Siumut pujortartaneq qineqqusaarutigigaat: Pujortaqqusinnginneq atorunnaarsinneqassava?
Oqallinneq ikualavoq, tamatunuuna tupa pujuunngilaq. Siumut Sisimiut kommunimut qineqqusaarnermi iluminni avissaartuuppoq. Ilaasortammi qineqqusaartut arlallit kommunimi sulisut pujortaqqusaannginnerat atorunnaarsinnissaanut misissuerusupput. Tamannalu maanna borgmesteriusup akerleraa.
Evelyn Frederikseni Siumumeersoq isumaqarpoq kommunimi sulisut pauserfitsik qanoq atussanerlugit kiffaanngissuseqartariaqartut. Kisianni meeqqat inuusuttullu aatsaat isiginngippata.
Taassumammi kommunimi sulisut sulinerup nalaani pujortaqqusaannginnertik qanoq isumaqarfigineraat misissuiffigerusuppaa. Amerlanerussuteqartullu isumaat ataqqisassaasoq isumaqarpoq:
- Isumaqarama kommunimit sulisut pauserfimminni sussanerlutik nammineq kiffaanngissuseqarfigisariaqaraat. Aamma nalunngilara pujortaqqusinnginneq innuttaasut akornanni oqallisaaqisoq, taamaattumik isumaqarpunga misissuisoqartariaqartoq, Evelyn Frederiksen Semitsiamut oqarpoq.
Borgmesteri: NAAMIK!
Borgmesterili, Malik Berthelsen kommunimi sulisunik sulinerminni pujortartunik takorusunngilaq. Innuttaasut peqqissuunissaat anguniarneqartillugu qinikkat akerlerluinnaarnik iliuuseqalersaarniarnerat isumassaqartinngilaa eqqarsarnartoqartillugulu:
- Nalunagu pujortartarneq inuppassuarnit napparsimalissutigineqarlunilu toqqutigineqartartoq, atugaanerulernissaa soorunami uanga qineqqusaarutigisinnaanngilara. Aamma nunarsuaq tamakkerlugu pujortartarnerup annikillisaqarnissaa anguniarneqartoq nalunatigu, nunatsinni qinikkat killormut atugaanerulernissaanik qineqqusaaruteqarnerat isumaqarpunga assorujussuaq eqqarsarnartoq, Malik Berthelsen Sermitsiamut oqarpoq.
Pujortartarneq qineqqusaarutigineqaraangat
Nunatsinni meeqqat inuusuttullu 15-17-illu akornanni ukiullit affangajaasa, atuarfiillu ilaanni 9-10.klassemi atuartut 72%-ii pujortartalereersimanerat HBSC-ip kisitsisaataani erserpoq.
- Isumaqarpunga assorujussuaq ernumanartoq. Erseqqissumik oqaatigissavara uannut pingaarnerpaammat meerartatta peqqissusaasa illersorneqarnissaat, taamaattumik sulinerup nalaani pujortaqqusinnginnitta attatiinnarneqarnissaanik uanga illersuisuuvunga. Tassami meerartatta timaasa tupamik sequtserneqannginnissaat tamatta ilungersuutigisariaqaraluarparput.
- Taamaattumik uggorissavara kommunip suliffeqarfiutaasa silataanni pujortartarneq takussaaqqilernissaa anguneqassappat.
