Siumup qullersaqarfiani taarsersuisoqartoq
Aviaja Hegelund-Tittussenip Siumumi partiimut allattaaninngorpoq.
Partiimi allaaninngortup suleqateqarnissaa qilanaaralugu, partiip siulittaasua Aleqa Hammond oqarpoq.
Assi: Oscar Scott Carl
Partiip qullersaqarfiani allattaaneq taarserneqassasoq Siumup siulersuisuunerisa aalajangerpaat.
Ole Aggo Markussen partiimi allattaanertut unippoq Aviaja Hegelund-Tittussenilu 2025-mi novembarip aallaqqaataa aallarnerfigalugu partiimi allattaaninngorpoq.
Aviaja Hegelund-Tittussen partiip aaqqissuussaanikkut inissisimaneranut aammalu ingerlanneqarneranut misilittagaqarluarpoq, qullersaqarfiullu immikkoortortaqarfiit peqatigalugit ineriartorteqqinnissaanut ingerlatitseqqiissasoq, Siumut tusagassiuutitigut nalunaarummi naatsumi ilisimatitsivoq.
Partiip siulittaasuata Aleqa Hammondip Ole Aggo Markussen sulisimaneranut qujassuteqarfigaa:
- Ole Aggop ukiorpassuarni tunniusimalluni sulisimaneranut qutsavigaara.
Maannalu Aviaja piginnaaneqarluarmat ataqatigiissaarillaqqissuummallu
suleqatiginissaanut qilanaarpunga. Pisoq eqqissisimasumik partiip
ineriartornera tunngavigalugu ingerlanneqarpoq, Aleqa Hammond oqarpoq.
Ole Aggo Markussen Royal Greenlandimi attaveqarnermut qullersatut 2025-mi atorfinippoq, qaammalli ataaseq qaangiuttoq Siumumut partiip allattaaneratut atorfinitseqqippaa.
