Siumut ministeriunermut isornartorsiuivoq - piumasaqarlunilu namminiilivinnissaq pillugu sulineq sukkatsisinneqassasoq
Siumup siulittaasuata, Erik Jensenip erseqqissumik oqaatigaa Kalaallit Nunaata namminersulernissaa/naalagaaffinngornissaa inuit ataasiakkaat piginnittunngorfiginiassanngikkaat immeraassutissaanngitsorlu. Kisianni maanna partiip sulineq sukkatsisinneqassasoq piumasaraa ministeriunerup Siumup oqarnera naapertorlugu nammineq kisimiilluni ingerlatsinera Itillimi nalunaarusiaq avaqqullugu, tassa nunarput avaqqullugu.
Siumut marlunnik oqaqarluni ingerlatsiva Kalaallit Nunaata namminiilivinnissaanik oqallinnermi? Ippassaq pingasunngornermi Siumup siulittaasua oqarpoq inuttut ataasiakkaat imaluunniit partiit ataasiakkaat anguniagaq sulissutigisassarinngikkaat. Ullumi Doris Jakobsen Jensen nalunaarpoq partiip tamarmi tunuliaqutaaffigisaanik piumasarineqartoq suliaq sukkatsisinneqassasoq, naak partii nammineq suleriaasissaq pillugu Inatsisartuni akuerseqataanikuugaluartoq.
Assiliisoq: Leiff Josefsen
Namminersorneq pillugu inatsimmi § 21 pillugu oqallinnermi suna eqqorpa sunalu eqqunngila? Sooq politikerit namminneq aalajangiussimasaminnik qaangiataarinnippat? Inuiaat qaammaasaqarnerulersinneqarpat politikerinit namminneq suleriaasissamik aalajangersakkaminnik tunutsillutik allatut iliornialerpmata? Apeqqut annerpaaq: Inuiaat taasitinneqalerunik ilisimasaqarluarlutik aalajangernissaat isumagineqarpa? Taamaassimappat qaqugu taasitinneqassappat?
Qanoq iliorluni namminersulernissamut ingerlariaqqinnissamut suliassat ilusilersorneqassanersut apeqqutit amerlasuut maannamut akissutissarsineqanngillat. Politikerit namminneerlutik suliassat qanoq ingerlanneqassanersut ilusilersorsimavaat, kisianni tamanna apeqqutaatinnagu oqallinnerit annertuut ingerlanneqarput, pingaartumik Siumumi, ilutigalugulu partiip siulittaasuata eqqissisaaniaatigisoq.
Taamaakkaluartoq partiip Inatsisartuni politikkikkut oqaaseqartartua, Doris Jakobsen Jensen (S) aamma maanna saqqummiussivoq "namminersorneq pillugu inasimmi § 21 ammarneqartariaqartoq".
Doris Jakobsen Jensen Sermitsiamut oqarpoq tusagassiuutitigut nalunaarutertik , Siumup Inatsisartuni ilaasortaatitaasa aammalu partiip siulersuisuunerisa akuerisimagaat.
Ministeriuneq isornartorsiorpaat
Doris Jakobsen Jensen innersuussivoq ministeriunerup, taamaalillunilu naalagaaffiup "Kalaallit Nunaat pillugu Kalaallit Nunaat avaqqullugu ingerlatsisoqassanngilaq" (Itillemi nalunaarusiaq, aaqq.) ataqqinngikkaa innersuussutigaa, tamannalu pisimanerarpaa Ministeriunerup Mette Frederiksenip nammineq kisimiilluni nunarpullu avaqqullugu ingerlatsineratigut, aammalu Kalaallit Nunaat avaqqullugu nunat amerlasuut ataatsimeeqatigisaqattaarsimagai, EU ilanngullugu, Donald Trumpip Kalaallit Nunaat "pisiariniarlugu aqussinnaaneralu" pillugu oqaloqatigisimammagit.
- Tusagassiorfinnut nalunaaruterput Inatsisartunut qinersinissap nalunaarutigineqannginnerani ulloq ataaseq sioqqullugu naammassivarput. Siunertarisimagaluarparput Inatsisartut suleriaasianni § 40 aalajangiiffigisassatut siunnersuummik saqqummiinissarput, siunertaralugu § 21 piaarnerpaamik atuutilersinneqassasoq, taamaalilluni Kalaallit Nunaata nammineq oqaloqatiginninnissat isumaqatigiinniutissallu ingerlassinnaaniassammagit, Doris Jakobsen Jensen nassuiaavoq.
Qanorliuna isumaqartoq "§ 21 ammarneqassasoq"?
Inatsisartut nammineq suliassamut killissarititaat aalajangersimavaat aammalu 2025-mut aningaasanut inatsimmi 2 millionit koruuninik immikkoortitsillutik.
Naalagaaffinngornissamut nunanullu allanut tunngasunut Naalakkersuisoq nassuiaammik Inatsisartunut agguaassinikuuvoq suliap qanoq ingerlanneqarnissaa pillugu. Tassani aamma "§21 ataatsimiititaliap" suliassai nassuiarneqarput.
Tassani allassimavoq atuutsitsilinnginnermi "Namminersorneq pillugu inatsimmi § 21-ip
atorneqalerneratigut suliarineqalersussat inatsisitigut nassuiaasiussallugit. Aalajangiiniarnerup ingerlanerani alloriarfiit pisariaqartussat ataatsimiititaliamit misissorneqarlutillu nassuiarneqassapput, inatsisit
atuuttut misisoqqissaarneqassallutik, kiisalu suliap ingerlaqqinnissaanut siunnersuusiussalluni. Kalaallit
Nunaata namminiiliveratarnissaanut inatsisitigut sulinerup aaqqissorluagaanissaa isertuaatsuunissaalu
qularnaagassarissavaa."
Aammattaaq allassimavoq, isumalioqatigiissitap suliassaminik nammineq aaqqissuussissasoq, naatsorsuutigineqartorlu nalunaarusiaq ukiut marluk iluani suliarineqassasoq.
Doris Jakobsen Jensen aperaarput Siumup taamaaliornermigut inatsisitigut nalunaarusiaq unitsinneqaannassanersoq, akivoq § 21 ammarneqarnissaa Kalaallit Nunaannut nammineerluni suleqatigiinnissamik ilusilersuinissamut periarfissiissasoq, taamatullu ataatsimiititaliaq misissuinerminik ingerlatsiinnassasoq.
Sermitsiamit ministeriuneq akissutissarsiniarfigaarput nunarput avaqqullugu pisuutitsissutigineqartutut iliuuseqarsimanersoq.
