Ignatiussen Siu Tsiumi siornatigut qaammatini qulini ilinniartooreernikuusoq pilattuersuaarpoq. Naak Siu Tsiu naammassereernikuugaluarlugu aappassaanik ilinniartuuvoq.

- Nuannarinermik, Dines oqarpoq.

Assassorlunili suliaqarneq nuannareqaa.

- Ingutsererujoorluni nuannernerpaavoq, Dines oqarpoq ulappuseqqillunilu.

Ataatsimoortunut peqataaneq

Siu Tsiumi ilinniartut suliffeqanngitsuunermit suliffittaarnissaannut  ilinnialernissaannulluunniit piareersarneqartarput, suliaqarneranni assassorneq qitiutinneqartarluni.

- Atuarfiarannguatsinni atuagarsorneq qitiutitarinngilarput. Assassorluni suliassat suliarisarpagut, Mati Larsen oqarpoq.

Emma Kuitsep meeqqat atuarfiat upernaaq naammassivaa, efterskoleriarnissaraluanilu iluatsinngimmat Siu Tsiumiilerpoq. Suliassatik piinnarnagit ataatsimoortarnertik nuannareqalugu oqaluttuaraa.

- Ikioqatigiittarpugut, aamma suleqatit inussiarneqaat, Emma oqarpoq.

Odin majuartarfinni qullartingaatsiarluni suli qalipaavoq. Ilinniartoqatini allat peqatigalugit ullaakkut arfineq-pingasuniit ualikkut pingasup qeqqata tungaanut sulisarpoq, uninngaannarnerlu nuannarinnginnamiuk suliaqarnini iluaraa.

- Siu Tsiu nuanneqaaq, uninngaannarneq ajorpugut, ullut tamaasa suliaqartaratta, Odin oqarpoq.

Portøri, aalisartoq sanaartorfimmilu sulisoq

Tasiilami Siu Tsiu ukiut sisamassaani ingerlavoq. Atuarfittut allatulli aallartiffeqanngimmat ilinniartut piffissami aalajangersimasumi aallartinneq ajorput, inissaqaleraangat aallartittoqarsinnaasarluni. Tamaani piareeraangamik siammasittorujussuarnut ilaat ingerlaqqittartut Siu Tsiup Tasiilami aallartinneranili pisortaasup oqaluttuaraa.

- Inuusuttut marluk siornali ajattullattaasagut massakkut GU-lernikuupput, Mati Larsen oqarpoq.

Emma Kuitse niviaaluillu allat uninngasinnarlutik illup ataatungaanut qalipaatissartik takkummat suliaqassallutik piareeqqipput. Suliaqaqqinnginnermini siunissamut takorluukkani pillugit oqaluttuarpoq.

- Portøritut ilinniarlunga aallartikkusuppunga, praktikkerfigigakku nuannernermik, Emma oqarpoq.

Portøritulli ilinniarniaraanni 18-ilereersimanissaq piumasaqaatinut ilaammat, Siu Tsiumi naammassiguni ukiumi naammatsinnissanut pisiniarfimmi suligallarsinnaassalluni neriuutigaa.

Odinip illup qulaatungaa qalipallugu piareerluinnalerpaa. Sanaartorfiusuni suliaqarneq  misilittaqattaareerlugu siunissami takorluukkani nalornisiginnginnerulerlugit oqaluttuarpoq.

- Qalipaasumut sanasumulluunniit qinnuteqarsinnaavunga. Ilinniarlunga imaluunniiit utaqqiisaagallartumik sulillunga. Uninngaannarneq eqiagaara, Odin oqarpoq.

Nukappissat umiatsialerivikup iluatungaani suli aamma ulappupput, kukkukuut inissaat ukiorpallaartinnagu piareerneqartariaqarmat inaarsarpaat. Dines Ignatiussenip qisuit maskiinamik pilattuummik pilattorpai. Paarlagiillutik taamaaliorput, ilai pilattuisut ilai uuttortaasut. Dinesip Siu Tsiu naammassiguniuk illoqarfimmi inuussutissarsiut suli nutaajusoq sanguffigissallugu pilersaaruteqarpoq.

- Umiatsiatsinnik aalisassuunga, Dines oqarpoq.