Kommuneqarfik Sermersuumi innuttaasut 67-it sinnerlugit
ukiullit maanna 1.136-upput. Siornatigut taama amerlatiginikuunngisaannarput.
Amerliartuinnassappullu.
Kommuneqarfik Sermersuumi innuttaasut 67-it sinnerlugit
ukiullit maanna 1.136-upput. Siornatigut taama amerlatiginikuunngisaannarput.
Amerliartuinnassappullu.
- Utoqqaat amerlassusaat ukiut qulit kingulliit
ingerlanerini 64 procentimik qaffappoq, ineriartornerlu ukiuni tulliuttuni
taamaaginnassasoq naatsorsuutigineqartoq utoqqarnut tunngasunik misissuinermi
nutaami Kommuneqarfik Sermersuumi politikerinut saqqummiunneqartumi tamanna
atuarneqarsinnaavoq.
Ineriartorneq tamanna ingammik peqqinnissaqarfimmut
inissaqarniarnermullu unammillernarsinnaavoq. Utoqqarpaaluit nutaamik
inissarsiortooreerput.
Kisianni:
- Utoqqaat illuini inissanik aamma utoqqarnut
innarluutilinnullu inissanik kommunip maanna inissaatigisaanit amerlanerusunik
pisariaqartitsisoqartoq, kommunip killiffik pillugu nassuiaataani
atuarneqarsinnaavoq.
Utaqqisut nalunaarsorsimaffii
Utoqqaat Nuummiittut 14-it, Ittoqqortoormiini pingasut
Tasiilamilu qulingiluat utoqqaat illuinut najugaqarfiinulluunniit nuunniarlutik
utaqqisut nalunaarsorsimaffianni allassimasut kisitsisit kingulliit – siorna
novembarimeersut - takutippaat.
Suliaqarfimmi, ullumikkut katillugit 116-inik
inissaqartitsisumi, utoqqaat illuinut najugaqarfiinulluunniit nuunniarlutik
utaqqisut katillutik 26-iupput.
Taakkununnga ilaapput init qasuersaarfissiat 17-it, 2024-mi
novembarimi utoqqarnik isumaginninnermi misissuinermi kisitsisit takutippaat.
Aammattaaq utoqqaat 73-it utoqqarnut
innarluutilinnulluunniit inissiani initaarniarlutik utaqqisut
nalunaarsorsimaffianniittut allassimavoq, taakkunannga 58-it Nuummiipput.
Puiguttortut amerlanerungaatsiartut
Isumaginnittoqarfimmit naatsorsuinermi nutaami
puiguttorneq pillugu 2024-mut kisitsisit atuarneqarsinnaanngillat. Kommunimili
104-t puigortunngorsimasut, taakkunannga 47-t utoqqaat illuanni utoqqaat
najugaqatigiiffiiniluunniit najugaqartut marlullu qasuerfaarfinniittut 2023-mi
kisitsisit takutippaat.
Aammattaaq innuttaasut 111-t „puiguttornermut
ersiuteqarput“.
2024-mut kisitsisit ilaannginnerannut nassuiaateqarpoq.
- Isumaginninnermut Suliffeqarnermullu Ingerlatsivimmi
puiguttortut pillugit suliaqarnermi atorfiit inuttalerneqarsinnaasimanngimmata
maanna ataqatigiissaarisoqanngilaq. Suliaq ullumikkut nakkutilliisunit
isumagineqarpoq. Puiguttortunik sullissinermi ataqatigiissaarisup atorfimminit
tunuarneraniilli puiguttortut amerliartornerat pillugu kisitsisitigut
paasissutissanik katersuisoqarsinnaasimanngilaq. Atorfiup inuttalerneqarnissaa
utaqqineqarpoq, ingerlatsivik ilisimatitsivoq.
Puiguttortut 2030-p tungaanut 420-nik amerlinissaat
naatsorsuutigineqartoq Kommuneqarfik Sermersuumi siusinnerusukkut
nalunaarutigineqarpoq.
Tamanna anguniarlugu ineqarnermut tunngasut
suliniutigineqartariaqarput, soorlu utoqqaat illuini immikkoortut
assiaqutsersukkat nunalu tamakkerlugu paaqqinnittarfinnik sanaartortoqassasoq,
tamannalu Naalakkersuisut ataavartuunissamut pilersaarusiaanni aamma
eqqaaneqarpoq.
Puiguttortut amerliartupiloornerat nunani amerlanerni
ajornartorsiutaavoq.
Ukiut 35-t tulliuttut ingerlaneranni nunarsuaq
tamakkerlugu pingasoriaammik amerlissasut — 150 millionit sinneqalissasut naatsorsuutigineqarpoq, Danmarkimi nuna
tamakkerlugu puiguttorneq pillugu ilisimatusarfik nittartakkamini allappoq.
Puiguttornermik nappaateqalernissamut navianaatit ilagaat pujortarneq,
pualavallaarneq, aakkut sukkut qaffasissut ilinniagakippallaarnerlu.
Puiguttorneq aamma kingornunneqarsinnaavoq, taamaattariaqanngilarli.
Ilaqutariinni arlallit kingornutaanngikkaluartumik
puiguttunngorsinnaapput. Ilaqutariinnili pingasut amerlanerusulluunniit
assigiipajaanik ersiuteqarlutik puiguttorpata tamanna kingornussaasinnaasumik
puiguttornermut ersiutaasinnaavoq, ilisimatusarfik allappoq.
Ersiutit
Ersiutit ilaat ima allaatigineqarput: Eqqaamannissinnaajunnaarneq,
suliassanik ilisimariikkanik suliaqarnermik ajornakusoortinneq, oqaatsinik
ajornartorsiuteqarneq, piffissamik sumiiffimmillu ilisimanninnginneq,
naliliilluarsinnaajunnaarneq, eqqarsaatinik takussaanngitsunik
eqqarsaatiginnissinnaajunnaarneq, pigisanik tammaasaqartalerneq, qiimassutsip
pissusilersornerullu allanngorarnerat, kinaassutsikkut allanngorarneq
siulliullunilu iliuuseqarsinnaajunnaarneq.
Sermersuup Utoqqaat Siunnersuisoqatigiivisalu immersuisitsillutik
misissuineranni nutaami apersorneqartut 67-it sinnerlugit ukiullit 15 procentii
tarnikkut nappaateqarnerarlutilluunniit timimut atasumik tarnikkut
nappaateqarnerarlutik, ilaatigut puiguttornermik akipput.
