Silap pissusaata allanngoriartornera pissutigalugu inatsit allanngortinniarneqarpoq
Inatsisissatut siunnersuummik Naalakkersuisut tusarniaassuteqarput, tassani silap pissusaata allanngoriartornera pissutigalugu inuit isertitaminnik tamakkiisumik annertuumilluunniit annaasaqarsimasut aallarteqqinnissamut ikiorserneqarsinnaalernissaat periarfissaalissaaq.
Inuussutissarsiutigalugu piniartut silap pissusaata allanngoriartornera pissutigalugu isertitakinnerulersut tapersersornissaat ajornannginnerulissaaq.
Toqqorsivimmit assilisaq: Leiff Josefsen
Inuussutissarsiutigalugu aalisartut, inuussutissarsiutigalugu piniartut inuussutissarsiutigalugulu nunalerinermik ingerlataqartut aallarteqqinnissamut tapiiffigineqartarnerat pillugu inatsit Naalakkersuisut allanngortinniarpaat.
Inatsip allanngortinneqarnerata kingunerisaannik tapiissuteqarsinnaaneq 25.000 koruuninit 50.000 koruuninut qaffanneqassaaq.
Immikkut ittumik pisoqartillugu 50.000 koruuninit amerlanerusunik akiliinissamut Naalakkersuisut periarfissaqartuassasut, siunnersuummi allassimavoq.
Tamatuma saniatigut piniartut, aalisartut nunalerinermillu ingerlataqartut silap pissusaata allanngoriartornerata kingunerisaanik aningaasarsiutiminnik tamakkiisumik annertuumilluunniit annaasaqarpata, aningaasatigut ikiorserneqarsinnaalissapput.
Ikaarsaariarnermi aaqqissuussamik taarsiissasoq
- Silap pissusaa annertusisamik unammillernarsimmat aallarteqqinnissamut tapiiffigineqarnissamut inatsip allanngortinnissaa pisariaqalersimavoq, inatsimmi inuit pineqartut ajornannginnerusumik aningaasatigut ikiorserneqarsinnaanngorlugit, siunnersuut pillugu Naalakkersuisut allapput nangillutillu:
- Siunnersuuteqarnikkut silap pissusaa pissutigalugu aammalu ajunaarnersuartut ittumik pisoqartillugu inuussutissarsiortut naammaginartumik isertitaqarunnaarlutik sunnerneqartut inatsimmi ilaatinneqalissapput.
Malittarisassat nutaat inissinnissaasa tungaannut oqaasertaliussat ikaarsaariarnermi utaqqiisaasumik aaqqissuussaapput.
Savissivimmi piniartut ukiukkut sikusimannginnera pissutigalugu qimusserlutik puisinniarsinnaannginnerat siorna decembarimi Sermitsiami allaaserineqarpoq.
