KL

DK

Siumup siulittaasuata Trump Kalaallit Nunaannut tikilluaqquaa

Nunarsuarmi pissaaneqarnerpaap Kalaallit Nunaannut soqutiginninnera attaveqaqatigiinnernik nutaanik pilersitsinissamut nunallu Naalagaaffinngornissamut aqqutissaanik nukittorsaanissamut periarfissaavoq, Siumup siulittaasua Erik Jensen oqarpoq.

- Tamanna tunngavigalugu USA-p presidenterligassaata Donald Trumpip nunatsinnut soqutiginnilluni maannamut arlaleriarluni oqariartuuteqalersimanera aallaavigalugu ingeqatigiilluta ataatsimeeqatigiinnissamut assammik isaassivugut, tusagassiuutinut nalunaarummi Erik Jensen allappoq.
Thomas Munk Veirum
Tusagassiortoq
Saqqummersinneqarpoq

Siumup siulittaasuata Erik Jensenip Donald Trumpip Kalaallit Nunaannut inuulluaqqusinera qisuariarfigaa.

Juulliaqqami Trump inoqatinut attaveqaatini Truth Social-imi ima allappoq:

- Aammattaaq Kalaallit Nunaanni innuttaasunut, USA-p nunap isumannaatsuuneranut tunngatillugu pisariaqartitaanut, USA-p peqataanissaanik kissaateqartunut, uagut aamma peqataarusuppugut!...

Erik Jensenip erseqqissarpaa nunarsuarmi pissaaneqarnerpaat, soorlu USA-p, soqutiginninnera Kalaallit Nunaata Naalagaaffinngornissaanut iluaqutaasinnaasoq:

- Maannami nunarsuarmi pissaaneqarnerpaap nunatsinnut soqutiginnilluni oqariartuutaa nunatut Naalagaaffinngoriartortutut soqutigineqarnitta iluani pitsassuartut nersornaatitut tigullugu isiginngitsuusaaginnarsinnaanngilarput, tusagassiuutinut nalunaarummi Erik Jensen allappoq, tassanilu Trumpip soqutiginninnera pillugu qutsaviginnippoq:

- USA-p Presidenteriligassaata Donald Trumpip juullimi inuulluaqqussummini nunatsinnut ilanngullugu inuulluaqqusinera siullermik qujassutigerusupparput, Siumumiillu iluatsillugu juullikkunni ilaqutai ilanngullugit pilluaqqorusuppavut ukiumullu nutaamut iserluarnissaannik kissaallugit.

"Niuernikkut, sulisoqarnikkut, ilinniartitaanikkut, piorsarsimassutsikkut minnerunngitsumillu aningaasaqarnikkut paarlaasseqatigiiffiusumik eqaatsumik suleqatissarsiorsinnaanerup ataatsimoorfissarsiorsinnaanerullu ingerlanneqarnissaata tunngavigiuarnissaa" Siumup pingaartikkaa, Erik Jensen nangilluni allappoq.

Taamaattumik Trump Kalaallit Nunaannut tikeraaqquaa:

- Taamaasiornikkut nunatta imminut napatilernissaanut siunertalimmik ineriartuutissanik suleqateqarnerup tunngavissinneqassammat. Tamanna tunngavigalugu USA-p presidenterligassaata Donald Trumpip nunatsinnut soqutiginnilluni maannamut arlaleriarluni oqariartuuteqalersimanera aallaavigalugu ingeqatigiilluta ataatsimeeqatigiinnissamut assammik isaassivugut.

- Naak Trumpip nalunngikkaluaraa Kalaallit Nunaat tuniniarneqanngitsoq, erseqqissaatigissavarput Trump Kalaallit Nunaannut tikilluaqqusaammat uagullu aamma ornigunnissamut Siumumit piareersimagatta.

erik jensen samfund donald trump selvstændighed inuiaqatigiit siumut

ATORFIIT Se alle jobs

Powered by Labrador CMS