Siulittaasumik toqqaaneq pitsaasoq 

Kalaallit Nunaanni aalisartut piniartullu kattuffiisa pingasuusut annersaata KNAPK-p Ilulissani oktobari aallartilaartoq ileqquusumik ataatsimeersuarnerannut atatillugu, Ilulissani umiatsiaararsortoq aamma Ilulissani aalisartut piniartullu peqatigiiffianni IAPP-mi siulittaasoq Pele Blytmann KNAPK-mi siulittaasutut qinerneqarpoq. 

Taanna kattuffilerinermik misilittagaqanngilaq, taamaakkaluartoq kattuffiup 70-it missaannik immikkoortortaqarfeqartup Nuummi qitiusumik allaffeqarfiani akisussaaffik naammassilluarsinnaallugu oqaatigaa.

Pele Blytmannip siulittaasutut qinigaanera aalisarnermik suliaqartunit arlalinnit iluarisimaarneqarpoq, kattuffiullu ukiuni kingullerni assoralisimaarsimasup ilorraap tungaanut aallarteqqinnissaa pillugu siulittaasunngortoq suliaqarumaartoq, aalisarnermik suliaqartut Sermitsiamiit oqaloqatigineqartut neriuutigaat. Piffissamili aggersumi KNAPK-p suliniutissai pingaarnerit suli saqqummiunneqannginnerat Qalerualinniat Aalisagarniallu Kattuffianiit, QAK-miit, isornartorsiorneqarpoq.

Pissutsit ilisimalluarai 

IAPP-mi siulittaasuusimasup maannakkullu Halibut Greenland ApS-imi siulersuisuni siulittaasup Kaaleeraq Mathæussenip Pele Blytmann siornatigut suleqatiginikuuaa ilisarisimalluarlugulu.

- Peqatigiiffilerinermut pikkorissuuvoq aalisarnermilu pissutsit ilisimaarilluarlugit. Avannaani aalisarnermut tunngasut pissutsit ilungersunartut pillugit KNAPK-mut siornatigut saaffiginnissutigisartakkagut qisuariarfigineqarneq ajortut maannakkut pimoorullugit tiguneqartalernissaat qularutissaanngilaq.

- Kattuffiup ilaasortaasa tusaaniarneqarnerulernissaat siulittaasup kissaatigaa, taamaattumik siunissamut isumalluarpugut, oqarpoq.

KNAPK-mi ulluinnarni aqutsisut partiinut arlaannaannulluunniit attuumassuteqannginnissaat siulittaasunngortup anguniagaanut pingaarnernut ilaavoq, tamannalu aalisartunit tigullarneqarsimasoq Kaaleeraq Mathæussen isumaqarpoq.

Isumalluartoq 

Sinerissap Qanittuani Aalisartut Piniartullu Kattuffianni, SQAPK-mi, Ilulissani allaffeqartumi siulittaasup Anthon Lindenhannip Pele Blytmann ilisarisimalluarpaa, taamaattumillu suleqatigilluarnissaa naatsorsuutigaa.

- Nikkulaat Jeremiassenip KNAPK-mi siulittaasuunerata nalaani suleqatigiinnerput piffissami kingullermi amigaataasimaqaaq. Kisiannili apeqqutini pingaarutilinni arlalinni, assersuutigalugu umiatsiaararsortut atugaannut tunngatillugu, Pele Blytmannip pitsaasumik suleqatiginissaanut neriulluarpunga, oqarpoq.

Aalisarnermut inatsisip umiatsiaararsortunut tulluussarneqarnissaanut tunngatillugu KNAPK-p aamma SQAPK-p qanimut suleqatigiinnissaat pinngitsoorneqarsinnaanngitsoq Anthon Lindenhann isumaqarpoq.

Nipaappallaartoq 

KNAPK-p siuttuisa nutaat piffissami aggersumi pingaarnertut suut suliariniarlugit piaartumik nalunaarutigisariaqaraat Qalerualinniat Aalisagarniallu Katuffianni, QAK-mi, siulittaasoq aamma KNAPK-mi siulittaasuusimasimasoq Henrik Sandgreen isumaqarpoq.

- KNAPK-mi siulersuisuunernik nutaanik qinersinerup kinguninngua kattuffiup pingaarnertut suut suliariniarnerai pillugit avammut nalunaaruteqartoqarsimasariaqaraluarpoq, kisianni tassa maannamut KNAPK suniarnersoq suli paasinngilarput, oqarpoq.

Pele Blytmannip kattuffilerinermut misilittagaqarani siornatigut oqaatigereerpaa, taamaattumik KNAPK piffissami matumani unammilligassaqarmat siulittaasunngortoq qitiusumik allaffeqarfimmi ikiorluarneqartariaqartoq aammali QAK sukkulluunniit ilisimasanik ikiuunnissaminut piareersimasoq Henrik Sandgreen oqarpoq.

KNAPK-mi ulluinnarni aqutsisut politikkikkut partiinut arlaannaannulluunniit attuumassuteqassanngitsut Pele Blytmannip kissaatigaa, taannali tunngavigalugu atorfilittanik soraarsitsisoqassanersoq suli oqaatigisinnaanagu siulittaasunngortup oqaatigaa.