Siunnersuut: Aalisartunut piniartunullu kiisalu nunalerisunut pitsaanerusumik taperseeriaaseqalissaaq
Aallarteqqinnissamut tapiissuteqartarnermut inatsisip nutarterneqarnissaa pillugu siunnersuut Naalakkersuisut saqqummiuppaat, tamanna aqqutigalugu siunertarineqarpoq aalisartut piniartullu aammalu nunalerisut aningaasatigut ikiorsiissutissanik qinnuteqarsinnaanerisa pitsaanerulersinneqarlunilu pisariinnerulersinneqarnissaa, assersuutigalugu silap pissusaata allanngoriartornerata malitsigisaanik aningaasarsiornikkut eqqornerlugaanermi qinnuteqartoqarsinnaalerluni.
Kingullermik aningaasarsiornikkut annertuumik appariarnerit assersuutaa piniartunut aalisartunullu Savissivimmi ukioq kingulleq pisimavoq.
Assiliisoq: Obling Carl
Inatsisartuni ilaasortaq, Pipaluk Lynge (IA), 2023-mi Inatsisartut ukiakkut ataatsimiinneranni siunnersuuteqarpoq innuttaasunut, aalisartut, piniartut savaatillillu inuussutissarsiorlutik ingerlatsinerminni silap allanngoriartorneranut attuumassutilimmik ajunaarnersuarmut assingusumik eqqugaasut aningaasatigut ikiorserneqarnissaat siunertaralugu Naalakkersuisut Aningaasanut Inatsimmi kontumik nutaamik pilersitseqqullugit Naalakkersuisut peqquneqarnissaannik Inatsisartut aalajangiissasut.
Naalakkersuisut siunnersuut tunngaviatigut taperserpaat, taamaattorli kontomik pingaarnermik nutaamik pilersitsisoqanngikkaluarluni aallarteqqinnissamut tapiissuteqartarneq pillugu inatsisip nutarterneqarneratigut.
Aningaasatigut tapiiffigitissinnaanermut apeqqut ukiuni kingulliunerusuni ersarissivoq, ilaatigut Savissivimmi aalisartut piniartullu isertitaarutivinneranik kinguneqartumik silap pissusaata allanngornerata kingunerisaanik inuussutissarsiumminnik ingerlatsisinnaajunnaaqqanerat Sermitsiamit allaaserisaqartarpugut.
Tassa siunnersuut aqqutigalugu inuussutissarsiutigalugu aalisartut, inuussutissarsiutigalugu piniartut
inuussutissarsiutigalugulu nunalerinermik ingerlataqartut aallarteqqinnissamut
tapiiffigineqartarnerat pillugu inatsisip allanngortinneqarneratigut periarfissat pisariinnerulerlutillu pitsaanerulersinniarneqarput.
Tamanna erseqqissarneqaarpoq, inatsimmi inuit pineqartut aningaasatigut ikiorsiissuteqarnissamut pisinnaatitaaffeqalernissaat, piffissarititaasumik ilisimatitsissutigineqartumik isertitaat tamakkerlugit imaluunniit annertuutigut ajunaarnersuartut ittumik aqqusaagaqarnikkut annaasaqarsimatillugit.
Inatsimmi allannguutit arlallit
Tamakku saniatigut aamma aalisartoqarpoq piniartoqarlunilu isertitakilluinnartunik, taakku isertitaat ima killeqarsimatigipput allaat sillimasersimanissamut piumasaqaatinik naammassinnissinnaasimanatik. Taakku siusinnerusukkut tapiissuteqarfigineqarsinnaasarsimanngillat piumasaqaataasunik naammassinnissinnaannginnamik, kisianni siunnersuut aqqutigalugu siunissami aamma ikiorserneqarnissamut qinnuteqarsinnaalissasut siunertarineqarpoq.
Taamaalilluni, siunnersuut akuersissutigineqarpat, inatsimmi allannguutit arlallit pisussaapput, tamarmik ataatsimut isigalugit aalisartunut, piniartunut - nutaajunerpaamillu, nunalerinermik inuussutissarsiuteqartunut - ikiorserneqarnissamut qinnuteqarnissamut ajornannginnerulersitsissapput, atortulersuutinik annaasaqarnermi, aalisakkanik pisaqarnerup amigaataanerani silap pissusaata allanngoriartorneranit aammalu aningaasartuutit annertunerpaaffissaata 25.000 koruuninit 50.000 koruuninut qaffanneqarneratigut.
Siunnersuutip aappassaaneerneqarnera novembarip 12-ani pissaaq, pingajussaaneerneqarneralu novembarip 19-ani pilersaarutaavoq.
