Siumut Naleqqamut: Avissaartuutsitsisunik suleqateqarnianngilagut!
Siumukkut Naleqqakkunnik suleqateqarusunngillat. Maanna borgmesteriusoq, Malik Berthelsen taama erseqqitsigisumik Sermitsiamut oqarpoq. - Qinigaaffiit kingulliit marluk partii pingasuulluta suleqatigiilluarpugut, kisianni Naleqqakkut taamatut pissusilersuinnassappata suleqatiginianngilagut, Malik Berthelsen Siumumeersoq oqarpoq.
Assi: Leiff Josefsen
Qeqqata Kommuniani kommunimut qinersineq politikkimut tunngasunik piviusulersaarusiornermut assinguvoq.
Siumut erseqqarissumik oqariartuuteqarpoq: Naleraq suleqatiginianngilarput. Borgmesteri Malik Berthelsenip oqaasii naapertorlugit Naleqqakkut suleqatiginissaat ima ajornartigaaq, kommunimi innuttaasunik avissaartuutsitsimmat.
- Qinigaaffiit kingulliit marluk partiit pingasuulluta suleqatigiilluarpugut, kisianni Naleraq taamatut pissusilersuunnassappat suleqatigerusunngilagut, Malik Berthelsen Sermitsiamut oqarpoq.
Sianiinnerartarpaatigut
Naleqqakkunuku susimagamik Siumumiit suleqatigeqarusunngitsut?
Malik Berthelsen Sermitsiamut oqaluttuarpoq Naleqqakkut kommunimi, soorlu Maniitsumi Sisimiuni innuttaasunik avissaartuutsitsisuusut. Kommunalbestyresilu ataatsimiinnerani sianiinneraasarlutik.
- Ataatsimiikkaangatta sianiinnerartillutalu uparuartorneqartarpugut. Immitsinnuinnarlu sullinnerartarluta. Qinigaaffimmi aamma sulerisimannginnerarpaatigut, Malik Berthelsen oqarpoq.
- Naleqqakkut qinigaaffimmi Maniitsumi Sisimiunilu innuttaasunik kamammik pilersitsipput. Kamammik ikummarisaaniarpata suleqatigiilluarsinnaanngilagut.
- Uparuaanerit tusaasinnaasariaqarpaat
Steffen Johansen, Naleraq Sisimiuni siulittaasoq isornartorsiummut akissuteqarpoq.
Taassuma Sermitsiamut oqaluttuaraa partiit tamarmik suleqatigisinnaallugit. Taanna isumaqarpoq politikkikkut anguniakkat assigiinngitsuusartut, taamaattumillu illuatungiliuttunut tusarnaarsinnaasariaqartut, aamma isornartorsiuisoqartillugu.
Kommunalbestyrelsip ataatsimiinnerata nalaani sianiinneraasarsimaneq Steffen Johansenip ilisarisinnaannginnerarpaa.
- Illuatungiliuttuusugut siunnersuutinik akuerseqataasarpugut aamma tapersersuisinnaasarluta. Aamma pisariaqaraangat isornartorsiusarpugut, kingunerisinnaasai ernumagigaangatsigit. Tassa taamak politikkikkut sulisarput, soorlu kommunini allani Inatsisartunilu aamma taamaattartut. Isornartorsiuinerit tusaaneqarsinnaasariaqarput.
- Taamaattumik ajuusaarnarpoq isornartorsiuinerit innuttaasunik avissaartuutsitsiniaanertut isigineqarpata.
Inatsisartunut qinersinermi naammassineqaqqammersumi Naleraq partiini anginersanngorpoq, Qeqqata Kommuniani taasinerit eqqarsaatigalugit.
Naleraq kommunimi taasinernik 30 procentinik pissarsivoq. Siumut kinguariarluni 15 procentinik pissarsivoq.
Kommunimut apriilip aallaqqaataani qinersisoqarpat paasinarsissaaq qanoq inissittoqarumaarneranik.
