Siumut peqquserlussimanermik misissuinera naammassilersoq: Partiip malittarisassaanik peqquserluttoqarsimasoq

Kukkunersiuisut aammalu siulersuisut misissuinerat naammassineqarsimalersup uppernarsarlugu takutippaa, Siumut Nuup immikkoortortaqarfiani siulersuisuni siuttup siulia, Qarsoq Høegh-Dam Siumup Nuna tamakkerlugu ataatsimeersuarnissamut aallartitassat qassiunissaanut tunngatillugu, ilaasortaqassuseq pillugu peqquserlussimasoq. Taama Siumumi ataqatigiissaanerinermi siulittaasup tullia, Hans Peter Poulsen tusagassiuutitigut nalunaaruteqarpoq. 

Tusagassiuutitigut nalunaarummi allassimavoq Siumup Nuna tamakkerlugu malittarisassai naapertorlugit immikkoortortaqarfiit 100-t sinnerlugit ilaasortallit pingasunik taasisinnaasunik aallartitaqarsinnaasut. Ilaasortaqassuserlu eqqunngitsumik nalunaarsorsimasaq atorlugu Siumut Nuuk pingasunik taasisinnaasunik aallartitaqarsimavoq.

Hans Peter Poulseni nassuiaavoq ilaasortat akiliutaat ilaasortallu amerlassusaat nikingammata Siumumi siulersuisut peqquserluttoqarsimanissaanik pasitsaassaqalersimasut.

- Akiliutitigut ilaasortat amerlassusaat takuneqarsinnaapput. Aningaasat akiliutigineqartut ilaasortaqassuserlu nikingapput, taamaattumik pasilliutit aallartipput, Hans Peter Poulsen Sermitsiamut nassuiaavoq.

Unioqqutitsinerujussuaq - malersoqqinnissaalli pisariaqanngilaq

Pisimasoq ilungersunarmat aamma partii Siumup malittarisassaanik naleqartitaanillu ima innarleeriartigimmat unioqqutitsinerujussuummallu akuersaarneqarsinnaanngitsoq, Siumup Siulersuisuunerisa oqaatigaat.

- Taamaattoq avammut nalunaarutigisariaqarlugu, ilaasortaanermut akiliisarsimasut allattorsimaffiat eqqunngitsoq atorlugu ataatsimeersuarnermut peqataatitaqartoqarsimammat, taamaalli qulaajaanerup kingunerisaanik eqqunngitsuliorsimanerusoq uppernarsarneqarmat, Hans Peter Poulsen allappoq.

Naak Siumut naapertorlugu taamaaliorneq unioqqutitsinerujussuugaluartoq, peqquserlusimaneragaasut malersorneqassannginnerarpaat.

- Siumut Nuummi siulittaasuusimasoq, Qarsoq Høegh-Dam aamma akisussaasimasut ilaat Siumumut ilaasortaajunnaareermata taakku annerusumik malersoqqinneqarnissaat Siulersuisuunerit pisariaqartutut isiginngilaat, tusagassiuutitigut nalunaarummi allassimavoq.

Siulersuisunut ilaasortaasimasut sinneri pisumut qanoq ilisimasaqarsimanersut pillugit nassuiaaqquneqassasut allattoqarfimmut suliakkiutigineqarpoq, aamma pisisimasup uteqqinneqannginnissaa siunertaralugu suliniutinik aallartitsisoqarnissaa ilanngullugu.

Hans Peter Poulsenip aamma Sermitsiamut oqaatigaa, Qarsoq Høegh-Dam tassunga tunngatillugu attavigineqarumaartoq. Kingornalu aalajangertoqarumaartoq qanoq kinguneqartitsisoqarnissaanik.

Sumiiffimmi siulittaasuusimasoq: - Ilumuunngilaq!

Qarsoq Høegh-Dam Siumut Qasigiannguani juulip ulluisa 28-anniit 30-annut ataatsimeersuarnerata nalaani Siumut Nuuk-mi siulittaasuuvoq.

Taamaattumik Sermitsiap Qarsoq Høegh-Dam attaveqarfigaa, taassuma tungaaniit oqaluttuaq paasiumallugu. Taassuma sakkortuumik oqaatigalugu peqqusiserluttoqarsimannginnerarpaa.

- Qanoq ilillutik taamatut sakkortuumik peqquserlussimaneraassappat iliuuseqarfiginiarnagulu? Tamanna pillugu Siumumiit attavigineqanngilangaluunniit, Qarsoq Høegh-Dam Siumut Nuuk-mi siulittaasuusimasoq oqarpoq nangillunilu:

- Ilumuunngilaq! Ilaasortaqassuseq pillugu nalunaarsuinermi peqquserluttoqanngilaq.

- Ilaasortaqassuseq pillugu eqqunngitsumik nalunaarsuigavit? Pingasunillu taasisinnaasunik aallartitaqarlutit?

- Naamik! Siumut Nuuk eqqortumik sulivoq. Takinerunngilaq, Qarsoq Høegh-Dam oqarpoq naggaserlugulu:

- Kusananngilaq taamatut tusagassiuutitigut nalunaaruteqartut, Siumumiillu attavigineqarnanga.