Siunnersuisoqatigiit: Arnat navianartumiittut digitaliusumik kannguttaatsuliorfigineqarnissaminnut navianartorsiornerusarput
Nunarsuaq tamakkerlugu arnanut nakuusernerup atorunnaarsinneqarnissaanik ullorititami, Naligiissitaanermut Siunnersuisoqatigiit digitaliusumik kannguttaatsuliortarneq pillugu aaqqissuussipput.
- Arnat navianartumiittut immaqalu ulluinnarni timikkut nakuuserfigineqartartut digitaliusumik nakuuserfigineqarnissaminnut navianartorsiornerusarput, naligiissitaanermut siunnersuisoqatigiinni siulittaasoq Britta Keldsen oqarpoq.
Foto: Emil Stach
- Nakuuserneq assigiinngitsorpassuartigut ersertarpoq, aamma digitaliusumik nakuusertoqarsinnaasarpoq.
- Digitaliusumik nakuuserneq pillugu ilisimasatta ilagaat arnat eqqugaanerpaasartut, angutillu taamaaliortuunerusartut, Nunarsuaq tamakkerlugu arnanut nakuusernerup atorunnaarsinneqarnissaanik ullorititamut atatillugu, Naligiissitaanermut Siunnersuisoqatigiinni siulittaasoq Britta Keldsen, oqarpoq.
Siunnersuisoqatigiit ataasinngorpat digitaliusumik kannguttaatsuliornerit pillugit Nuummi Katuami aaqqissuussiumaarlutik tusagassiuutinut nalunaarummi ilisimatitsipput.
Britta Keldsen nangilluni oqarpoq arnat navianartumiittut digitaliusumik kannguttaatsuliorfigineqarnissaminnut navianartorsiornerusut:
- Aamma nalunngilarput arnat ulluinnarni timikkut nakuuserfigineqartareersut digitaliusumik kannguttaatsuliorfigineqarnissaminnut navianartorsiornerusut, Britta Keldsen oqarpoq.
Inatsit naammanngilaq - Qanoq qisuariarniarpugut?
Malersuineq Kalaallit Nunaanni juulimi pinerlunnertut inatsimmut ilanngunneqartoq aamma kanngunartuliorluni aalajangersimasumik attaviginnittuaraanni, malersuiuaraanni allatigulluunniit uumisaariuaraanni malersuisutut pineqaatissinneqarsinnaaneq pillugu aalajangersakkamik atulersitsisoqarsimasoq erseqqissarpaa.
Inatsisit kisimik naammanngitsut, Britta Keldsen oqarpoq:
- Digitaliusumik kannguttaatsuliornerit inatsisitigut akiorneqarsinnaasarput, inuiaqatigiittulli inuttullu ataasiakkaatut suut akuerisinnaanerlutigit inuillu allat killissaannik ataqqinnissinnaanngitsut qanoq qisuariarfigissanerlutigit eqqarsaatigissallugu pingaaruteqarpoq.
- Suiaassuseq tunngavigalugu kannguttaatsuliornermi eqqugaasut inuiaqatigiinnit illersorneqartariaqarput, aamma taamaattunut inuiaqatigiittut peqataajumannginnerput ersersittariaqarparput digitaliusumillu kannguttaatsuliornerit ajornakusoornerulersillugillu pinaveersaartittariaqarpavut.
