Sodavandinut akitsuutip peernissaa pilersaarutaanngilaq
Sodavandi - imeruersaatillu allat kulsyritallit ullumikkut Danmarkimi pisiarineqarsinnaasut nunatsinni pisiassat assigiinnapajaalernikuuaat. Taamaakkaluartoq assigiinngissutaat marluupput, tassali akii akitsuutaallu. 2024-mi nunatta karsianut 56 millionit koruunit sinnilaarlugit taakku akitsuutaasigut isertinneqarsimapput.
Sodavandit imeruersaatillu allat kulsyritallit nunatsinni pisiarineqarsinnaasut ullumikkut nunani allani pisiarineqarsinnaasut assigiinnalernikuuaat.
Asseq toqqorsivimmit: Ida Marie Odgaard/Ritzau Scanpix
"Sodavandit pillugit sorsunneq" qinigaaffiup siuliani pisimasoq eqqaamallugu, Inatsisartuni ilaasortaq, Hans Enoksen (N) Naalakkersuisunut apeqquteqarpoq sodavandinut assigisaanullu akitsuutit peerneqassanersut.
- Naalakkersuisuutitaqartut siuttui qinigaaffik siuliini qineqqusaarnernilu sodavand-inut
akitsuutit nilliaatiginikuummassuk Naalakkersuisunngortitsinerisa kingorna isumaat
ersarissarneqarniassammat apeqqutit ingerlateqqinneqarput, Hans Enoksen (N) apeqqutiminut tunngavilersuivoq.
Apeqquteqarnermini paasiniarpaa Naalakkersuisut pilersaaruteqarnersut sodavandinut akitsuutinik atorunnaarsitsinissaminnut, tassunga ilanngullugu aamma qinnutigaa ukiuni tallimani kingullerni sodavandit imeruersaatillu allat kulsyritallit ukiuni kingullerni tallimani akitsuutitigut nunatta karsianut qanoq iluanaarutaatigisimanersut.
- Naalakkersuisut sodavandinut assigisaannullu akitsuutit peerneqarnissaat maannakkut sukumiinerusumik oqallisiginikuunngilaat, aningaasaqarnermut akileraartarnermullu Naalakkersuisoq, Múte Bourup Egede (IA) akivoq.
Akitsuutitigut iluanaarutit marloriaatingajanngortut
Januaarip aallaqqaataani 2024-mi Nuuk Imeq matuvoq, tassunga pissutaatinneqarluni suliffeqarfik imeruersaatinut eqqussukkanut unammillersinnaanngitsoq imeruersaatit puui pillugit inatsisip allanngortinneqarnerata kingunerisaanik, taamaaliornikkut imeruersaatit pineqartut avataaniit nunatsinnut eqqussorneqarsinnaanngortinneqarmata.
Nuuk Imeq atuuffiani agguaqatigiissillugu akitsuutitigut 30 millionit koruunit missaanniittarsimapput nunatta karsianut akitsuutitigut isertinneqartartut, kisiannili kisermaassisussaatitaanermik atorunnaarsitsinerup kingorna akitsuutinit isertitat marloriaatingajanngorsimapput, taamaalilluni 56 millionit koruunit sinnerlugit imeruersaatit taakku akitsuutaasigut isertinneqarsimallutik.
Tusarfik: Naalakkersuisut
Taamaattoqarneranut suna pissutaasimasinnaanersoq suli eqqoriaruminaappoq, nunatsinni aatsaat taamak annertutigisumik sodavanditulersimanersugut imaluunniit Naalakkersuisut ilimagisinnaasaattut uninngasuutit amerleriarujussuarsimanerannik pissuteqarsimasinnaanersoq nalunarallarpoq.
